2025-рэ илъэс бюджетым ыкIи 2026 — 2027-мкIэ агъэнэфагъэхэм афэгъэхьыгъэ хэбзэгъэуцугъэр щаштагъ АР-м и Къэралыгъо Совет – Хасэм я XLI-рэ зичэзыу зэхэсыгъоу тыгъуасэ иIагъэм.

Ащ хэлэжьагъэх АР-м иминистрэхэм я Кабинет хэтхэр, федеральнэ ыкIи шъолъыр къу­лыкъухэм, муниципальнэ образованиехэм ялIыкIохэр, нэмыкI­хэр. Iофтхьабзэр зэрищагъ Парламентым и Тхьаматэу Владимир Нарожнэм.
КъэкIорэ илъэсым ыкIи ащ къыкIэлъыкIорэ илъэситIум ябюджетхэр зыфэдэщтхэм къы­тегущыIагъэх шъолъыр Парламентым и Тхьаматэ игуадзэу, бюджет, финанс, хэбзэIахь ыкIи экономикэ политикэмкIэ, предпринимательствэмкIэ, IэкIыб зэпхыныгъэхэмкIэ и Комитет ипащэу Iэщэ Мухьамэдрэ Правительствэм ипащэ игуадзэу, финансхэмкIэ министрэу Виктор Орловымрэ. ЫпэрапшIэу «Пуб­личнэ едэIунхэр», етIанэ бюджетымкIэ Парламентым и Комитет изэхэсыгъуитIу къызэпызычыгъэ законопроектым гъэтэрэзыжьын 34-рэ фашIыгъ. Ахэм ащыщэу 23-мэ АР-м и Къэралыгъо Совет – Хасэм идепутатхэр кIэщакIо ­афэхъугъэх, адрэхэр АР-м иминистрэхэм я Кабинет къыхилъхьагъэх.

Ахэри зэрэхэтхэу 2025-рэ илъэс бюджетым ихахъохэр сомэ миллиард 41,2-рэ, хъар­дж­хэр сомэ миллиард 43,4-рэ хъущтых, сомэ миллиарди 2,2-рэ щыкIагъэ фэхъущт. БлэкIыгъэ илъэсхэм афэдэу социальнэ лъэныкъом нахьыбэр, ар процент 60-м ехъу, пэIухьащт. ХэушъхьафыкIыгъэ дзэ операцием хэлажьэхэрэмрэ ахэм яунагъохэмрэ анахьэу анаIэ атырагъэтыщт, УФ-м и Президент иунашъохэм, лъэпкъ проектхэм, къэралыгъо программэхэм ягъэцэкIэни, гъэсэны­гъэм, псауныгъэм икъэухъумэн, спортым, культурэм, нэмыкI лъэныкъохэм япхыгъэ пшъэры­лъэу яIэхэри къыщыдалъытагъэх.
Депутатхэр зыхаплъэхэм ыуж шъолъы­рым ифинанс тхылъ шъхьаIэ ятIонэрэ еджэгъумкIэ аштагъ.
ШIокI зимыIэ медицинэ страхованиемкIэ АР-м и ЧIыпIэ фонд 2025-рэ илъэсымкIэ ибюджет ыкIи 2026 — 2027-мкIэ агъэнэфагъэхэм афэгъэхьыгъэ хэбзэгъэуцугъэм ипроект зыпари гъэтэрэзыжьын фашIыгъэп. Фондым ипащэу Хъут Светланэ къызэриIуагъэмкIэ, 2025-рэ илъэсымкIэ хахъохэмкIи хъарджхэмкIи ащ иIахьхэр зэфэдизых, сомэ миллиарди 9,8-рэ зэрэхъухэрэр. Ащ фэгъэхьыгъэ хэбзэгъэуцугъэри ятIонэрэ еджэгъумкIэ зэхэсыгъом щаштагъ.
Муниципальнэ образованиехэм ыкIи ахэм ягъунапкъэхэм афэгъэхьыгъэ рес­публикэ хэбзэгъэуцугъэми зэхъокIыныгъэхэр фашIыгъэх. НахьыпэкIэ районым игугъу тэшIымэ, гущыIэм пае, «муниципальнэ образованиеу «Теуцожь районыр» тIощтыгъ. Джы гъэтэрэзыжьынхэм къызэращыдэлъытагъэмкIэ, «Адыгэ Республикэм и Теуцожь муниципальнэ район» зэрэтIощтыр. Ащ зэкIэ муниципальнэ образованиехэр, псэупIэ койхэр къыхеубытэх.
Джащ фэдэу я XLI-рэ зэхэсыгъом республикэ хэбзэгъэуцугъэу щаштагъэ­хэм ащыщ кIэлэцIыкIу зэрыс унагъоу ипотекэр къызфигъэфедэзэ псэупIэ зэзыгъэгъотыгъэхэм къэралыгъо ­IэпыIэгъу ятыгъэным фэгъэхьыгъэр. Ащ къызэрэщиIорэмкIэ, 2025-рэ илъэсым ищылэ мазэ и 1-м къыщыублагъэу ­2027-м итыгъэгъазэ ыкIэм нэс ящэнэрэ ыкIи ащ къыкIэлъыкIорэ сабый къызэрыхъу­хьэрэ унагъоу ащ тетэу унэ къэзыщэфыгъэхэм ипотекэр апщынынэу ахъщэ аратыщт.
Мыщ къыхиубытэщтых республикэм щыпсэурэ зэшъхьэгъусэхэу зыныбжь илъэс 35-м шIомыкIыгъэ унэгъо ныбжьыкIэхэр. Шапхъэу пылъхэм ащыщ ипотекэр 2027-рэ илъэсыр имыкIызэ агъэпсыныр, кIэлэцIыкIухэр Адыгеим итхэгъэнхэр. Ахъщэр зэтыгъоу аратыщт.
Джащ фэдэу хьыкум участкэхэмрэ ахэм апае зэгъэшIужь хьыкумышI IэнатIэхэмрэ ягъэпсын, кIэлэцIыкIу ибэхэм ыкIи лъыплъэн имыIэу къэнагъэ­хэм япсэупIэхэм ягъэцэкIэжьын пае зэтыгъо ахъщэ тынхэр афэгъэкIогъэнхэмкIэ къэралыгъо пшъэрылъхэм, урамхэм атет псэушъхьэ гъорыкIохэм зэрадэзекIощтхэм, машIор щынэгъончъэ­ным, ом къыздихьырэ тхьамыкIагъохэм цIыфхэр ащыухъумэгъэнхэм, лъэпкъ художественнэ Iэпэщысэхэм яшIын, нэмыкIхэм афэгъэхьыгъэ хэбзэгъэуцугъэ­хэм гъэтэрэзыжьынхэр афэшIыгъэнхэм афэгъэхьыгъэ законопроектхэм, законхэм депутатхэр атегущыIагъэх, апэрэ ыкIи ятIонэрэ еджэгъухэмкIэ аштагъэх.
ХЪУТ
Нэфсэт.