Адыгеим и ЛIышъхьэу КъумпIыл Мурат Урысые Федерацием илъэпкъ гвардие идзэхэм я Федеральнэ къулыкъу Адыгэ РеспубликэмкIэ и ГъэIорышIапIэ ипащэу Даур Къэплъан республикэм и Правительствэ зычIэт унэм зэIукIэгъу щыдыриIагъ.

Республикэм и ЛIышъхьэ Росгвардием АР-мкIэ и Гъэ­IорышIапIэ ипащэ бэмышIэу Iэ­натIэм зэрэIухьагъэмкIэ фэгушIуагъ, иIофшIэн гъэхъагъэхэр щишIынхэу фэлъэIуагъ.
Адыгеим ихэбзэ къулыкъу­хэмрэ Даур Къэплъан пэщэныгъэ зыдызэрихьэрэ ГъэIоры­шIапIэмрэ дэгъоу зэрэзэдэла­жьэхэрэр республикэм и ЛIы­шъхьэ къыхигъэщыгъ.
«Общественнэ щынэгъончъа­гъэ щыIэнымкIэ, хабзэр амыу­къонымкIэ Росгвардием иIофы­шIэхэм непэ мэхьанэшхо яI. Iа­шэхэр зэрахьанхэу Iизын яты­­гъэным, общественнэ рэ­хьатныгъэмрэ къэралыгъо псэуа­лъэхэмрэ якъэухъумэн, терроризмэм ебэныжьыгъэным япхыгъэ пшъэрылъыбэ ахэм агъэцакIэ. Лъэныкъо пстэуми зэрищыкIагъэм лъыкIахьэу Гъэ­IорышIапIэм Iоф адишIэным, мамырныгъэмрэ зыпкъитыныгъэмрэ якъэухъумэн мэхьанэшхо яIэу сэлъытэ», — къыIуагъ КъумпIыл Мурат.
Росгвардием АР-мкIэ и Гъэ­IорышIапIэ ипащэ республикэм и ЛIышъхьэ якъулыкъу ынаIэ къызэрэтетым фэшI зэрэфэразэр, пшъэрылъэу къыфашIыгъэхэр ыгъэцэкIэнхэм зэрэ­­-
фэ­хьазырыр риIуагъ. Джащ фэдэу ащ зэрэхигъэунэфыкIыгъэмкIэ, ГъэIорышIапIэм иIофышIэхэр цIыфхэм яфедэхэм якъэухъумэн, якъулыкъу пшъэ­рылъхэм ягъэцэкIэн ренэу фэ­хьазырых.
Даур Къэплъан Маек ыкъор 1966-рэ илъэсым къуаджэу Хьакурынэхьаблэ къыщыхъугъ. Ростов дэт юридическэ институтыр 1998-рэ илъэсым, Урысыем хэгъэгу кIоцI IофхэмкIэ
и Министерствэ и Академие 2003-рэ илъэсым къыухыгъэх. Экономикэ шIэныгъэхэмкIэ кандидат, гъэсэныгъэмкIэ Урысые академием иуниверситет кандидат диссертациер къы­щигъэшъыпкъэжьыгъ. 2009-рэ илъэсым къыщегъэжьагъэу 2011-рэ илъэсым нэс Адыгэ Республикэм хэгъэгу кIоцI Iоф­хэмкIэ иминистрэ игуадзэу, мы министерствэм общест­веннэ щынэгъончъагъэмкIэ милицием ипащэу Iоф щишIагъ. Ве­домствэ, къэралыгъо тын 13, «За отличие в охране общест­венного порядка» зыфиIорэ медалыр къыфагъэшъошагъэх. Зэо-зэпэуцужьхэм ахэлэжьагъ. Унагъо иI, кIэлэцIыкIуи 3 епIу.