Мы мафэхэм республикэ зэнэкъокъоу «ЕджэпIакIэм — кIэлэегъэджакIэхэр» зыфиIорэр республикэм щаублагъ. Адыгэ кIэлэегъэджэ колледжэу Андырхъое Хъусен ыцIэ зыхьырэм мэфэкI шIыкIэм тетэу ар къыщызэIуахыгъ.

Зэнэкъокъум мэзищым къыщегъэжьагъэу илъэсищым нэсэу Iоф зышIэрэ кIэлэегъэджэ нэбгырипшI хэлажьэ. Мэфэ заулэм ахэм лъэныкъо зэфэшъхьафхэмкIэ заушэтыщт.
АР-м шIэныгъэмрэ гъэсэныгъэмрэкIэ иминистрэу Евгений Лебедевым ыцIэкIэ къэзэрэугъоигъэхэм шIуфэс къарихыгъ ащ игуадзэу Артем Журавель. Мы зэнэкъокъур анахь гъэшIэгъонхэм зэращыщыр, нэбгырэ пэпчъ кIэлэегъэджэ ныбжьыкIэм игъогу къызэрэщежьагъэр къыIуагъ. НыбжьыкIэхэм яIофшIэнкIэ хэхъоныгъэхэр ашIынхэм, яшIэныгъэхэм ахагъэхъоным апае мыщ фэдэ зэнэкъо­къухэм яшIуагъэ къызэрэкIорэр къыхигъэщыгъ.
— КIэлэегъэджэ сэнэхьатым мэхьанэшхо зэриIэр зэкIэми тэшIэ. Мы гъогур къызэрэхэшъухыгъэм шъурыкIэмыгъо­жьэу, гъэсэныгъэм исистемэ хэхъоныгъэхэр ышIынхэмкIэ шъуиIахьышIу хэшъулъхьанэу тыщэгугъы. ШъуиIофшIэнкIэ шIэныгъэу шъуIэкIэлъхэр къэжъугъэлъа­гъох, лъэныкъуакIэхэр зэжъугъашIэх. ШъуиIофшIэн ешъогъэжьэ къодый, шъуи­гъогу зэIухыгъ, гъэхъагъэхэр зэрэшъуи­Iэщтхэм тицыхьэ телъ, — къыIуагъ Артем Журавель.
Урысыем ипрофсоюзхэм я Адыгэ рес­публикэ организацие гъэсэныгъэм иIофышIэхэмкIэ ясоюз ипащэу Сергей Кошкиныр, Адыгэ кIэлэегъэджэ колледжэу Андырхъое Хъусен ыцIэ зыхьырэм ипащэу Къэгъэзэжь Мурат, 2023-рэ илъэсым «ЕджэпIакIэм — кIэлэегъэ­джакIэхэр» зыфиIорэ зэнэкъокъум текIоныгъэ къыдэзыхыгъэ Анастасия Дженжеря Iофтхьабзэм къекIолIагъэхэм шIуфэс къарахыгъ ыкIи зэнэкъокъум хэлажьэхэрэм яшIэныгъэхэр зэрифэшъуа­шэу къагъэлъэгъонэу къафэлъэIуагъэх.
Зэнэкъокъум къыдыхэлъытагъэу «Здравствуйте, это я!» зыфиIорэ лъэныкъомкIэ кIэлэегъэджэ ныбжьыкIэхэм нэужым заушэтыгъ. Тхьамафэм къыкIоцI республикэм икIэлэегъэджэ ныбжьыкIэхэр зэнэкъокъущтых. Тыгъэгъазэм и 13-м зэфэхьысыжьхэр къэнэфэщтых, анахь дэгъоу зыкъэзыгъэлъэгъуагъэхэр агъэшIощтых.
ДЕЛЭКЪО Анет.