Адыгеим и ЛIышъхьэу КъумпIыл Мурат Мые­къуапэ щыпсэурэ са­тыушIхэм заIуигъэкIагъ общественнэ чIыпIэхэм ыкIи сатыушIыпIэхэм ячIэхьапIэхэм илъэсыкIэ гъэдэхэнхэр афэшIы­гъэнхэмкIэ пшъэрылъэу къэуцухэрэм афэгъэхьыгъэу.

ЗэIукIэгъум хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, ащ игуадзэу ЛIыхэсэ Махьмуд, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, Мыекъуапэ ипащэу Геннадий Митрофановыр, къэлэ администрацием илIыкIохэр.
Адыгеим и ЛIышъхьэ къыкIигъэтхъыгъ Мыекъуапэ итеплъэщтым ыкIи къалэр ущыпсэунымкIэ Iэрыфэгъуным ямэхьанэ зэрэиным. Мы лъэныкъомкIэ IофшIэныр зэкIэлъыкIоу ыкIи цIыфэу щыпсэухэрэм яшIошIхэр къыдыхэлъытагъэу агъэпсы. Аужырэ илъэсхэм гъогухэм ягъэ­цэкIэжьынкIэ, урамхэм ягъэ­­нэфынкIэ, къэкIыхэрэр щыгъэтIысхьэгъэнхэмкIэ, социальнэ псэуалъэхэр щышIыгъэнхэмкIэ ыкIи щыгъэцэкIэжьыгъэнхэмкIэ, общественнэ чIыпIэхэр, щагухэр зэтегъэпсыхьэгъэн­хэмкIэ шIагъэу щыIэр бэ, зыгъэпсэфыпIакIэу «Мэздахэр» агъэпсыгъ. Адыгеим иилъэсишъэ ехъулIэу АР-м и Лъэпкъ музей, Пушкиным ыцIэ зыхьырэ унэр, АР-м и Сурэт гъэлъэ­гъуапIэ, культурэм иучрежде­ниехэр, нэмыкI социальнэ псэуалъэхэр игъэкIотыгъэу агъэцэкIэжьыгъэх. Джырэ уахътэм шъхьаIэр — шIагъэр къызэтегъэнэгъэныр ыкIи хэгъэ­хъогъэныр ары.
Адыгеим и ЛIышъхьэ къыIотагъ урамэу Краснооктябрьскэр, къалэм игупчэ шъхьаIэу шIэхэу агъэкIэжьынэу рагъэ­жьэщтым язэтегъэпсыхьанкIэ тапэкIэ пшъэрылъэу щытхэр. АужырэмкIэ IофшIэнхэр рагъэ­жьэгъахэх. Паркым игъэкIэжьын анаIэ джыри тет, бассейныр зэтырагъэпсыхьажьыщт.
Ащ нэмыкIэу зыкI субсидием къыдыхэлъытагъэу Мые­къуапэ зекIохэр къещэлIэгъэнхэмкIэ чIыпIэхэмрэ Iофтхьа­бзэхэмрэ ягъэнэфэнкIэ программэм икъыхэхын агъэхьазыры. Унэхэм атырашIыхьэх адыгэ сурэтышIэу, Урысыем культурэмкIэ изаслуженнэ Iофы­шIэу Бырсыр Абдулахь ышIы­гъэхэм атехыгъэ сурэтышхохэр. Джащ фэдэу республикэм икъэ­лэ шъхьаIэ итарихъ теплъэ, икъэлэ гъэпсыкIэрэ иархитекту­рэрэ ясаугъэтхэм якъэгъэнэ­жьынкIи IофшIэнхэр лъагъэкIо­тэщтых.
«Мы IофшIэным ишIуагъэкIэ зекIоу къихьэхэрэм япчъагъэ хэхъо. ХьакIэщхэм, шхапIэхэм, тучанхэм хьакIэу ачIахьэрэр нахьыбэ зэрэхъугъэми ар къыушыхьатэу сэлъытэ. Амалэу яттыхэрэм яшIуагъэкIэ сатыум хэхъо. Ау мэхьанэшхо иI зэ­дэлэжьэныгъэм, гупсэф къэлэ щыIакIэ зэдэгъэпсыгъэным. Къалэм ежь иархитектурнэ теплъэ иIэнэу, дэхэнэу, гуIэтыпIэнэу, зыщыгъэгъупшэгъуаеу, удэсынкIэ Iэрыфэгъунэу ты­фай. Ар пстэуми зэдыряIофын фае: хабзэми, сатыуми, къэлэ­дэсхэми. Тызэгъусэу ары Адыге­ир — зэдытиунэ — дунаим ичIыпIэ анахь шIагъоу зытшIы­шъущтыр», — къыIуагъ КъумпIыл Мурат.
Предпринимательхэм зафигъазэзэ ЛIышъхьэм къыхигъэщыгъ тапэкIи ягукъэкIхэм хэ­бзэ къулыкъухэм зэрадырагъэштэщтыр. Ащ пае гупчэу «Мой бизнес» зыфиIорэм Iоф ешIэ.
Пшъэрылъ анахь благъэхэм ащыщ илъэсыкIэ мэфэкIхэм къалэр афэгъэхьазырыгъэныр. Ащ къытегущыIагъ Мыекъуапэ ипащэу Геннадий Митрофановыр. КъызэриIуагъэмкIэ, къэлэ урамхэм арт-псэуалъэхэр, скульптурэхэр, архитектурнэ псэолъэ цIыкIухэр атырагъэуцощтых — зэкIэмкIи общест­веннэ чIыпIэхэм илъэсыкIэ пкъыгъуи 150-м ехъу арагъэ­кIущт. Мыекъуапэ ичIыпIэ зэфэшъхьафхэм мэфэкIым инэпэ­еплъхэр къатырагъэуцогъахэх. Республикэ филармонием ылъа­псэ нахь хъэрэ-пкIарэу агъэ­псыщт. ИлъэсыкIэ скульптурэхэр апэрэу ТекIоныгъэм иурам шъуамбгъоу ашIыгъакIэм ща­гъэуцущтых.
Шъхьафэу анаIэ зытырагъэтыщтыр республикэм иостыгъэе чъыг шъхьаI. Мы илъэсым ащ ичIыпIэщтыр къэлэ паркым идэ­хьагъу.
Мыекъуапэ игупчэ шъхьаIэ игъэкIотыгъэ IофшIэнхэр щы­рагъажьэх. Шъугу къэдгъэкIы­жьын, мы проектым цIыфхэр ты­рагъэгущыIагъэх ыкIи зэнэ­къокъур къыдихыгъ. Къихьащт илъэсым гупчэр агъэкIэжьыщт, лъэхъаным диштэрэ фонтаныр щагъэуцущт.
«Адыгеим икъэлэ шъхьаIэ республикэм щыпсэухэрэми, ихьакIэхэми якIуапI, арышъ, илъэсыкIэ мэфэкI чIыпIэ зэфэшъхьафхэр ащ щыгъэпсыгъэнхэ, иурамхэр, иобщественнэ чIыпIэхэр къэнэфырэ скульпту­рэхэмкIэ, IэрышI пцIыикъхэмкIэ ыкIи нэмыкI пкъыгъохэмкIэ гъэкIэрэкIэгъэнхэ фае. Сатыуми ифедэ хэлъын фае гъэлъэ­гъуапIэхэр, унэ кIоцIхэр, тучанхэм, шхапIэхэм ячIэхьапIэхэр, цIыфхэм яфэIо-фашIэхэр зыщагъэцакIэхэрэр гъэдэхэгъэнхэм. ЯмышIыкIэу шъугупшыс ыкIи къалэм мэфэкIыр щызэхашIэнэу жъугъэпсы», — къыкIигъэт­хъыгъ КъумпIыл Мурат.
Мы пстэуми акIэгъэгушIу­гъэнхэм пае къэлэ администрацием мы илъэсым къыщыублагъэу щапIэхэм, шхапIэхэм ыкIи фэIо-фашIэхэм япсэуалъэхэр нахь дахэу зыгъэкIэракIэхэрэмкIэ зэнэкъокъум изэхэщэн регъэжьэжьы. ЗэкIэмкIи мылъкоу илъыр — сомэ миллионныкъу.
АР-м и ЛIышъхьэ ипресс-къулыкъу