Адыгэ Республикэм икъэралыгъо гъэцэкIэкIо хэбзэ къулыкъухэмрэ ошIэ-дэмышIэ тхьамыкIагъохэм ыкIи радиационнэ авариехэм шъобж ахэзыхыгъэхэм яобщественнэ организациехэмрэ я Межведомственнэ координационнэ совет зичэзыу зэхэсыгъо иIагъ. Ар зэрищагъ АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловым.

Социальнэ ухъумэнымкIэ, финансхэмкIэ, къэбар жъугъэм иамалхэмкIэ министерствэхэм ыкIи къулыкъухэм япащэхэр, радиацием епхыгъэ тхьамыкIагъохэм ядэгъэзыжьын хэлэжьагъэхэу зэрар зэрихыгъэхэм яобщественнэ организациехэм ялIыкIохэр зэхэсыгъом хэлэжьагъэх.
В. Орловым ипэублэ псалъэ къызэрэщиIуагъэмкIэ, Чернобыль атом электростанцием къыщыхъугъэ аварием къыздихьыгъэ тхьамыкIагъохэм ядэгъэзыжьын хэлэжьагъэхэм яфэIо-фашIэхэр афэгъэ­цэкIэгъэнхэм къэралыгъо хабзэм зэрэ­фэлъэкIэу ынаIэ тырегъэты.
Радиацием зэрар зэрихыгъэхэм зэтыгъо ахъщэ IэпыIэгъоу аратырэм къытегущыIагъ АР-м IофшIэнымкIэ ыкIи социальнэ хэхъоныгъэмкIэ и Министерствэ иотдел ипащэу Браукъо Валерий. Хабзэ зэрэхъугъэу, а зэтыгъо ахъщэ IэпыIэгъур тхьамыкIагъом идэгъэзыжьын хэлэжьагъэхэм, сэкъатныгъэ хэзыхыгъэ­хэм, зидунай зыхъожьыгъэхэм яшъхьэгъусэхэм, янэ-ятэхэм, ясабыйхэм афатIупщы. В. Браукъом къызэриIуагъэм­кIэ, а купым хэхьэрэ нэбгырэ 497-у республикэм щыпсэухэрэм зэтыгъо ахъщэ IэпыIэгъоу аратырэм мы илъэсым хагъэхъуагъ. ЫпэкIэ ар сомэ мини 2 зырыз хъущтыгъэмэ, джы сомэ мини 3-м нэсыгъ. ПстэумкIи ащ сомэ миллион 1,5-м ехъу пэIуагъэхьагъ. Джащ фэдэу икIыгъэ илъэсым гумэкIыгъоу дагъэзыжьын фэягъэхэм ащыщхэу зэшIохыгъэ хъугъэхэм яIэхэм министерствэм илIыкIо къатегущыIагъ.
Адыгэ республикэ общественнэ организациеу «Чернобыль иинвалидхэр» зыфиIорэм итхьаматэу Едыдж Юрэ чернобыльцэхэм ягумэкIыгъохэр зэхэсыгъом къыщиIэтыгъэх. Ахэм зэу ащыщ транспортым пае хэбзэIахь зэратырэр.
— Чернобыльцэхэм ящэнэрэ лIэужэу къакIэхъухьэгъэ сабыйхэр хэбзэгъэуцугъэкIэ зэрэмыухъумагъэхэр федеральнэ шапхъэм тетэу къэIэтыгъэн фае. Джащ фэд, сэкъатныгъэ зиIэхэм Iэзэгъу уцхэр зэраратыхэрэм илъэс зэкIэлъыкIохэм зэхъокIыныгъэ фэхъурэп. А шапхъэр зэрэ Урысыеу арэущтэу щыгъэпсыгъ, игъом ящыкIагъэр агъотырэп, — къыхигъэщыгъ Ю. Едыджым.
АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковыр шIэжь мафэм фэгъэхьыгъэ Iофтхьэбзэ зэфэшъхьафэу мы илъэсым республикэм щызэхащагъэхэм къатегущыIагъ. Ахэм ащыщых гъэсэныгъэм иучреждениехэм ащыкIогъэ «лIыхъужъныгъэм идесэхэр», класснэ сыхьатхэр, нэмыкIхэри. Хабзэ зэрэхъугъэу, мэлылъфэгъум и 26-м хэбзэ къулыкъухэр ыкIи общественнэ организациехэр зыхэлэжьэгъэхэ цIыф зэхахьэхэр муниципалитетхэм зэкIэми ащыкIуагъэх. Ахэм афэгъэхьыгъэ къэтынхэр ыкIи хэутыгъэхэр республикэм Iоф щызышIэрэ къэбар жъугъэм иамалхэм зэкIэми къагъэхьазырыгъэх.
Радиацием епхыгъэ тхьамыкIагъохэм ядэгъэзыжьын фэгъэхьыгъэу агъэнэфагъэхэр зэкIэ гъэцэкIэгъэнхэ зэрэфаер министрэу Виктор Орловым къыхигъэщыгъ, ащкIэ пшъэдэкIыжь зыхьырэ къу­лыкъухэм ялIыкIохэм анаIэ тыраригъэ­дзагъ.
КIАРЭ Фатим.
Сурэтыр авторым ий.