Адыгеим ихъызмэтшIапIэу «Станконормалым» илъэс 30-м ехъурэ ипэщагъэу АфэшIыжь Джэмал идунай ыхъо­жьыгъ. Ащ ыныбжь илъэс 92-м итыгъ.
АфэшIыжь Джэмал Рос­тов-на-Дону къыщыхъугъ. МэшIокугъогу транспортымкIэ институтыр къыухи Адыгеим Iоф ышIэнэу къэкIогъагъ. Мас­терэу, конструкторэу, ин­женер шъхьаIэу хъызмэтшIэпIэ зэфэшъхьафхэм ащы­лэжьагъ. Партийнэ еджапIэр Москва къыщиухи партием и Хэку комитет иинструкторэу Iоф ышIагъ. ХъызмэтшIапIэу «Станконормалым» лъапсэ фэхъугъэ механическэ заводым ипэщагъ. Станокхэм яшIын СССР-м зыщыжъотыгъэ лъэхъаным «Станконормалым» къыдигъэкIыщтыгъэм уасэ иIагъ, къэралыгъом ишъолъыр зэфэшъхьафхэм ар анэсыным хъызмэтшIапIэм пэщэныгъэ дызэрехьэфэ АфэшIыжь Джэмал фэлэ­жьагъ, шъолъырым ыцIэ ра­ри­гъэIуагъ.
ХъызмэтшIапIэм иIофы­шIэхэм пащэр афэгумэкIыщтыгъ, фэтэрыбэ хъурэ унэ­хэр, кIэлэцIыкIу IыгъыпIэхэр заводым щылажьэхэрэм апае IофшIапIэм пэмычыжьэу аригъэшIыгъагъэх. Джащ фэдэу хъызмэтшIапIэм шхапIэрэ IэзапIэрэ харигъэшIыхьэгъагъ, почтэр, тучаныр, сберкассэр, парикмахерскэр заводыр зытет чIыпIэм щылажьэщтыгъэх — пстэури Iэрыфэгъуным фытегъэпсыхьэгъагъ. АфэшIыжь Джэмал къэлэ дэкIыгъом щаригъэшIыгъэгъэ гъэфэбапIэм хэтэрыкIхэр къыщагъэкIыщтыгъэх, ахэр нахь пыутэу заводым иIофышIэхэм ащэфын алъэ­-
кIы­щтыгъ. Заводыр къэлэ хъыз­мэтым IэпыIэгъу фэхъу­щтыгъ.
ШIэныгъэхэмкIэ академиеу Москва дэтым АфэшIыжь Джэмал диссертациер къыщигъэшъыпкъэжьи экономикэ шIэныгъэхэмкIэ кандидат хъугъагъэ.
АфэшIыжь Джэмал къэлэ советым идепутатыгъ, пар­тием ихэку комитет щылэ­жьагъ. Пэщэныгъэ зыдызэрихьэгъэ заводыр тишъолъыр къыдэгъэкIыжьын хъызмэтымкIэ анахь пэрытхэм ащыщ ышIын ылъэкIыгъ.
Iофэу ышIагъэм къэралыгъом осэшIу къыфишIыгъ. — Быракъ Плъыжьым иорден, орденэу «Щытхъум и Тамыгъ» зыфиIорэр къыфагъэшъошагъэх.
Тхьэм джэнэт лъапIэр къырет.