Адыгэ къэралыгъо университетым щызэхащэгъэ шIэныгъэ проектэу «Наука вокруг» зыфиIо­рэм кIэлэеджэкIо нэбгырэ мин 240-рэ фэдиз хэлэжьагъ. Федеральнэ проектэу «Популяризация науки и техно­логии» зыфиIорэм къыдыхэлъытагъэу Урысыем шIэныгъэмкIэ и Министерствэ игранткIэ ар агъэхьазырыгъ.

Естественнэ-хьисап шIэны­гъэхэм апылъ урысые шIэны­гъэлэжьхэм гъэхъагъэу яIэхэр лъыгъэкIотэгъэнхэр, кIэлэеджа­кIохэм яшIэныгъэхэм ахэгъэхъо­гъэныр ары пшъэрылъ шъхьаIэу зэхэщакIохэм зыфагъэуцужьырэр. Проектым къыдыхэлъытэгъэ контентым нэбгырэ миллиони 4-м ехъу еплъыгъ.
Проектыр мэкъуогъум къыщегъэжьагъэу тыгъэгъэзэ мазэм нэс щыIэныгъэм щыпхыращыгъ. А уахътэм къыкIоцI шIэныгъэм ифестивальхэр Урысые кIэлэцIыкIу гупчэу «Орленкэм» щыкIуагъэх, урысые шIэныгъэлэжь цIэрыIохэр зыхэлэжьэгъэ видео­лекциехэр зэхащагъэх, джащ фэдэу естественнэ-хьисап шIэныгъэхэм япхыгъэ онлайн-урок­хэр рагъэкIокIыгъэх.
ШIэныгъэм ифестивалэу
«Орленкэм» мэкъуогъум къыщегъэ­жьагъэу чъэпыогъум нэс щыкIуагъэм нэбгырэ мин 16-м ехъу хэлэжьагъ. Ахэр Урысыем ишъо­лъыр зэфэшъхьафхэм ыкIи хэгъэгу 13-мэ къа­рыкIыгъэ ныбжьыкIэх. Фестивалым къыдыхэлъытагъэу мас­тер-классхэр, тематическэ пло­щадкэхэр ыкIи нэмыкI Iоф­тхьэбзэ зэфэшъхьаф­хэр афызэхащагъэх.
Проектым анахь кIэлэеджэ­кIуабэ зыхэлэжьэгъэ Iофтхьа­б­з­эу къыхэкIыгъэр естественнэ-хьисап шIэныгъэхэмкIэ — хьисапымкIэ, астрономиемкIэ, физикэмкIэ, информатикэмкIэ, биологиемкIэ ыкIи химиемкIэ онлайн-урокэу зэхащагъэхэр ары. Адыгэ къэралыгъо университетым, къэралыгъо университетэу М. В.Ломоносовым ыцIэ зыхьырэм ыкIи нэмыкI апшъэрэ еджэпIэ инхэм якIэлэегъаджэхэр эфир занкIэмкIэ лекциехэм къя­джагъэх. Хэгъэгум ишъолъыр зэфэшъхьафхэм якIэлэеджэкIо мин 200 фэдиз ахэм ахэлэ­жьагъ.
Проектым къыдыхэлъытагъэу ТАСС-р яIэпыIэгъоу гъэсэныгъэ медиатекэ зэхащагъ ыкIи «Премиеу Рунета 2024-рэ» зыфи­Iорэм илъэныкъоу «Детский Рунет и семейные ценности» зы­цIэм хэхьагъ. Непэрэ мафэм ехъулIэу лекциехэм нэбгырэ мини 3-м ехъу яплъыгъ.
Адыгэ къэралыгъо университетым
ипресс-къулыкъу.