ЗипсауныгъэкIэ щыкIагъэ зиIэхэу Адыгэ Республикэм ишIухьаф­тынхэр зыфагъэшъошагъэхэр АР-м и Правительствэ иунэ щагъэ­шIуагъэх. Адыгеим и ЛIышъхьэу КъумпIыл Мурат ащ фэгъэхьыгъэ Iофтхьабзэр зэрищагъ.

ЗэIукIэгъур къызэIуихызэ республикэм и ЛIышъхьэ къызэрэхигъэщыгъэмкIэ, шIухьафтыныр зэратыщт нэбгырэ пэпчъ узыфырикъужьын, уицыхьэ зы­телъыжьын зэрэфаемкIэ щысэ къегъэлъагъо. Къиныгъохэр ахэм зэрэщагъэзыехэрэм имызакъоу, гъэхъагъэхэри ашIых, теубытагъэ зыхэлъ, зыщыгугъы­жьырэ цIыфхэмкIэ пэрыохъу­ныгъэхэр зэрэщымыIэхэр ахэм къагъэлъагъо.
«Анахьэу сигуапэр шIухьафтынхэр зыфагъэшъуашэхэрэм ныбжьыкIэхэр зэрахэтхэр ары. Чаныгъэ, теубытагъэ, сэнаущыгъэ шъухэлъэу, шъуныбжьыкIэ нахь мышIэми, мурадэу шъугу ишъуубытагъэм теубытагъэ хэлъэу шъуфэкIо, спортымкIэ, твор­чествэмкIэ, общественнэ IофшIэнымкIэ гъэхъэгъэшIухэри шъошIых. Шъори, непэ мы Iоф­тхьабзэм щагъэшIощт пстэуми тхьашъуегъэпсэу шъосэIо щы­Iэныгъэм чанэу шъузэрэхэла­жьэрэм, обществэм федэ къы­фэшъухьыным шъунаIэ зэрэте­жъугъэтырэм апае. Анахь мэхьанэ зиIэр — нэмыкI цIыфхэми агу къэшъоIэты. Тыжъурэгушхо», — къыIуагъ АР-м и ЛIышъхьэ.
КъумпIыл Мурат къызэрэхигъэщыгъэмкIэ, республикэм зэ­кIэ ищыкIагъэр щызэшIуахы зипсауныгъэкIэ щыкIагъэ зиIэ цIыфхэм къэралыгъом иIэпы­Iэгъу нахь зэхашIэным, об­ществэм хэгъозэнхэм апае. Ащ фэдэ IофшIэным къыхеубытэ хэушъхьафыкIыгъэ дзэ операцием идзэкIолIхэм ыкIи иветеранхэм IэпыIэгъу ятыгъэныр. Сэкъатныгъэ зиIэ хъугъэ дзэ­кIолIхэм ящыкIэгъэ амалхэр арагъэгъотых, медицинэ ыкIи социальнэ IэпыIэгъу афэхъух.
Ащ пае къэралыгъо программэ хэушъхьафыкIыгъэхэм язэшIохын Адыгеим щылъагъэ­кIуатэ. ЗипсауныгъэкIэ пыч зиIэ кIэлэцIыкIухэр зэрыс унагъохэм IэпыIэгъу ятыгъэным епхыгъэ Iофыгъохэри ащ хэхьэх. ЦIыфхэр социальнэу ухъумэгъэнхэмкIэ, IофшIэн ягъэгъотыгъэнымкIэ, ахэм япсауныгъэ гъэпы­тэгъэнымкIэ, культурэм ыкIи спортым, нэмыкI лъэныкъохэм апы­лъынхэмкIэ социальнэ псэуа­лъэхэр бэу афашIых. Ащ дакIоу транспорт ыкIи лъэсрыкIо гъогухэр зэтырагъэпсыхьэх. Муниципалитет пстэуми «социальнэ таксим» икъулыкъу Iоф ащешIэ. Игъом ахъщэ IэпыIэ­гъур, Iэзэгъу уцхэр ятыгъэнхэм, гъэпсэфыпIэхэм, IэзапIэхэм гъэкIогъэнхэм, IофшIапIэхэм аIугъэхьэгъэнхэм хэушъхьафыкIыгъэу анаIэ атырагъэты.
