КъэкIорэ 2025-рэ илъэсым ибюджет ыкIи 2026 — 2027-мкIэ агъэнэфагъэ­хэм афэгъэхьыгъэ хэбзэгъэуцугъэм ипроект гъэтэрэзы­жьынэу фашIыщтхэм зыщатегущыIэгъэхэ игъэкIотыгъэ зэхэсыгъо АР-м и Къэралыгъо Совет — Хасэм бюджет, финанс, хэбзэIахь ыкIи экономикэ ­политикэмкIэ, предпринима­тельствэмкIэ ыкIи IэкIыб зэпхыныгъэ­хэмкIэ икомитет тыгъуасэ иIагъ.

Iофтхьабзэм хэлэжьагъэх Къэралыгъо Советым — Хасэм и Тхьаматэу Владимир Нарожнэр, ащ игуадзэу Цэй Эдуард, АР-м и Правительствэ и Тхьаматэ игуадзэу, финансхэмкIэ министрэу Виктор Орловыр, Парламентым идепутатхэр, нэмыкIхэр. Зэхэсыгъор зэрищагъ республикэ Парламентым и Тхьаматэ игуадзэу, бюджет, финанс, хэбзэIахь ыкIи экономикэ политикэмкIэ, предпри­нимательствэмкIэ ыкIи IэкIыб зэпхыныгъэхэмкIэ комитетым ипащэу Iэщэ Мухьамэд.
Хэбзэгъэуцугъэм ипроектэу ятIонэрэ еджэгъум фагъэхьазыррэм мызы­гъэгум гъэтэрэзыжьын 34-рэ фашIыгъ. Ахэм ащы­щэу 23-мэ Къэралыгъо Советым — Хасэм идепутатхэр кIэщакIо афэ­хъугъэх, адрэхэр АР-м иминистрэхэм я Кабинет къыхилъхьагъэх.
Гъэтэрэзыжьынхэр хэу­шъхьафыкIыгъэ дзэ операцием хэлажьэхэрэм, иветеранхэм, хьыкум системэм, лъэпкъ экономикэмкIэ ушэтынхэм, псы къабзэр, гъэстыныпхъэ шхъуантIэр цIыфхэм аIэ­кIэгъэхьэгъэным, еджапIэхэм, кIэлэцIыкIу Iыгъы­пIэхэм ягъэцэкIэжьын, апэрэ медицинэ IэпыIэ­гъур цIыфхэм игъом ягъэ­гъотыгъэным, спортым зыщыпылъхэ ыкIи псауныгъэр зыщызэтырагъэуцожьырэ псэуалъэхэм щыкIагъэу яIэхэр афэщэфыгъэнхэм, граждан зыухъумэжьыным, чIыпIэхэм язэтегъэпсыхьан, нэмыкI лъэныкъохэм япхыгъэх.
Комитетым хэтхэр гъэ­тэрэзыжьын пэпчъ атегущыIагъэх, зэкIэми ады­ра­гъэштагъ. АхъщэкIэ къэ­пIон зыхъукIэ, ар сомэ миллиарди 9 мэхъу. Гъэтэрэзыжьынхэр зэрэхэтэу 2025-рэ илъэс бюджетым ихахъохэр сомэ миллиард 41,2-рэ, хъарджхэр сомэ миллиард 43,4-рэ хъущтых, сомэ миллиарди 2,2-м щыкIэщтых.
Бюджетым фэгъэхьыгъэ хэбзэгъэуцугъэм ипроект АР-м и Парламент изичэзыу зэхэсыгъо щытегущыIэнхэшъ, ятIонэрэ еджэгъумкIэ аштэнэу къыхалъхьащт.
Джащ фэдэу мы зэхэсыгъом чIыпIэ зыгъэIорышIэжьыпIэхэм дотациеу, субвенциеу афагъэ­кIощтхэм алъэныкъокIэ фитыныгъэу яIэхэм афэгъэхьыгъэ хэбзэгъэуцу­гъэхэм зэхъокIыныгъэу афашIыщтхэм язаконопроектхэм щатегущыIагъэх. Ахэри Парламентым изи­чэзыу зэхэсыгъо къыхалъхьащтых.
ХЪУТ Нэфсэт.