Къэралыгъо кадастровэ учетым хэуцонхэу е амыгъэкощырэ мылъ­кум пае яфитыныгъэхэр арагъэтхынхэу цIыфхэм къатырэ тхылъхэм яуплъэкIункIэ Росреестрэм хэукъоныгъэхэр ешIыхэу къэбар жъугъэм иамалхэм къызэратыгъэм дыригъаштэрэп.

Амыгъэкощырэ мылъкум пае зэзэгъыныгъэу (сделка с недвижимостью) агъэпсыхэрэм цыхьэ зыфэмышIынхэр, узэнэгуенхэр къахэкIыхэу ары журналистхэм къызэраIорэр. Ащ пае шапхъэу Iоф зэрашIэхэрэр къызэхефых.
Юристхэм къаIуагъэр IэубытыпIэ ашIызэ къэбар жъугъэм иамалхэм къызэрэхагъэщыгъэм­кIэ, Росреестрэм иIофышIэхэм зэзэгъыныгъэхэр агъэпсы зы­хъукIэ амыгъэкощырэ мылъкур зыщэжьырэм ипсихикэ изы­тет, лъэныкъуитIоу ащ хэла­жьэхэрэр псаоу щыIэхэмэ, зы­щэфыжьырэм ифитыныгъэхэр укъуагъэ мэхъухэмэ зыщагъэгъуазэрэп.
Росреестрэм ипащэ игуадзэу, статс-секретарэу Алексей Бутовецкэм къызэриIуагъэмкIэ, зэзэгъыныгъэр зыгъэпсыритIум язырэр дунаим ехыжьыгъэмэ зыщамыгъэгъуазэу къызэратыгъэр шъыпкъэп.
— Тхылъхэр зыгъэпсырэ регистраторым ЗАГС-м и ЗыкI къэралыгъо реестрэ къызфи­гъэфедэзэ зэзэгъыныгъэм хэлажьэхэрэр псаоу щыIэхэмэ, хьауми язырэр дунаим ехыжьыгъэмэ зэрегъашIэ. Электроннэ системэу къулыкъуитIур зэзып­хырэр ары Iоф зэришIэрэр. Ащ IофшIэгъу мэфитIу пIалъэу пы­лъыр, — къыIуагъ ащ ыкIи я 218-рэ Федеральнэ хэбзэгъэу­цугъэм ия 29-рэ статья ия 10.1 Iахь ар къызэригъэна­фэрэр къыхигъэхъожьыгъ.
Амыгъэкощырэ мылъкур зыщэфырэм ифитыныгъэхэр укъуа­гъэхэмэ амыуплъэкIоу зэраIо­рэми статс-секретарым джэуап къыритыжьыгъ.
— Зэзэгъыныгъэм хэлажьэ­хэрэм ятхылъхэр нотариусым ымыуплъэкIугъэу, шапхъэхэм адиштэу ахэр гъэпсыгъэхэмэ къымыушыхьатыгъэмэ ары зыщэфыгъэм ифитыныгъэхэр укъуагъэ хугъэмэ регистраторым зызщигъэгъуазэрэр. Нотариусыр хэплъагъэу, зэкIэ тэрэзэу зэрэгъэпсыгъэм къыкIэтхагъэмэ, икIэрыкIэу ауплъэкIужьырэп, — къыIуагъ ащ.
Мылъкур зыщэрэм е зыщэфырэм ипсихикэ изытет Рос­реестрэм ыуплъэкIуныр ипшъэ­рылъхэм ахэмыхьэу ары статс-­секретарым къызэриIуагъэр. Ау лъэныкъуитIоу хэлажьэхэрэм зэзэгъыныгъэ зэдашIын фитхэмэ ыкIи яакъыл щыкIагъэ фэхъугъэ­мэ е фэмыхъугъэмэ зэрагъашIэ.
Алексей Бутовецкэм къызэриIуагъэмкIэ, зэзэгъыныгъэм хэлажьэрэм иакъыл щыкIагъэ фэхъугъэмэ хьыкумыр ары зы­гъэунэфын фаер. Ащ рихъухьагъэм кIуачIэ иIэ зыхъурэ ужым тхылъэу къытыгъэм икопие Рос­реестрэм фагъэхьы. ЕтIанэ цIыфым иакъыл изытет къызщи­Iорэ къэбарыр амыгъэкощырэ мылъкум и ЗыкI къэралыгъо реестрэ хагъахьэ. Регистраторым тхылъхэр ыгъэпсынхэу зыфе­жьэкIэ, ары апэу ыуплъэкIурэр.
ГущыIэм пае, УФ-м и Гражданскэ Кодекс ия 29-рэ статья зэрэщыгъэнэфагъэмкIэ, цIыфым иакъыл къыщыкIагъэу хьыкумым ыгъэунэфыгъэмэ, ащ лъыплъэ­нэу цIыф егъэнафэшъ, ары зэ­зэгъыныгъэр зыгъэпсырэр. Джащ фэдэу УФ-м и Гражданскэ Кодекс ия 30-рэ статья къызэрэщиIорэмкIэ, цIыфыр ахъ­щэкIэ джэгуным зэрэфэщагъэм е шъон пытэхэм, наркотикхэм зэрапыщагъэм фэшI иакъыл зэригъэфедэщтымкIэ гъунапкъэхэр иIэхэу хьыкумым ыгъэунэфыгъэмэ, ащи лъып­лъэн цIыф фегъэнафэ. Гъунапкъэ зиIэм зэзэгъыныгъэ цIыкIухэр ышIынхэ фит, ау амыгъэкощырэ мылъкум е нэмыкIэу ахъщэшхо зыпылъ мылъкум ахахьэ­хэрэм алъэныкъокIэ къылъыплъэрэ цIыфым ишIэ хэмылъэу фагъэпсыщтэп.