«ЧIыпIэ зыгъэIорышIэжьыным икъулыкъухэм ренэу агу къэсэгъэкIыжьы а Iофыгъохэм лъэшэу анаIэ атырагъэтын зэрэфаер. ХэушъхьафыкIыгъэу къыхэзгъэщынэу сыфай общественнэ организациехэм яIахьэу ащ хашIыхьэрэр. Къэралыгъо пшъэ­рылъхэм язэшIохынкIэ ахэм непэ яшIогъэшхо къэкIо. Ахэм адакIоу мэхьанэшхо зиIэ проектхэм апае субсидиехэр аIэкIэгъэхьэгъэнхэмкIэ сатыу органи­зациехэм зэнэкъокъухэр афызэхэтэщэх. Общественнэ IофышIэ пстэуми инэу сафэраз Адыгеим ихэхъоныгъэ яIахьы­шхо зэрэхашIыхьэрэм пае. ТапэкIи тызэгъусэу ащ фэдэ хэушъхьафыкIыгъэ купхэу тиIэхэм амалыкIэхэр ягъэгъотыгъэнхэм, агукIэ зыдаIыгъ гухэлъхэр нахь икъоу къадэхъунхэм тегъэпсы­хьэгъэ Iофыгъохэр зэшIотхыщтых», — къыIуагъ АР-м и ЛIышъхьэ.
КъумпIыл Мурат къызэрэхигъэщыгъэмкIэ, ащ фэдэ Iоф­шIэныр къэралыгъо политикэм анахь мэхьанэ зэритырэ лъэны­къохэм ащыщыгъ ыкIи арэущтэу къэнэжьы. Президентэу Владимир Путиным игущыIэхэри агу къыгъэкIыжьыгъэх: «Зи­псау­ны­гъэкIэ щыкIагъэ зиIэ цIыфхэм тадэIэпыIэ зыхъукIэ, тэри нахьы­шIу тэхъу; обществэм нахь шъэ­багъэ, гукIэгъу хэлъэу, ыпэ­кIэ лъыкIотэным иамал иIэ мэхъу».
Ащ нэужым шIухьафтынхэр аратыжьыгъэх. Дипломхэмрэ ахъщэ шIухьафтынхэмрэ нэбгыри 9-мэ аIэкIагъэхьажьыгъэх.
Лъэныкъоу «Общественнэ Iоф­шIэным гъэхъагъэу щишIыгъэхэм апае» зыфиIорэмкIэ шIухьафтынхэр зэратыгъэхэр: сэкъатныгъэ зиIэ кIэлэцIыкIухэм янэ-ятэхэм я Урысые обществэ икъутамэу АР-м щыIэм чанэу хэлажьэхэрэм ащыщэу, «Народнэ Фронтым» хэтэу, обществэу «Социальнэ-правовой, культурнэ ыкIи гъэсэныгъэ проектхэм хэхъоныгъэ ягъэшIыгъэным и Гупчэу «Инва-Форум» зыфиIо­рэм ипащэу Элеонора Халатовар, пшъэдэкIыжьэу ыхьырэмкIэ гъунэпкъэ гъэнэфагъэ зиIэ об­ществэу «Зэхэзымыхыхэрэм я Обществэ» зыфиIорэм и Адыгэ шъолъыр къутамэ иветеран организацие итхьаматэу Иван Михайленкэр.
Лъэныкъоу «Физическэ культурэмрэ спортымрэ алъэныкъо­кIэ гъэхъагъэу иIэхэм апае» зы­фиIорэмкIэ шIухьафтынхэр аратыгъэх: еджапIэм чIэсэу Егор Ергиным, дэеу зэхэзыхы­хэрэр ыкIи зымылъэгъухэрэр зыщаIыгъхэ Адыгэ республикэ еджэпIэ-интернатым чIэсэу Ма­рия Притула, Адыгэ къэралыгъо университетым истудентэу Владислав Колесник.
Лъэныкъоу «Техникэмрэ ­лъэпкъ творчествэмрэ алъэ­ныкъокIэ гъэхъагъэу иIэхэм апае» зыфиIорэмкIэ шIухьафтын фагъэшъошагъ МКъТУ-м и Политехническэ колледжэу N 35-м чIэс СтIашъу Маринэ.
Лъэныкъоу «Литературэмрэ искусствэмрэ гъэхъагъэу ащи­шIыгъэхэм апае» зыфиIорэмкIэ шIухьафтынхэр афагъэшъоша­гъэх: лъэпкъ студиеу «Околица» зыфиIорэм иорэдыIоу, хьафизэ­хэм я Урысые обществэ Тэ­хъу­тэмыкъое районымкIэ (псэу­пIэу Яблоновскэр) ибюро хэтэу Любовь Воробьевам, кIэлэцIыкIу сэкъатхэм ыкIи муковис­цидозыр зиIэхэм янэ-ятэхэм яоб­ществэу «Надежда» зыфи­Iорэм хэтэу Юлия Погоре­ловам, гъэсэныгъэ зыщарагъэгъотырэ муниципальнэ къэралыгъо учреждениеу «ЗипсауныгъэкIэ щыкIагъэ зиIэ кIэлэцIыкIухэм яеджапI» зыфиIоу къалэу Мые­къуапэ дэтым щеджэрэ Набэкъо Амир.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет