Гъэсэныгъэм ылъэны­къокIэ IэпэIэсэныгъэу яIэр къызщагъэлъэгъогъэ республикэ ыкIи федеральнэ зэнэкъокъухэм щатекIуагъэхэм Адыгеим и ЛIышъхьэу КъумпIыл Мурат тыгъуасэ зэIукIэгъу адыриIагъ.

Республикэм и ЛIышъхьэ кIэлэегъаджэхэмрэ кIэлэпIу­хэмрэ афэгушIуагъ зэнэкъо­къухэм къащагъэлъэгъогъэ гъэ­хъагъэхэм апае. IэпэIэсэ­ныгъэу ыкIи къулаиныгъэу яIэм хагъэхъоным ахэр ренэу зэ­рэдэлажьэхэрэм ишыхьатых а текIоныгъэхэр.
«Сэнаущыгъэ зыхэлъ, зиIоф­шIэн дэгъоу зыгъэцэкIэрэ, зы­фэгъэзагъэм ишъыпкъэу дэлэ­жьэрэ кIэлэегъаджэу респуб­ликэм исыр зэрэбэр сигуапэ. ШъупIухэрэм, ежъугъаджэхэрэм, шъуиIофшIэгъухэм щысэшIу яшъогъэлъэгъу, шъуисэнэхьат имэхьанэ нахь къэшъоIэты. Зэ­нэ­къокъухэу яIэпэIэсэныгъэ къызщагъэлъагъохэрэм пшъэ­рылъыбэ къыдалъытэ. ЯшIэныгъэхэм джыри нахь ахагъэхъоным кIагъэгушIух, IофшIэкIэшIоу аIэкIэлъымкIэ нэмыкIхэм яхъо­жьынхэм пае амалыкIэхэр къа­ратых, кIэлэегъэджэ сэнэхьатыр анахь мэхьанэшхо зиIэхэм зэращыщыр къагъэнафэ.
Непэ зиIоф хэшIыкIышхо фы­зиIэ ыкIи зисэнэхьат фэшъыпкъэ кIэлэегъаджэхэр лъэшэу тищыкIагъэх. Хэгъэгум и Президентэу Владимир Путиным пшъэ­ры­лъэу къыгъэуцурэм тетэу Урысыем итехнологическэ суверенитет дгъэпытэн, эконо­ми­кэм пае IофышIэхэр дгъэхьазырынхэ фае. Ар къыддэхъуным фэшI ежь кIэлэегъаджэхэми шIэныгъэ куурэ IэпэIэсэныгъэрэ ахэмылъ хъущтэп», — къы­Iуагъ АР-м и ЛIышъхьэ.
КъумпIыл Мурат къызэрэхигъэщыгъэмкIэ, Адыгеим икIэлэцIыкIухэмрэ иныбжьыкIэхэмрэ зыкъызэIуахынымкIэ респуб­ли­кэм ипащэхэм афэлъэкIыщтыр зэкIэ ашIэ.
«Адыгеим джырэ уахътэм диштэу гъэсэныгъэр щызэхэщэгъэным тишъыпкъэу тыдэлажьэ. Тэ тэгъэфедэх лъэпкъ проектхэмрэ къэралыгъо программэхэмрэ зылъапсэу щыт амал зэфэшъхьафхэр. Илъэс къэс еджэпIакIэхэр ыкIи кIэлэцIыкIу IыгъыпIэхэр тэшIых, тэгъэкIэ­жьых, инновационнэ гупчакIэ­хэр, кIэлэцIыкIу модельнэ тхылъ­еджапIэхэр тэгъэпсых», — къыIуагъ республикэм и ЛIышъхьэ.
Мы илъэсым Тэхъутэмыкъое районым нэбгырэ 2450-м ате­лъытэгъэ еджэпIищ къыщы-­
зэ­Iуахыгъ. Джыри ащ фэдиз кIэлэ­еджакIо зычIэфэщт еджэпIищ агъэпсы.
Гурыт сэнэхьат гъэсэныгъэм ылъэныкъокIэ Iоф зышIэщтхэм ягъэхьазырын иинфраструкту-
ри агъэкIэжьы. РеспубликэмкIэ анахь мэхьанэшхо зиIэ лъэныкъохэм ащылэжьэщтхэм япхыгъэ Iофыгъом изэшIохын телъытагъэу федеральнэ амалыкIэхэри агъэфедэх. Федеральнэ проектэу «Профессионалитет» зыфи­Iорэм ишIуагъэкIэ гурыт зве­нэм пае Iоф зышIэщтхэр зыщагъэ­хьазырхэрэ гъэсэныгъэ гупчитIу Адыгеим щызэхащагъ: апэрэр АР-м зекIонымкIэ ыкIи фэIо-фашIэхэм ягъэцэкIэнкIэ Адыгэ къэралыгъо университетым щызэхащэгъэ гупчэр, ятIонэрэр гъэсэныгъэм фытегъэпсы­хьэгъэ медицинэ кластерэу «ПрофиМед» зыфиIоу Мыекъопэ къэралыгъо технологи­ческэ университетым Iоф щызышIэрэр ары.
