Адыгэ Республикэм и ЛIышъхьэу КъумпIыл Мурат зэнкIэ зэдэгущыIэгъоу цIыфхэм адишIыщтым ехъу­лIэу непэрэ мафэр пштэмэ, упчIэ 700-м нахьыбэ цIыфхэм къы­фагъэзэгъах.

«УпчIэ пэпчъ унэе гумэкIыгъу ыкIи зытырэмкIэ мэхьанэшхо иI. Эфирыр мэкIофэ Iофыгъо пэпчъкIэ джэуапэгъу сафэхъуным сыпылъыщт, лъэныкъо зэфэшъхьафхэмкIэ шIагъэу щыIэу IэпыIэгъу хъушъущтхэм ягугъу къэсшIыщт», — къащитхыгъ КъумпIыл ­Мурат исоциальнэ нэкIубгъохэм.
Шъугу къэдгъэкIыжьын, зэнкIэ зэдэгущыIэгъур неущ, тыгъэгъазэм и 11-м, пчыхьэм сыхьатыр 7-м телеканалэу «Урысыер ­24-рэ» зыфиIорэмкIэ кIощт.
УпчIэхэр зэдэгущыIэгъум икIэух нэс аIахыщтых. ЛIышъхьэм зыфэжъугъэзэнэу шъуфаемэ, электрон почтэу kumpilov-online@mail.ru зыфиIорэм шъутхы е кол-гупчэм иномерэу «122-м» шъутеуи, яжъу­гъэтх.
Эфирым джащ фэдэу шъущяплъын ыкIи шъущядэIун шъулъэкIыщт мыщ фэдэ нэкIубгъохэм:
КъТРК-у «Адыгеим» и Rutube-канал, Платформэу «Смотрим»,Социальнэ хъытыухэу «ВКонтакте» ыкIи «Одноклассники».