Шъолъыр общественнэ организациеу «Врачхэм я Хасэ» изэIугъэкIэгъу мы мафэхэм Урысые Федерацием и Правительствэ дэжь щыIэ финанс университетым щыкIуагъ. Мы апшъэрэ еджапIэм ипрезидентэу Михаил Эскиндаровым иIэпыIэгъукIэ ар зэхащагъ.

Iофтхьабзэм врачхэр, экспертхэр ыкIи медицинэм илIыкIохэр зэрипхыгъэх, илъэсым ашIагъэр зэфахьысыжьыгъ ыкIи къихьащтым пшъэрылъэу зэшIуахыщтхэм атегущыIагъэх. Зэхахьэм хэлэжьагъэх сенаторхэу Хъопсэрыкъо Муратрэ Александр Наролинымрэ. АР-м псауныгъэр къэухъумэгъэнымкIэ иминистрэу Мэрэтыкъо Рустем, «Врачхэм я Хасэ» ипащэу, медицинэ шIэныгъэхэмкIэ докто­рэу, профессорэу, нейрохирургием иотделение ипащэу Жанна Семеновар, Мые­къопэ къэралыгъо технологическэ университетым иректорэу, экономическэ шIэныгъэхэмкIэ докторэу, профессорэу Къуижъ Саидэ ыкIи медицинэ шIэныгъэ­хэмкIэ докторэу, профессорэу, Урысые Федерацием изаслуженнэ врачэу ПщыхьэкIэ Ахьмэдхъан.
Зэхэсыгъом хэлэжьагъэхэм шIуфэс къарихыгъ хасэм итхьамэтэ гъэшIуа­гъэу, Москва дэс адыгэхэм янахьыжъхэм я Совет итхьаматэу Агъырбэ Юрэ.
— «Врачхэм я Хасэ» тызэрипхыгъ. ПIэлъэ кIэкIым къыкIоцI шIуагъэ къыхьын зэрилъэкIыщтыр ащ къыгъэлъэгъуагъ. Мы гъэхъэгъэшIухэр тиIагъэх, ау джыри тыздэлэжьэн фэе лъэныкъохэр къэнагъэх. Ахэм ащыщых сымаджэхэм IэпыIэгъу ягъэкIыгъэныр, IофышIэ ныбжьыкIэхэр гъэсэгъэнхэр ыкIи зэдэлэжьэныгъэм хэгъэхъогъэныр. ЗэкIэми тыадыг, пшъэрылъэу тиIэри зэхэтэшIэ. Непэрэ Iофтхьабзэм гъэхъэгъакIэхэм тафищэнэу тэгугъэ, — къыIуагъ Агъырбэ Юрэ.
Адыгэ Республикэм и ЛIышъхьэ ыцIэкIэ АР-м псауныгъэр къэухъумэгъэ­нымкIэ иминистрэу Мэрэтыкъо Рустем Iофтхьабзэм хэлажьэхэрэм шIуфэс къа­рихыгъ. Охътэ кIэкIэу Iоф зэрашIэрэм шъолъырым конференцие пчъагъэ зэрэщызэхащагъэр, зэдэлэжьэныгъэр лъагъэ­кIотэнэу шъолъырым ихэбзэ къулыкъу­хэр зэрэщыгугъыхэрэр ащ къыIуагъ.
Нэужым Жанна Семеновам 2024-рэ илъэсым медицинэм хэхъоныгъэу ышIыгъэхэм, социальнэ гухэлъхэм, специалистхэм яшIэныгъэхэм ахэгъэхъогъэнымкIэ, шъолъыр зэзэгъыныгъэмкIэ ыкIи научнэ IофшIэнымкIэ зэшIуахыгъэхэм къатегущыIагъ.

Организацие ныбжьыкIэм ихэхъоныгъэхэм ащыщ хэтхэм япчъагъэ нахьыбэ зэрэхъугъэр. Врач 58-рэ хъущтыгъэхэмэ, джы 250-м нэсыгъ. Ахэм Санкт-Петербург, Волгоград, Краснодар, Ессентуки ыкIи Германием щыщхэр ахэтых. Тишъо­лъыр щыщ врач 199-мэ Москва ыкIи нэмыкI чIыпIэхэм ащыIэ клиникэ анахь дэгъухэм Iоф ащашIэ. «Врачхэм я Хасэ» Къэбэртэе-Бэлъкъарым, Къэрэщэе-Черкесым защиушъомбгъуным пае шIэгъэн фаехэм джащ фэдэу атегущыIагъэх.
Мы илъэсым врачхэм операцие хьылъэхэр ашIыхэу хъугъэ. ГущыIэм пае, Урысыем апэрэу зыфэдэ къэмыхъугъэ роботическэ операцие клиникэу К+31-м ПщыхьэкIэ Ахьмэдхъан щишIыгъ. Илъэс 74-рэ зыныбжь хъулъфыгъэр зы наркозкIэ Iэдэбз уз пчъагъэ къызэлъызыубытырэ операцие ашIыгъ, ипсауныгъэ къызэтырагъэнэжьыгъ.
2025-рэ илъэсым ашIэщтхэм зэхэсыгъом хэлэжьагъэхэр щатегущыIагъэх. Ахэм ащыщ шIэныгъэ ыкIи гъэсэныгъэ Iофтхьэбзэ зэфэшъхьафхэм язэхэщэн, джащ фэдэу социальнэ мэхьанэ зиIэ Iофыгъохэм язэшIохын. Илъэсым къыкIоцI медицинэм илIыкIохэр гуманитар, шIушIэ ыкIи гъэсэныгъэ программэхэм язэхэщэн дэлэжьэнхэу агъэнафэ. Лъэныкъо шъхьаIэу агъэнэфагъэхэм ащыщых медицинэм иIофышIэхэм зэпхыныгъэ яIэу зэдэлэжьэнхэр, медицинэ гъэсэныгъэм исистемэ хэхъоныгъэхэр ышIынхэр, нэмыкIхэри.
Мыекъопэ къэралыгъо технологическэ
университетым ипресс-къулыкъу.
Сурэтхэр: МКъТУ.