Урамхэу Победэмрэ Пионерскэмрэ зыщызэуалIэхэрэм тет унэу къатищ хъурэм мазэм къехъугъэу хъагъэр къехъухыгъ. ИгъэкIотыгъэ гъэцэкIэжьынхэм къадыхэлъытагъэу унэ кIыбым IофшIэнхэр щэкIох.

2025-м илъэс 60 хъущт псэуалъэм итеплъэ бэшIагъэу нэр ыгъэгушIожьыщтыгъэп: чагъэу, тэкъуагъэу къэлэ гупчэм итыгъ. ДжырэкIэ ащ ылъапсэ, ыпкъ агъэпытагъэх, зыщищыкIагъэм гъучIхэмкIэ акъузыгъ, псыкъе­чъэхыпIэхэр зэблахъугъэх. ЗэрэрахъухьагъэмкIэ, мы мазэм ыкIэм нэс ащ изэтегъэуцожьынкIэ IофшIэнхэр аухыщтых. ГъэцэкIэжьынхэм сомэ миллионищ фэдиз апэIухьагъ.
ПстэумкIи, республикэр пштэмэ, къатыбэ хъурэ уни 151-мэ игъэкIотыгъэ гъэцэкIэжьынхэр мыгъэ арашIылIагъэх. 112-мэ IофшIэнхэр ащаухыгъахэх, зыгорэхэр атынхэ фаехэу яжэх, уплъэкIунхэр ащэкIох, къэнагъэхэм гъэцэкIэжьынхэр ащызэлъыкIагъа­хьэх. ЗэкIэмкIи IофшIэнхэм сомэ миллион 312-рэ апэIу­хьагъ.
— ПсэупIэм фэгъэхьыгъэ хэбзэгъэуцугъэм къыдыхэлъытэгъэ лъэныкъо пстэумкIи IофшIэнхэр тэгъэцакIэх: лифтхэр, унашъхьэр, унэ кIыбыр, нэмыкIхэри. Мыекъуапэ мыгъэ нахьыбэм щыдгъэцэкIэжьыгъэр лифтхэр ары. Унэ 15-мэ ахэт лифт 35-рэ зыпкъ идгъэуцуагъ. Пчъагъэм щыщэу 26-р зэблэтхъугъэ. ДжырэкIэ къэнэгъэ 9-м ауж тит. Ахэм ягъэ­кIэжьын анахь лъапIэхэм ащыщ. Сомэ миллион 90-м нахьыбэ атекIодагъ, — къытфиIотагъ къатыбэ унэхэр игъэкIоты­гъэу гъэцэкIэжьыгъэнхэмкIэ АР-м и Фонд ипащэ иIэнатIэ зыгъэ­цэкIэрэ Иуаныкъо Бис­лъан.
ГущыIэм пае, урамэу Майкопскэм тет унэу N 43-м лифтхэм яIофшIэгъу пIалъэ бэшIагъэу икIыгъагъ: илъэс 40 Iоф ашIагъ. Жъажъэу зекIохэу, загъорэ къэуцущтыгъэ­хэу ыкIи зыщищыкIагъэм пчъэр къыIуамыхыщтыгъэу унэм чIэсхэр тхьаусыхэщтыгъэх. Джы ахэр зэблахъух. Ыпэрэхэм фэдэу нэбгыритф арэфэ, ау уицыхьэ телъэу Iоф ашIэщт. Хьафизэхэм апае убытыпIэхэр ахэм афашIыщ­тых, IапэкIэ къыз­э­джэщтхэ тетхэхэр яIэщтых.

Илъэсым къыкIоцI унэ пчъа­гъэу республикэм щагъэцэкIэжьыщтыр цIыфхэм къаугъо­ирэ ахъщэм епхыгъ. Иуаныкъо Бислъан къызэрэтиIуагъэмкIэ, бэу хэмыкIэу ыкIи хэмыхъоу республикэм илъэс къэс ар щызэфэд – сомэ миллион ­300-м къыреубытэ. Непэ цIыфыр къа­тэу зыщыпсэурэм елъытыгъэу, лифт хэтмэ къыдыхэлъытагъэу, квадратнэ метрэм ыуасэ, зы нэбгырэмкIэ, сомийрэ ныкъорэм къыщегъэжьагъэу сомипшIым нэсы. КъэугъоинымкIэ анахь пэрытхэм ащыщых Мыекъуапэ, Мыекъопэ ыкIи Джэджэ районхэр.
— ЦIыфхэм гъэцэкIэжьыныпкIэр мазэ къэс дэгъоу къаты, къэгъэлъэгъонхэр республикэмкIэ процент 97-м нэсы. Адэ, къахэкIых ащ фэмыехэр, чIыфэ зытелъхэр. ГущыIэм пае, мыгъэ нэбгырэ минищымэ чIыфэ зэтырагъэуагъэу хьыкумым еттыгъэх. Мин 20 — 30-р зэIузыгъэ­кIагъэхэр къахэкIых. Шъыпкъэ, нахьыбэм къатыжьыгъах, ау яIоф хьыкумышI приставхэм заратым ыуж, — еIо Бислъан.
— Адэ, Бислъан, гъэцэкIэжьынхэм цIыфхэр амыгъэразэхэу е зыгорэ мытэрэзэу къыхэкIа?
— Ар сыдигъуи щыI. ТиIоф­шIэнхэм ядэгъугъэ зэщымыкъо­нымкIэ пIалъэ пылъ. ДгъэцэкIэжьыгъэ чIыпIэ пэпчъ илъэситф пIалъэ иI. А уахътэм къыкIоцI зыгорэ къызыхэщкIэ псэолъэшIынхэр резыгъэкIокIыгъэхэм ыкIуачIэкIэ дегъэзыжьых. Зэзэгъыныгъэм ар итхагъ, хабзэми къыдыхэлъы­тагъ.
Къатыбэ хъурэ унэхэр игъэ­кIотыгъэу гъэцэкIэжьыгъэнхэмкIэ Фондыр зылажьэрэр мыгъэ илъэсипшI мэхъу. А уахътэм къыкIоцI фэтэрыбэ унэ 900-мэ IофшIэнхэр ащызэшIуахыгъэх (унашъхьа, унэкIыба, лифт зэблахъугъа…). ПстэумкIи рес­публикэм къатыбэу зэтет 900-рэ ит. КъэкIорэ илъэсым чэзыур зынэсыщт унэхэр теубытагъэу джыри гъэнэфагъэхэп, ау илъэ­сым ыкIэ нэс ахэр шъхьэихыгъэ къашIыщтых.
Анцокъо
Ирин.
Сурэтхэр авторым иех.