Адыгэ Республикэм и Общест­веннэ палатэ зичэзыу зэхэсы­гъоу бэмышIэу иIагъэм 2023 — 2024-рэ илъэсхэм граждан ­обществэм хэхъоныгъэ ышIынымкIэ мысатыу организациеу социальнэ Iофтхьабзэхэр зезы­хьэхэрэм (СОНКО) грант Iэпы­Iэгъу ягъэгъотыгъэнымкIэ зэ­нэкъокъум изэфэхьысыжьхэм щатегущыIагъэх.

Iофтхьабзэм хэлэжьагъэх АР-м и Къэ­ралыгъо Совет — Хасэм идепутатэу, Урысыем и ЛIыхъужъэу Цэй Эдуард, IофшIэнымкIэ ыкIи социальнэ хэхъоны­гъэмкIэ министрэм игуадзэу Даур Руслъан, мысатыу организациехэм ялIыкIохэр.
АР-м и Общественнэ палатэ и Тхьаматэу Устэ Руслъан зэхэсыгъор къызэ­Iуихыгъ, Ащ къызэриIуагъэмкIэ, мысатыу организациеу социальнэ Iофтхьабзэхэр зезыхьэхэрэм республикэ бюд­жетым къикIэу грант IэпыIэгъоу арагъэгъотыгъэм ишIуагъэкIэ мы аужырэ илъэсхэм республикэм хэхъоныгъэ ышIыным граж­дан обществэм иинститутхэм яIахьышIу халъхьэ.
— Мысатыу организациехэмрэ хэбзэ къулыкъухэмрэ зэрэзэдэлажьэхэрэм ишIуагъэкIэ общественнэ гукъэкIхэм, шъолъырым исоциальнэ-экономикэ зытет, цIыфхэм ящыIэкIэ-псэукIэ хэхъоныгъэ ашIы, — хигъэунэфыкIыгъ Устэ Руслъан.
АР-м IофшIэнымрэ социальнэ хэхъоныгъэмрэкIэ иминистрэ игуадзэу Даур Руслъан зэхэсыгъом къызэрэщиIуагъэмкIэ, мысатыу организациехэм грант IэпыIэгъу ягъэгъотыгъэнымкIэ бюджетым къыщыдалъытэрэм илъэс къэс хагъахъо. 2023-рэ илъэсым ар сомэ миллион 30-м фэдизыгъэмэ, 2024-м — сомэ миллион 44,7-м нагъэсыгъ. Адыгэ Республикэм ибюджетрэ Президент грантхэм я Фонд­рэ ямылъку ахэр къыхагъэкIыгъэх.
— Джащ фэдэу СОНКО-м проектэу къырахьылIэхэрэм япчъагъи хэхъуагъ. 2023-рэ илъэсым мысатыу организацие 41-мэ лъэIу тхылъ къатыгъагъ, ахэм ащы­щэу 33-р зэнэкъокъум пхырыкIыгъ. Мыгъэ лъэIу тхылъ 53-рэ къатыгъ, зэкIэри зэнэкъокъум пхырыкIыгъэх, ау текIоныгъэр къыдэзыхыгъэр проект 37-р ары, — къыхигъэщыгъ Даур Руслъан.
Министрэм игуадзэ къызэриIуагъэмкIэ, 2024-рэ илъэсым «Граждан обществэм хэхъоныгъэ ышIынымкIэ грантхэм яопе­ратор» зыфиIорэр агъэпсыгъ. Грант зэнэкъокъухэр регъэкIокIыгъэнхэм, про­ектхэр пхырыщыгъэнхэм, общественнэ шIошIхэр угъоигъэнхэм ар алъыплъэщт. Сайтэу адыгея. гранты.рф зыфиIорэм грантхэр зэрагъэфедэщтхэ шIыкIэм нэ­Iуасэ зыщыфашIын алъэкIыщт.
Общественнэ палатэм ипащэ игуадзэу Анна Крюковам зэрэхигъэунэфы­кIы­гъэмкIэ, СОНКО-м ялIыкIохэу грант зэ­нэкъокъухэм къахэлажьэхэрэм янахьыбэр республикэм имуниципальнэ об­разованиехэм ащыщыгъэхэмэ на­хьышIугъ.
Джащ фэдэу зэхэсыгъом зыщытегущы­Iагъэхэм ащыщ грант проектхэр пхыращыхэ зыхъукIэ ямэхьанэ зыкъегъэIэтыгъэным фэшI общественнэ организа­циехэм ялIыкIохэр нахьыбэу къыхагъэлэжьэнхэр.
Iэшъынэ Сусан.