«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыдыхэлъытагъэу илъэс къэс Адыгеим гъогу километрэ пчъагъэ щагъэцэкIэжьы.

Мары, гущыIэм пае, Мыекъопэ районым мыгъэ чIыпIиплI щагъэцэкIэ­жьыгъ, ар километрэ 12,7-рэ мэхъу. Ахэр поселкэу Тульскэм екIурэ гъогум, псэупIэхэу Абдзэхэхьаблэ­рэ Новосвободнэмрэ зэзыпхыхэрэм, Мыекъуапэ къэ­зыухьэрэм, станицэу Кужорскэм екIурэм яIа­хьых. IофшIэнхэм пстэумкIи сомэ миллион 300-м ехъу атефагъ.
Автомобиль гъогухэм я ГъэIорышIапIэу «Адыгея­автодорым» къызэрэщыхагъэщыгъэмкIэ, Тульскэм екIурэм щыщэу агъэкIэ­жьыгъэр 2024-рэ илъэсым къыхиубытагъэхэм анахь кIыхь, километри 7,3-рэ мэхъу. Ащ имызакъоу, со­циальнэ мэхьанэ зиIэ­хэм ащыщ, Мыекъопэ рай­он сымэджэщым урещалIэ.
КъэкIорэ илъэсым Мые­къопэ районым щызэшIуа­хынэу агъэнэфагъэхэри Адыгеяавтодорым къыщаIотагъэх. ЧIыпIи 5-мэ гъогухэр ащагъэцэкIэжьыщтых, ар километрэ 14,9-рэ мэхъу. ЗэкIэмкIи сомэ миллион 295,5-рэ пэIуагъэ­хьащт. АгъэкIэжьыщтхэр поселкэу Тульскэмрэ къу­тырэу Садовэмрэ зэзыпхыхэрэм, къутырэу Ткачевым екIурэм, поселкэу Краснооктябрьскэм икIэу станицэу Дагестанскэм екIуалIэрэм яIахьых, Аб­дзэхэхьаблэмрэ Новосвободнэмрэ азыфагурэ станицэу Кужорскэм екIуалIэ­рэмрэ ащыщэу амышIы­гъэу къэнагъэхэр ары.
КъэкIорэ илъэсым пстэумкIи гъогу Iахь 25-рэ Адыгеим щагъэцэкIэжьы­нэу агъэнэфагъ. Ар километрэ 70-м ехъу. IофшIэнхэм пстэумкIи сомэ миллиардрэ миллион 575-рэ апэIуагъэхьащт.