Адыгеим и ЛIышъ­хьэу КъумпIыл Мурат пшъэрылъ къызэрэфишIыгъэм тетэу АР-м иминист­рэхэм я Кабинет и Тхьаматэ игуадзэу, финансхэмкIэ ми­нистрэу Виктор Ор­ловым республикэм имуниципалитетхэм яеджапIэхэм автобус 11 аритыгъ.

Iофтхьабзэм хэлэжьагъэх АР-м гъэсэныгъэмрэ шIэныгъэмрэкIэ иминистрэу Евгений Лебедевыр, гъэсэныгъэмкIэ район гъэIорышIапIэхэм, еджапIэхэм ялIыкIохэр.
Непэ аратыгъэхэр хэмытхэу, муниципальнэ образованиехэм яеджапIэхэм автобусым 102-рэ зэрагъэфедэрэр Виктор Орловым къыхигъэщыгъ. Урысыем и Правительствэ иунашъо диштэу ахэр рес­публикэм къыIэкIагъахьэх.
ГъэсэныгъэмкIэ инфраструктурэм изытет нахьышIу шIыгъэнымкIэ Iофышхо Адыгеим зэрэщагъэцакIэрэр ащ къыхигъэ­щыгъ: мыгъэ еджэпIи 3 атыгъ, илъэсыр имыкIызэ джыри еджэпIи 3 агъэпсыщт. Непэрэ мафэм ехъулIэу еджэпIэ 20 агъэ­цэкIэжьыгъ, къихьащт илъэсым джыри еджэпIи 7-мэ гъэцэкIэжьын IофшIэнхэр арашIылIэнхэу рахъухьэ. Урысыем и Президентэу Владимир Путиным иунашъо диштэу къихьащт илъэсым кIэлэцIыкIу IыгъыпIэхэр тихэгъэгу щагъэцэкIэжьхэу рагъэжьэщт. АщкIэ Адыгеим илъэIу тхылъхэр гъэсэныгъэмкIэ Министерствэм IэкIигъэхьагъэх.
ЕджапIэхэм яавтобусхэу агъэкIэжьыгъэ­хэр джырэ шапхъэхэм зэрадиштэрэр, видео­камерэхэр зэрарытхэр, системэу ГЛОНАСС зэращыгъэфедагъэр шъугу къэ­тэгъэкIыжьы. КIэлэеджакIохэм ящынэгъон­чъагъэ фэIорышIэрэ оборудованиер автобусыкIэхэм арыт.
Адыгэкъалэ, Кощхьэблэ, Шэуджэн районхэм яеджапIэхэм автобус зырыз аратыгъ. Красногвардейскэ районым — ­автобуситIу, Мыекъопэ, Тэхъутэмыкъое районхэм автобус щырыщ аIукIэщт. «ГАЗ-м» нэбгырэ 16 — 22-рэ, «ПАЗ-м», «КАВЗ-м» нэбгырэ 31 — 34-рэ арэфэ.