ХэушъхьафыкIыгъэ дзэ операцием хэлажьэхэрэм, зыныбжь имы­къу­гъэхэм, IэкIыбым къикIыхэрэм, нэмыкIхэм афэгъэхьыгъэ хэбзэгъэу­цугъэу УФ-м и Къэралыгъо Думэ ыштагъэхэм къихьэгъэ мазэм кIуачIэ яIэ хъугъэ.

ДзэкIолIхэм апае джыри
зы IэпыIэгъу
ХэушъхьафыкIыгъэ дзэ операцием хэлажьэхэу банкым е чIыфэ макIэ зытырэ организацием къаIахыгъэр афэгъэгъу­гъэным фэгъэхьыгъэ хэбзэгъэу­цугъэр блэкIыгъэ мазэм аштагъ. Сомэ миллиони 10-м емы­хъурэ чIыфэр ары зигугъу къы­шIырэр.
Хэбзэгъэуцугъэм къызэрэщиIорэмкIэ, мобилизацием хэфагъэхэм, зыныбжь икъугъэу дзэ дэщыгъом къызэджагъэхэм, зэзэгъыныгъэкIэ къулыкъу ыхьы­нэу кIуагъэхэм ар анэсы. Дзэ­кIолIхэм яшъхьэгъусэхэм аштэгъэ чIыфэри афагъэгъущтхэм къахэфэн ылъэкIыщт. Ау, мыщ дэжьым къыщыхэгъэщыгъ,
2024-м итыгъэгъазэ и 1-м ыуж ­илъэс пIалъэм нахь мымакIэкIэ зэзэгъыныгъэм кIэтхагъэхэр ары къыхиубытэщтхэр.
Джащ фэдэу зэрамытыжьы­шъугъэм ыпкъ къикIыкIэ 2024-рэ илъэсым тыгъэгъазэм и 1-м ыпэкIэ хьыкумыр хаплъи, приставхэм аIэкIэхьагъэхэри афагъэгъущтхэм ащыщых. Моби­лизацием хэфагъэхэм ащыщэу «кредитнэ каникулхэр» зищыкIагъэхэми, пIалъэу къаратырэм хэбзэгъэуцугъэм къыхи­гъэхъуагъ. 2024-рэ илъэсыр имыкIызэ организациеу чIыфэр къезытыгъэм зыфэзыгъазэхэрэм ар къафагъэпсыщт. ПIалъэр мэфэ 30-м щегъэжьагъэу 180-м нэсы.
ТикIэлэцIыкIухэр къэухъумэгъэнхэм фэшI
Хъулъфыгъэу е бзылъфыгъэу къэхъугъэм зызэблихъужьын зыщыфитхэ IэкIыб къэралхэм ащыпсэухэрэм Урысыем къи­хъухьэгъэ кIэлэцIыкIухэр апIунхэу аратынхэ фимытхэу къызщиIорэ хэбзэгъэуцугъэ УФ-м и Къэралыгъо Думэ ыштагъ. Ащ шэкIогъу мазэм и 23-м кIуачIэ иIэ хъугъэ.
Къэбар жъугъэм иамалхэр, интернетыр къызфагъэфедэхэзэ унагъо ашIэныр, кIэлэцIыкIу къагъэхъуныр зыныбжь имы­къугъэхэм шъхьэихыгъэу апэшIозыуIаехэрэм тазыр ягъэтыгъэным фэгъэхьыгъэ хэбзэгъэу­цугъи щыIэ хъугъэ. Ащ фэдэ про­пагандэм пае физическэ лицэхэм — сомэ мин 400, пэщэ IэнатIэм Iутхэм — мин 800, компаниехэм сомэ миллиони 5-м нэсэу атыралъхьащт.
ИчIыпIэ Iупхымэ
Гъэстыныпхъэ шхъуантIэкIэ Iоф зышIэрэ хьакур зыдэщытыщт чIыпIэу пщэрыхьапIэм щы­гъэнэфагъэм Iузыхэу, нэмыкIым зыгъэуцухэрэм тазыр арагъэтынэу къызщиIорэ хэбзэгъэуцугъэми тыгъэгъазэм и 1-м кIуачIэ иIэ хъугъэ. Сомэ 1500-рэ тазы­рэу ащ къыщыдэлъытагъ. Ащ фэдэ пшъэдэкIыжь зыпхьыгъэм ыуж ар етIани ичIыпIэ зымыгъэу­цужькIэ, гъэстыныпхъэ шхъуан­тIэу ащ къекIуалIэрэр пахыщт.
Ушэтынхэр
афагъэпхъэшагъэх
IэкIыбым къикIыгъэу Урысыем къэкIуагъэхэм ушэтынхэр зэратыщтхэм шапхъэу пылъхэр нахь агъэпхъэшагъэх. Тыгъэгъа­зэм и 10-м кIуачIэ зиIэ хъущт хэбзэгъэуцугъэм къызэрэщиIо­рэмкIэ, джы УФ-м гъэсэны­гъэмкIэ и Министерствэ игъо зэрилъэгъугъэу, хэгъэгу кIоцI IофхэмкIэ Министерствэмрэ Рособрнадзорымрэ къыдыра­гъэштагъэу, Правительствэм ыштэгъэ спискэм хэт къэра­лыгъо учреждениер ары ныIэп ушэтынхэр зэхищэнхэу фитыныгъэ зиIэщтыр. ЫпкIэу атыщтыр зыфэдизыри къэралыгъо къулыкъухэм къагъэнэфэщт.
НахьыпэкIэ ащ фэдэ ушэтынхэр сатыу компаниехэм зэхащэщтыгъэх. Ахэм хабзэр аукъуа­гъэу бэрэ агъэунэфыгъ. ГущыIэм пае, IэкIыбым къикIыгъэхэм ушэтынхэр зэратыщт упчIэхэм яджэуапхэр гъэбылъыгъэу аратыщтыгъэх е ахэм ятеплъэкIэ яхьыщыр цIыфхэр къагъотызэ, ачIыпIэкIэ ушэтынхэр арагъэ­кIущтыгъэх.
Джы учреждениеу ахэм афагъэзагъэхэм ушэтынхэм язэхэщэн, урысыбзэр, тарихъыр, хэбзэгъэуцугъэхэр зэрашIэхэрэр къэзыушыхьатырэ тхылъым итын нэмыкIхэм афагъэзэн зэрэфимытхэр мыщ щыкIэгъэтхъыгъ.
Зыгъэхьазырыгъэр
ХЪУТ Нэфсэт.