Урысые политическэ партиеу «Единэ Россием» общественнэ Iэпы­Iэгъу етыгъэнымкIэ Штабым Адыгеим и ЛIышъхьэу, партием ишъо­лъыр къутамэ и Секретарэу КъумпIыл Мурат цIыфхэр щыригъэ­блэгъагъэх.

ЛъэIу тхылъхэмкIэ закъы­фэзыгъэзагъэхэм яIофыгъохэм къалэу Мыекъуапэ, Мыекъопэ, Шэуджэн ыкIи Джэджэ районхэм япащэхэр хэлажьэхэзэ атегущыIагъэх.
ПсэупIэу Ханскэм иурамэу Веселэм транспортыр зэрыкIорэ игъогу гъэцэкIэжьыгъэным фэгъэхьыгъагъ лъэIу тхылъхэм яз. Къалэу Мыекъуапэ имэрэу Геннадий Митрофановым къызэриIуагъэмкIэ, километри 2-м ехъурэ а гъогу Iахьыр 2025-рэ илъэсымкIэ Iофтхьабзэу зэ­шIуахыщтхэм ахагъэхьагъ. Мыщ кэнаухэр щагъэкъэбзэнхэу, псырыкIуапIэхэр щызэблахъунхэу, гъогум ищыкIэгъэ гъэтэ­рэзыжьынхэр фашIынхэу ра­хъухьагъ.
КъумпIыл Мурат къэлэ ад­министрацием ипащэ пшъэрылъ фишIыгъ IофшIэнхэр ­игъом ыкIи дэгъоу гъэцэкIагъэ хъунхэм лъыплъэнэу. Анахьэу анаIэ зытырадзагъэр псэупIэм дэт социальнэ псэуалъэхэр гъэ­кIэжьыгъэнхэр ыкIи цIыфхэм ящыIакIэ джыри нахь зыкъе­гъэ­IэтыгъэнымкIэ ащ щыпсэу­хэрэм игъоу алъэгъухэрэм аде­гъэштэ­гъэныр ары.
Къутырэу Северо-Восточные Сады щыпсэурэ бзылъ­фыгъэр къыкIэлъэIугъ урамэу Энгельсым ыцIэ зыхьырэм илъэсрыкIо гъогу зэтырагъэ­псы­хьанэу. Мыекъопэ районым ипащэу Михаил Марьиным къы­зэриIуагъэмкIэ, урамэу Эн­гельсым (урамэу Маяковскэм къыщыублагъэу Индустриальнэм нэсэу) игъэкIотыгъэ гъэцэкIэжьынхэр щызэшIохыгъэнхэмкIэ проект-сметэ тхылъхэр агъэхьазырыгъахэх. Республикэ ыкIи муниципальнэ бюджетхэм къахагъэкIыгъэ ахъщэр илъэсэу къихьащтым гъэмафэм ехъу­лIэу агъэфедэщт.
Республикэм и ЛIышъхьэ анахьэу анаIэ зытыраригъэ­дзагъэр бюджет мылъкур нахь шIогъэ ин хэлъэу гъэфедэгъэным, подрядчикхэм пшъэрылъ зыфашIыжьыгъэхэр тэрэзэу гъэ­­цэкIэгъэнхэм мэхьанэшхо зэряIэр ары.
Ащ къыкIэлъыкIорэ лъэIу тхылъыр зыфэгъэхьыгъагъэр къутырэу Тихоновым псыры­кIуапIэ щышIыгъэныр ары. Шэу­джэн районым ипащэу Аулъэ Рэщыдэ къызэриIуагъэмкIэ, къэралыгъо программэу «Къуа­джэхэм зэдиштэу хэхъоныгъэ ягъэшIыгъэныр» зыфиIорэм иа 1-рэ чэзыу къыдыхэлъытагъэу километрэ 15-м ехъу зикIыхьэгъэ псырыкIуапIэхэр цIыф псэупIэ заулэхэм ащашIыгъ, ахэм ащыщ къутырэу Тихоноври. Федеральнэ программэу «Псы къабзэр» зыфиIорэм къыдыхэлъытагъэу IофшIэнхэм яятIонэрэ чэзыу ублагъэ хъугъэ. Къэралыгъо экспер­тизэми псыIыгъыпIитIумэ яшIын зэфэхьысыжь тэрэз къыфишIыгъ.
Мы Iофтхьабзэм икIэухым КъумпIыл Мурат ригъэблэгъагъ псэупIэу Джаджэм щыщ хъулъфыгъэр. Ар зыгъэгумэкIырэр урамэу Рабочэм (урамэу Горькэм къыщыу­благъэу Гупчэ район сымэджэщым нэсэу) автомобиль гъогу зэтегъэпсыхьэгъэным иIофыгъу. Джэджэ районым ипащэу Андрей Таранухиным къызэриIуа­гъэмкIэ, къэралыгъо программэу «Къуа­джэхэм зэдиштэу хэхъоныгъэ ягъэшIыгъэ­ныр» зыфиIорэм тегъэпсыхьагъэу зы ки­лометрэ фэдиз хъурэ гъогу Iахьым игъэцэкIэжьын макIо. Ащ пэIухьащт мылъкури къагъотыгъ, лъэс­рыкIо гъогухэм, сымэджэщым дэжь транспортыр зыдэщытыщт чIыпIэм язэтегъэ­псыхьан, урамхэр тэрэзэу къэгъэнэфы­гъэнхэм япхыгъэ Iоф­шIэнхэр къихьащт илъэсым Iоныгъом нэс аухынхэу мэгугъэх.
Республикэм щыпсэурэ цIыфхэм ягумэкIыгъоу къарахьылIагъэхэм япхыгъэу АР-м и ЛIышъхьэ унэшъо гъэнэфагъэхэр афи­шIыгъ. КъумпIыл Мурат зэIукIэгъум илъэ­хъан цIыфэу къеолIагъэхэм упчIэхэр ари­тыгъэх социальнэ, гъэсэныгъэ ыкIи медицинэ лъэныкъохэм япхыгъэ инфраструктурэм Iоф зэришIэрэм еплъыкIэу фыряIэмкIэ. Ащ къызэрэхигъэщыгъэмкIэ, зэхъокIыныгъэшIухэм а чIыпIэхэм ащыпсэухэрэри чанэу ахэлэжьэнхэ фае, къэбзэныгъэм анаIэ тырагъэтыным, япсэупIэхэр тапэкIи зыфэдэ хъущтхэм ныбжьыкIэхэр ягупшы­сэнхэу, афэгумэкIынхэу гъэсэгъэнхэм мэ­хьанэшхо зэриIэри къыкIигъэтхъыгъ.
«ЧIыпIэхэм ащыпсэухэрэм чаныгъэ къызхагъэфэн фае. Арэущтэу щымытмэ, зыпари нахьышIум ылъэныкъокIэ зэблэтхъун тлъэкIыщтэп. Тыкъэзыуцухьэрэ дунаир нахьышIу, нахь дахэ хъунымкIэ ежь цIыфхэми яшIоигъоныгъэ мэхьанэшхо иI. Тэри тыфэхьазыр тфэлъэкIыщтыр дгъэцэкIэным, чэзыу-чэзыоу проектэу итхъухьагъэхэр щыIэныгъэм пхырытэщых, ахэр цIыфхэм яеплъыкIэхэм, игъоу алъэгъухэрэм япхыгъэх», — къыIуагъ КъумпIыл Мурат.