Урысыем и ЛIыхъужъхэу, тичIыгогъухэу Вадим Лемеш, Роман Тороховым, Олег Цоковым ыкIи Валерий За­волянскэм фондэу «Хэгъэгум иухъумакIохэр» зы­фиIо­рэм ишъолъыр къутамэ шIэжь пхъэмбгъу къаща­фызэIуахыгъ.

Ащ фэгъэхьыгъэ Iоф­тхьабзэм хэлэжьагъэх шъо­­лъыр фондым ипащэу ПIатIыкъо Аслъан, игуа­дзэу Джарымэ Еленэ, щымыIэжь ЛIыхъужъхэм яшъхьэгъусэхэр ыкIи ягу­псэхэр. ЛIэужхэр тари­хъым зэрэзэрипхыхэрэм ишыхьатыгъ юнармейцэ­хэр къызэрэрагъэблэгъагъэхэм.
Къэзэрэугъоигъэхэм фондым ыцIэкIэ Джарымэ Еленэ закъыфигъэзагъ.
— Хэгъэгум и ЛIы­хъужъхэм я Мафэ имэхьа­нэ зэрэиныр кIэдгъэтхъызэ, тичIыгогъу лIыхъужъхэу зыпсэ зыгъэтIылъы­гъэхэр тыгу къэдгъэ­кIы­жьын­хэм, яшIэжь дгъэлъэ­пIэным афэшI тызэхэ­хьагъ. НыбжьыкIэ дзэ-пат­риотическэ объединениеу «ЗыкIыныгъэр», фондэу «Хэгъэгум иухъумакIохэр» зыфиIорэм ишъолъыр къу­тамэ, Адыгэ республикэ общественнэ организа­циеу «ХэушъхьафыкIыгъэ дзэ операцием иветеранхэм я Ассоциацие» зэгъусэхэу пхыращырэ грант патриотическэ проектэу «ЛIы­хъужъым исурэт» зыцIэм къыдыхэлъытагъэу апэрэ шIэжь пхъэмбгъур мыщ къыщызэIутэхы. Ти ЛIы­хъужъхэм ацIэхэр, якъэбархэр, лIыгъэу зэра­хьагъэр тшIэнхэм тэркIэ мэ­хьанэ иI. Мыщ фэдэ шIэжь пхъэмбгъухэр Мые­къуапэ игурыт еджапIэхэу NN 2-м ыкIи 3-м къащызэIуахыгъэх. ЛIыхъужъхэм ягугъу тэшIыфэ яшIэжь щыIэщт, — хигъэунэфыкIыгъ Джарымэ Еленэ.
Урысыем и ЛIыхъужъэу Роман Тороховым ишъхьэ­гъусэу Еленэ япшъэшъэ цIыкIу игъусэу шIэжь зэ­IукIэгъум къэкIуагъэх.
— Мы Iофтхьабзэм сигуапэу сыкъеблэгъагъ. Сишъхьэгъусэ щымыIэжьми, игъэхъагъэхэр, ишIэжь зэрагъэлъапIэрэм тиунагъокIэ тырэгушхо. Шъо­лъыр фондэу «Хэгъэгум иухъумакIохэм», къэра­лыгъо хэбзэ къулыкъухэми лъэшэу анаIэ къыттет, ащ­кIэ тафэраз. Мыщ фэдэ зэIукIэгъухэм нахь тыгу къаIэты, сэщ фэдэ шъу­забэу къэнагъэхэм гущы­Iэгъу тызэфэхъу, нэмыкI щымыIэжь дзэкIолIхэми мыжъобгъухэр къафызэ­Iухыгъэнхэм, мы уахътэм хэушъхьафыкIыгъэ дзэ операцием хэлажьэхэрэм IэпыIэгъу тызэрафэхъущтым татегущыIэ, — къы­Iуагъ Елена Тороховам.
Нэужым къэзэрэугъоигъэхэр зэхэсхэу щай зэдешъуагъэх, ЛIыхъужъхэр агу къагъэкIыжьыгъэх, ягукIаехэр зэфаIотагъэх.
Iэшъынэ Сусан.