Гурыт медицинэ IофышIэхэм япчъагъэ хэгъэхъогъэным фэшI Мыекъопэ медицинэ колледжым аштэхэрэр процент 30-кIэ нахьыбэ ашIыгъ.

2023 — 2024-рэ илъэс еджэгъум нэбгырэ 240-м нагъэсыгъ, ащ ыпэкIэ студент 200-м шIокIыщтыгъэп. 2024 — 2025-рэ илъэс еджэгъум республикэ мылъкумкIэ мыщ щырагъаджэрэр нэбгырэ 264-рэ хъугъэ.
Ащ фэшъхьафэу, хэгъэгум иапшъэрэ медицинэ еджапIэхэм зэращыра­гъэ­джэщтхэ квотэхэр атых. Мыекъопэ къэралыгъо тех­нологическэ университетым хэхьэрэ медицинэ ин­ститутым зэзэгъыныгъэу дашIыгъэм елъытыгъэу, джы шъолъырым щылэжьэщт врачхэм янахьыбэр ащ щагъэхьазыры.
Сэнэхьатым уасэу фа­шIырэр къэIэтыгъэным пае гъэ къэс «Илъэсым иврач анахь дэгъу», «Гурыт ыкIи фармацевтическэ гъэсэ­ныгъэ зиIэ специалист анахь дэгъу» зыфиIорэ зэнэкъокъухэр Адыгеим щызэхащэх. 2024-рэ илъэсым Адыгэ Республикэм и ЛIышъхьэ ишIухьафтынэу «Участковэ врач-те­рапевт анахь дэгъу» зыфиIорэр агъэнэфагъ. Къо­джэ псэупIэмэ ащылэжьэрэ медицинэ IофышIэхэм социальнэ IэпIыгъу араты, ахэм ащыщых псэу­пIэ-коммунальнэ фэIо-фашIэмэ апае ыкIи гъогупкIэу атырэ ахъщэр афягъэ­гъэ­зэ­жьы­гъэныр. Программэхэу «Зем­скэ доктор» ыкIи «Земскэ фельдшер» зыфи­IохэрэмкIэ 2024-рэ илъэ­сым зэтыгъо ахъщэ тынхэр врач 31-мэ ыкIи гурыт медицинэ IофышIэ 11-мэ аIэкIагъэхьагъ. Мыгъэ унашъоу ашIыгъэм елъытыгъэу, IэпыIэгъу псынкIэм щылэ­жьэрэ фельдшерхэмрэ во­дительхэмрэ зэтыгъо тынхэр афагъэшъошагъэх.