«КъыткIэхъухьэхэрэр цIы­фыгъэ шэпхъэ дахэхэм ары­гъо­зэнхэм, яхэгъэгу фэшъып­къэн­хэм, кIэлэцIыкIухэмрэ ныб­жьы­кIэхэмрэ Урысыем щыпсэурэ цIыф лъэпкъхэр зэзыпхырэ хэ­бзэшIухэм афэпIугъэнхэм мэхьанэшхо етэты. Къэралыгъо политикэм къыгъэуцурэ пшъэ­рылъ шъхьаIэхэм непэкIэ ар ащыщ. Гъэсэныгъэм исыд фэ­дэрэ чэзыукIи кIэлэегъэджэ-­гъэсакIохэм мэхьанэу яIэр ины. Республикэм гъэсэныгъэмкIэ и Министерствэрэ Адыгеим иегъэ­джэкIо-гъэсакIохэмрэ а лъэ­ныкъом лъэшэу анаIэ тырагъэтын фае», — къыIуагъ АР-м и ЛIышъхьэ.
КъумпIыл Мурат къызэрэхигъэщыгъэмкIэ, гъэсэныгъэ зыща­рагъэгъотырэ гупчакIэхэр
тиIэ зэрэхъугъэхэм елъытыгъэу егъэджэн-пIуныгъэр нахь лъэгэ­пIэ иным тещэгъэн фае, а Iофыр лъэныкъо пстэумкIи нахьышIоу зэхэщэгъэным пае ухьазы­рыныгъэ дэгъу зиIэ IофышIэхэр тищыкIагъэх. IофышIэ ныбжьыкIэхэр нахь чанэу а Iофым къы­хэгъэлэжьэгъэнхэм пае Iоф­тхьэбзабэ зэшIохыгъэ мэхъу, кIэлэегъаджэхэм яIэпэ­Iэсэныгъэ зыкъегъэIэтыгъэнми нахь игъэ­кIотыгъэу дэлэжьэгъэн фае.
«ТикIэлэегъаджэхэр чанэу ащ фэдэ Iофтхьабзэхэм зэра­хэлажьэхэрэр, республикэ ыкIи федеральнэ чэзыухэм зэра­щатекIохэрэр, апэрэ чIыпIэхэр къызэращыдахыхэрэр тигуап. Сомэ мин 200 хъурэ федеральнэ шIухьафтыныр мы илъэсым Адыгеим иегъэджэкIо-гъэсэкIуи 5-мэ къафагъэшъошагъ, рес­публикэ шIухьафтынэу сомэ мин 50 хъурэр — нэбгыри 6-мэ. Непэ тафэгушIо сэнаущыгъэ зыхэлъ тичIыпIэгъухэу урысые зэнэкъокъухэм гъэхъагъэхэр ащызышIыгъэхэм», — къыIуагъ республикэм и ЛIышъхьэ.
Ащ нэужым шIухьафтынхэр аратыжьыгъэх. Гъэсэныгъэм ылъэныкъокIэ гъэхъагъэу яIэхэм апае Адыгеим и ЛIышъхьэ и Рэзэныгъэ тхылъ зыфагъэшъошагъэхэр: къалэу МыекъуапэкIэ гурыт еджапIэу N 7-м урысы­бзэмрэ литературэмрэкIэ икIэлэегъаджэу, Урысые зэнэкъо­къоу «Урысыем илъэсымкIэ икIэлэегъэджэ анахь дэгъу» зы­фиIорэм щатекIуагъэу Светлана Великовар; Е. Л. Шварц ыцIэкIэ щыт Мыекъопэ гимназиеу N 5-м икIэлэегъэджэ-психологэу, Урысые зэнэкъокъоу «Урысыем икIэлэегъэджэ-психолог анахь дэгъу» зыфиIорэм шIухьафтын къызыфагъэшъошэгъэ Анна Мельниковар; Кощ­хьэблэ районымкIэ селоу Натырбые дэт кIэлэцIыкIу IыгъыпIэу N 14-м икIэлэпIоу, тхылъ тедзапIэу «КIэлэцIыкIу лите­ратурэр» зыфиIорэм ишIухьафтын гъэнэфагъэ федеральнэ чэзыум къыщыдэзыхыгъэ Светлана Мищенкэр; Хъу. Б. Андыр­хъуаем ыцIэкIэ щыт Адыгэ кIэ­лэегъэджэ колледжым икIэлэегъаджэу, Урысые зэнэкъо­къоу «Мастер года» зыфиIорэм ифедеральнэ чэзыу илъэны­къохэм ащыщэу «Призвание» зыфиIорэм ишIухьафтын къызфа­гъэшъошэгъэ Раиса Рубилкинар.
Ащ нэужым зэдэгущыIэгъоу щыIагъэм кIэлэегъаджэхэм къы­щаIуагъ республикэм и ЛIышъхьэ гъэсэныгъэм хэхъоныгъэ егъэшIыгъэнымкIэ IэпыIэгъу къы­зэрафэхъурэм пае зэрэфэразэхэр, анахь зыгъэгумэкIырэ Iофыгъохэми ахэр атегущыIа­гъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.