Адыгеим икъэзэкъ ныбжьыкIэ­хэм я Союз, Мыекъопэ районым иадминистрацие ыкIи ащ щы­псэурэ къэзэкъхэр, республикэм ипредпринимательхэр, гуфэкIо купэу «Сбор нашим. Майкоп» зыфиIорэр зэгъусэхэу тидзэкъулыкъушIэхэу хэушъхьафыкIыгъэ дзэ операцием щыIэхэм шIу­шIэ IэпыIэгъу зэпымыоу афау­гъои.

Джыри зичэзыу шIушIэ IэпыIэгъоу Херсон ыкIи Запорожскэ лъэныкъохэм ащыIэ зэолIхэм афаухьазырыгъэр блэ­кIыгъэ тхьамафэм атIупщыгъ.
ШIушIэ IэпыIэгъоу тонни 3, 5-м ехъу­рэм гъомылэпхъэ зэфэшъхьафхэр, зашъохэрэ псыр, псэолъэшI материалхэр, генераторхэр хэхьагъэх, зэолI гъэнэфагъэхэм ягупсэхэм къафагъэхьазырыгъэ посылкэхэри ахэтыгъэх. Мыхэр анахьэу дзэкъулыкъушIэхэр къызкIэлъэIугъэхэр ары.
Зичэзыу IэпыIэгъоу аугъоигъэр дзэ операцием хэлажьэхэрэм афэзыща­гъэ­хэр: унэе къэрэгъулэ организациеу «Гром» зыфиIорэм ипащэу Александр Даниловыр, къэзэкъ ныбжьыкIэхэм я Союз ипащэу Екатерина Даниловар, станицэу Тульскэм иатаманэу Андрей Бондаревыр, Мыекъопэ район къэзэкъ обществэм иштаб ипащэу Андрей Колесниковыр.
— Iофтхьабзэм къыхэлэжьэрэ, ти­зэолI­хэм фронтым щыряIэ щыIэкIэ-псэу­кIэр къафэпсынкIэным, ТекIоныгъэр къа­гъэ­блэгъэным фэгумэкIырэ пстэуми «тхьа­шъуегъэпсэу» ятэIо. Тэ ыбгъукIэ тыщытэу, тидзэкIолIхэр зэрэзаохэрэм теплъын тлъэ­кIырэп, тичIыгогъухэм агу къызэрэдэтщэещтым, тынаIэ зэратетыр зэрэзэхядгъэшIэщтым тыпылъ. ШIушIэ IэпыIэгъум иугъоин къэдгъэуцурэп, — къыIуагъ Екатерина Даниловам.