Къэралыгъом ипащэу Владимир Путиным пшъэрылъ къызэрэфи­шIыгъэм тетэу Адыгеим и ЛIышъхьэу КъумпIыл Мурат цIыфхэр щыри­гъэблэгъагъэх УФ-м и Президент ­ишъолъыр егъэблэгъапIэ.

Ащ хэлэжьагъэх феде­ральнэ инспектор шъхьаIэу Сергей Дрокиныр, АР-м ипро­курорэу Игорь Шевченкэр, чIыпIэхэм япащэхэр ыкIи пшъэдэкIыжь зыхьырэ къулыкъухэм яIэшъхьэтетхэр.
Республикэм имуниципалитет зэфэшъхьафхэм ащы­псэухэрэм ялъэIу тхылъхэу гъогу инфраструктурэм, зэ­те­гъэпсыхьэгъэным, псэупIэ-­коммунальнэ хъызмэтым япхыгъэхэм ахэплъагъэх.
ГущыIэм пае, Джэджэ рай­оным щыщ бзылъфыгъэм зыкъызэрафигъэзэгъэ Iо­фыгъор зэпхыгъэр псэупIэу Но­вэм игупчэ парк гъэцэ­кIэжьыгъэныр ары. Джэ­джэ районым ипащэу Андрей Таранухиным къызэриIуа­гъэм­кIэ, ащ фэгъэхьыгъэ про­ект-­сметэ документациер агъэ­хьазырыгъах. Мы илъэсым ыкIэм ехъулIэу паркым изэтегъэпсыхьанкIэ лимитхэр районым къыIэкIа­гъэхьащтых. IофшIэнхэу агъэ­цэкIэщтхэм сомэ миллиони 3,24-рэ апэ­Iухьащт, 2025-рэ илъэсым ыкIэхэм анэс пIалъэу афа­гъэуцугъэр.
ЗэдэгущыIэгъум илъэхъан псэупIэм изэтегъэпсыхьанкIэ джыри пшъэрылъ заулэ КъумпIыл Мурат къыгъэуцугъ. Ащ къызэрэхигъэщыгъэмкIэ, зэхъокIыныгъэхэм цIыфхэу а чIыпIэхэм ащыпсэухэри социальнэ пшъэдэкIыжь зы­хьырэ бизнесым илIыкIохэри къахэгъэлэжьэгъэнхэ фае.
Красногвардейскэ районым къикIыгъэ бзылъфыгъэр зыгъэгумэкIырэр псэупIэу Красногвардейскэм иурамэу Степноим тет унэхэр псырыкIуапIэу ашIырэм пышIэгъэнхэр ары. А муниципалитетым ипащэу Гъубжьэкъо Темур къызэриIуагъэмкIэ, федеральнэ программэу «Къуаджэхэм зэдиштэу хэхъоныгъэ ягъэшIыгъэныр» зыфиIорэм къыдыхэлъытагъэу псырыкIуапIэр ашIы. ПсэолъэшI-монтаж IофшIэнхэр ыкIи псырыкIопIакIэм пышIэгъэнхэр 2025-рэ илъэсым мэзаем ехъулIэу аухынхэу ары.
ПсэупIэу Яблоновскэм иурамэу Сов­хознэм лъэс гъогумрэ ощхыпсыр зэры­лъадэрэмрэ язэтегъэпсыхьан епхыгъэ Iофыгъо къаIэтыгъ. Яблоновскэ къэлэ псэупIэм ипащэу Атэжьыхьэ Заурдин къызэриIуагъэмкIэ, лъэпкъ проектэу «Щынэгъончъэ ыкIи шэпхъэшIухэм ади­штэрэ гъогухэр» зыфиIорэм икъэкIуапIэхэр нахь зэрэкIаугъоещтхэм ишIуагъэкIэ илъэсым ыкIэм ехъулIэу а
псэуалъэмкIэ зэзэгъыныгъэ зэдашIынэу щыт. IофшIэнхэм къадыхэлъытагъэу ощхыпсыр зэрылъэдэщт гъучIбетон трубэхэр агъэтIылъыщтых, лъэс гъогу­хэр ыкIи щагу дэхьапIэхэр нахь зэтырагъэ­псыхьащтых, автомобиль гъогур ас­фальткIэ агъэпкIэщт ыкIи нэмыкI Iоф­шIэнхэр зэшIуахыщтых. 2025-рэ илъэсым иапэрэ кIэлъэныкъо IофшIэнхэр аухынхэу мэгугъэх. Ахэм сомэ миллион 88-м ехъу апэIухьащт.
Адыгэкъалэ щыпсэурэ бзылъфыгъэм илъэIу тхылъ зыфэгъэхьыгъагъэр къутырэу Псэкъупсэ илъэс гъогоу метрэ 700 фэдиз хъурэр зэтегъэпсыхьэгъэныр ары. «Адыгеяавтодорым» ипащэу Алексей Корешкинымрэ Адыгэкъалэ имэрэу Хьачмамыкъо Азэматрэ къызэраIуа­гъэм­кIэ, мы илъэсым ыкIэм ехъулIэу муниципалитетым иадминистрацие Адыгэ Республикэм иунэещт чIыгу Iахь къыритыщт. 2025-рэ илъэсым иапэрэ квартал проект-сметэ документациер зэхагъэуцонэу, 2025-рэ илъэсым Iоныгъом ехъулIэу лъэс гъогур ашIынэу, урамхэр къэзгъэнэфыщтхэр агъэуцунхэу ра­хъу­хьагъ.
ЦIыфхэр зэрэрагъэблэгъагъэм икIэух­хэм адиштэу Адыгеим и ЛIышъхьэ пшъэ­рылъ къыгъэуцугъ цIыфхэм къаIэтыгъэ Iофыгъохэр пIалъэу агъэнэфагъэхэм ашIомыкIхэу зэшIуахынхэу. Ащ къызэрэхигъэщыгъэмкIэ, мыщ фэдэ зэнкIэ зэ­дэгущыIэгъум амал дэгъу къеты чIыпIэ­хэм язытет зыфэдэм икъоу нэIуасэ уфэ­хъунымкIэ, ежь цIыфхэм алъэны­къокIи зэшIохыгъэ хъугъэ Iофтхьабзэхэм уасэ афэшIыгъэнымкIэ.
«ЦIыфхэм ялъэIу тхылъхэм, зыгъэгу­мэкIыхэрэм мэхьанэшхо яI, хэбзэ къулыкъухэм яIофшIэнкIэ анахь мэхьанэ зэтыгъэн фаехэр къыхэгъэщыгъэнхэмкIи яшIогъэшхо къэкIо. ЧIыпIэхэм япащэхэм ыкIи лъэныкъохэу а Iофыгъохэр зэпхыгъэхэм яIэшъхьэтетхэм пшъэрылъ афэсэгъэуцу пIэлъэ кIэкIым къыкIоцI цIыфхэр зыгъэгумэкIыхэрэ Iофыгъохэм адэлэжьэнхэу, зэхафынхэу, ренэу зыгъэгумэкIырэ Iофыгъоу щытхэм зэшIохыкIэ тэрэзхэр къафагъотынхэу», — къыIуагъ республикэм ипащэ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.