Гъогухэм якъызэтегъэнэн Адыгеим лъэшэу щыпылъых.

Ащ ишыхьат «Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым ипхырыщын пае аштэгъэ шъолъыр проектэу гъогу хъызмэтым изегъэушъомбгъун фытегъэпсы­хьагъэм къыдыхэлъытагъэу хьы­лъэзещэ машинэхэр къэзыщэчырэ системэхэр зэрагъэуцухэрэр.
Хьылъэзещэ автомашинэхэр зиехэм федэу яIэр нахьыбэ хъуным фэшI шапхъэхэм ашIокIэу аушъэхэу бэрэ къыхэкIы. Ахэм гъогухэм яягъэ арагъэкIы. Шъо­лъыр мэхьанэ зиIэхэм яIыгъын пэIухьэрэр республикэ бюджетым къыхэхыгъэ ахъщ, арышъ, ащ фэдэ хэукъоныгъэхэм цIыфхэм зэрар къафахьы.
Щэчалъэхэм чэщи мафи Iоф ашIэ, хьылъэзещэ автомашинэхэр илыягъэу ушъагъэхэмэ агъэунэфы, хэукъоныгъэр Ространснадзорым занкIэу фагъакIо. ГъогурыкIоныр щынэгъончъэнымкIэ Гупчэм къызэрэщаIуагъэмкIэ, Тэхъутэмыкъое районымкIэ Шапсыгъэ псыIыгъыпIэм инэпкъырэ поселкэу Яблоновскэмрэ азыфагу ащ фэдэ системэу щырагъэжьэгъагъэм ишIын аухыгъ. «Ростелекомыр» ары под­рядчикыр. Псэуалъэм ишIын пстэумкIи сомэ миллион 87,4-рэ пэIухьагъ. Джыри илъэсэу тызхэтыр имыкIызэ зы щэчалъэ Кощ­хьэблэ районым щатIупщыщт.
Шъугу къэдгъэкIыжьын, респуб­ликэм ащ фэдэ пункти 4-мэ Iоф щашIэ. Ахэм ащыщэу тIур Красногвардейскэ, адритIур Джэджэ ыкIи Мыекъопэ районхэм аща­гъэуцугъэх. Ахэм хэукъоныгъэ 467-рэ агъэунэфыгъ. АхъщэкIэ къэплъытэмэ, сомэ миллиони 149,9-рэ мэхъу.
Мыщ фэдэ Iофэу шъолъырым щызэшIуахыхэрэр гъогуры­кIоныр щынэгъончъэным, гъогухэм якъызэтегъэнэн, ахэр зэ­рагъэцэкIэжьыхэрэр нахь макIэ хъуным афытегъэпсыхьагъэх. Хьылъэзещэ автомашинэхэр къэзыщэчырэ пунктэу агъэуцурэ пэпчъ шапхъэхэр зэраукъохэрэр нахь макIэ, ахэр зезыфэхэрэр хьылъэу зэращэщтым ионтэгъугъэ нахь анаIэ теты ешIы.