Адыгэ Республикэм и ЛIыкIо гъэIорышIапIэу Урысые Федерацием и Президент дэжь щыIэм мы мафэхэм Москва щызэхищэгъэ Iофтхьа­бзэм Тэхъутэмыкъое районым илIыкIохэр ­хэлэжьагъэх.

Адыгеим икIыхэу Iоф зэ­фэшъ­хьафхэм япхыгъэу Уры­сыем икъэлэ шъхьаIэ кIохэрэм ащыщыбэ гъэIорышIапIэм къеуалIэ.
Лъэпкъым ибаиныгъэ ишыхьат адыгэ культурэр къызщагъэлъэ­гъогъэ Iофтхьабзэр. Творческэ зэIукIэм хэлэжьагъэх Тэхъутэмыкъое районым илъэпкъ орэдыIо ансамблэу «Къамылыр», лъэпкъ Iэмэ-псымэхэмкIэ иансамблэу «Уджыр» ыкIи Къэ­бэр­тэе-Бэлъкъарым изаслуженнэ артистэу Бэрбэч Аскэр.
Адыгэ Республикэм икультурэ къэзыгъэдэхэрэ творческэ куп­хэр зыми фэдэхэп. Артистхэм ижъырэ лъэпкъ орэдхэр къау­хъумэ, шыкIэпщынэм, къамылым мэкъамэхэр къарагъаIо. Лъэпкъыбэ зыщыпсэурэ Урысыеми, IэкIыб хэгъэгухэми шIукIэ ащызэлъашIэх. Адыгеим илIыкIо купхэр нэмыкI шъолъырхэм ащыкIорэ Iофтхьабзэхэми бэрэ ахэлажьэх.
Бэрбэч Аскэр ымэкъэ дахэ уедэIузэ орэдэу къыIорэм нахь куоу ухещэ.
Адыгеим илIыкIохэм къэгъэлъэгъон гъэшIэгъон къатыгъ, пчыхьэзэхахьэр «Удж хъурае­кIэ» аухыгъ.
— Лъэпкъым итарихъ къизы­IотыкIырэ мэкъамэхэр адыгэхэм ящыIэкIэ-псэукIэ, ягупшысэ-гу­лъытэ, якультурэ ныбжьыкIэхэр кIэрымычыгъэу пIугъэнхэм фэ­IорышIэх. Культурэм хэхъоныгъэ ышIынымкIэ мыщ фэдэ зэха­хьэхэм язэхэщэн мэхьанэшхо иI. Лъэпкъэу узщыщым итхыдэ лъым хэлъэу къыдэкIо. Ар къэб­гъэлъэгъон фаеу зыхъурэм, ис­­кусствэм изы Iахьэу орэдкъэ­Iонымрэ лъэпкъ мэкъамэхэмрэ шIыкIэ-амалышIоу щытых. ­Адыгэ орэдым ижабзэкIэ лъэпкъ тхыдэр лIэшIэгъухэм къахэнэщт. «Уджымрэ» «Къамылымрэ» ашIэ­рэ Iофым осэ ин иI, — къы­Iуагъ Тэхъутэмыкъое рай­оным иадминистрацие культу­рэмкIэ игъэIорышIапIэ ипащэу Хьатит Нурдин.
— Творческэ купхэу «Уджым­рэ» «Къамылымрэ» лъэпкъым икультурэ аIэты, къызэтырагъа­нэ, лIэужыкIэхэм алъагъэIэсы, нэмыкI цIыф лъэпкъхэм арагъа­шIэ. Насыпыгъ мыщ фэдэу сэ­наущыгъэ ин зыхэлъ артистхэр Адыгеим зэриIэхэр. Ахэм рес­публикэм ыцIэ дахэкIэ агъэIу. Москва дэс адыгэ ныбжьыкIабэ непэрэ Iофтхьабзэм къекIолIагъэх. Бэрбэч Аскэр итворчествэ къэзэрэугъоигъэхэр нэIуасэ фэ­­хъугъэх, — хигъэунэфыкIыгъ Урысыем культурэмкIэ изаслуженнэ IофышIэу Анатолий Цеп.
Купхэм ярепертуар ыпэкIэ хэтыгъэ мэкъамэхэм, къашъо­хэм, орэдхэм анэмыкIэу къэгъэ­лъэгъоным ехъулIэу кIэхэри агъэхьазырыгъэх. Апэрэ такъи­къым къыщегъэжьагъэу къэгъэ­лъэгъоным икIэух нэс сценэм утеплъэхъукIынэу амал иIагъэп.
Бэрбэч Аскэр адыгабзэкIи, нэмыкIыбзэхэмкIи къыIогъэ орэдхэр гум екIух. Ар пчыхьэзэхахьэм хэлэжьагъэхэм къахахьэзэ адэуджыгъ, ныбжьыкIэхэр искусствэм нахь куоу хищагъэх.
ЩыIэныгъэмрэ цIыфым игъа­шIэрэ яхьылIэгъэ орэдыри гум къегущыIыкIы. Артистым шIукIэ фэтлъэгъурэр оркестрэмрэ залым чIэсхэмрэ искусствэм ыбзэ­кIэ зэфищэнхэ ыкIи зэдигъэгущыIэнхэ зэрилъэкIыгъэр ары.
Тыкъэзыуцухьэрэ дунаир ныбжьыкIэхэм нахьышIоу къагурыIоным, ялъэныкъо гупсэ агъэлъэпIэным, тарихъыр, искусствэр, шэн-хабзэхэр зэрагъа­шIэхэзэ щыIэныгъэм еплъыкIэу фыряIэм зегъэушъомбгъугъэным, творческэ гупшысэу ахэлъыр нахьышIоу агъэфедэным зэхахьэр фэIорышIагъ.
Адыгэ орэд мэкъамэхэмкIэ лъэпкъым икультурэ къагъэлъэ­гъуагъ. Къэзэрэугъоигъэ пстэуми Iофтхьабзэр агу рихьыгъ. Зэхахьэр тиартистхэми шIукIэ агу къинэжьыщт.
Адыгэ Республикэм и ЛIыкIо гъэIорышIапIэу Урысые Федерацием и Президент дэжь щыIэмрэ Тэхъутэмыкъое районым иадминистрацие ипащэу Шъэо Аскэррэ яIэпыIэгъукIэ творческэ зэIукIэр зэхащагъ.
Лъэпшъыкъо Фатим.