Урысыем и Правительствэ шъолъырхэм зэхъокIыныгъэшIухэр афэхъунхэмкIэ IэпыIэгъу арегъэгъоты.

ШъолъыриплIымэ – Чувашием, Адыгеим, Республикэу Марий Эл, Курган хэкум социальнэ-экономикэ хэхъоныгъэ­м­кIэ яунэе программэхэр ухэсыгъэнхэм фэгъэхьыгъэ унашъохэм акIэтхагъэх.
Алтай, Алтай краим, Тыва, Хакасием, Къалмыкъым, Псковскэ хэкум яунэе программэхэр 2024-рэ илъэсыр имыкIызэ аухэсыщтых.
Программэ пэпчъ сомэ миллиарди 6 зырыз федеральнэ бюджетым къыфыхагъэкIыщт.
«А мылъкур цIыфхэм ящыIэкIэ-псэукIэ зыкъегъэIэтыгъэным, шъолъыр проект­хэм нахьыбэу инвестициехэр къахалъхьанхэм апэIуагъэхьащт. Джащ фэдэу къыдэгъэкIыжьыным, мэкъу-мэщым, инфраструктурэм, зекIоным ыкIи ­нэмыкI лъэныкъохэм зягъэушъомбгъугъэнымкIэ IэпыIэгъу тафэхъущт», — къыIуагъ Михаил Мишустиным.
«Урысыем и Президентэу Владимир Путинымрэ УФ-м и Правительствэрэ тафэраз Адыгэ Республикэм социальнэ-экономикэ хэхъоныгъэмкIэ иунэе программэ лъагъэкIотэнэу унашъо зэрашIыгъэм фэшI.
Тишъолъыр ихэхъоныгъэкIэ мэхьанэшхо зиIэ IэпыIэгъоу ар щыт. БлэкIыгъэ илъэсхэм программэр дгъэцакIэ зэхъум тэ анахьэу тынаIэ зытедгъэтыгъэр унэе программэм къыдилъытырэ мылъкур шIуагъэ къытэу дгъэфедэныр ыкIи ащ щыгъэнэфэгъэ пшъэрылъхэр дгъэцэкIэнхэр ары.
Правительствэм иIэпыIэгъу бэшIагъэу къэуцугъэгъэ Iофыгъохэм язэшIохынкIэ амалыкIэхэр къытыгъэх. А программэм ишIуагъэкIэ Адыгеим социальнэ, инфраструктурэ хэхъоныгъэхэр ышIыгъэх, инвестициехэмкIэ Iофхэр нахьышIу хъугъэх. Мы аужырэ илъэсхэм хэгъэгум инэмыкI шъолъырхэм ягъэпшагъэмэ, Адыгеим иэкономикэ фэдитIукIэ нахь зыкъыIэтыгъ.
ТапэкIи программэр дгъэцакIэзэ, республикэм хэхъоныгъэ нахь зэришIыщ­тым сицыхьэ телъ. ПрограммакIэр 2025 – 2030-рэ илъэсхэм ателъытагъ, ащ игъэцэкIэн пае федеральнэ бюджетым сомэ миллиарди 6 къыхагъэкIыщт.
Экономикэм зыкъезыгъэIэтыщт Iофтхьэбзэ пчъагъэ зэрахьанэу рахъухьагъ. Бизнес цIыкIум, гурытым, мэкъумэщ къыдэгъэкIыжьыным, IэпыIэгъу ягъэгъо­тыгъэным, зекIоным зегъэушъобгъугъэным тынаIэ нахь атетыдзэщт. Программэм къыдыхэлъытэгъэ Iофтхьабзэхэр изыхъухьагъэхэр депутатхэр, рес-­
пуб­ликэм ыцIэкIэ сенаторхэр ары, бизнесменхэм яеплъыкIэхэри къыдалъытагъэх.
ЦIыфхэм ящыIэкIэ-псэукIэ зыкъезыгъэIэтыщт зэхъокIыныгъэхэр социальнэ лъэныкъоми, экономикэми ащышIыгъэ­н­хэм тапэкIи ткIуачIэ етхьылIэщт!» — къаригъэхьагъ Адыгеим и ЛIышъхьэу КъумпIыл Мурат социальнэ хъытыухэм.