Аущтэу къыщытаIуагъ АР-м псэо­лъэшIынымкIэ, транспортымкIэ, псэупIэ-коммунальнэ ыкIи гъогу хъыз­мэтымкIэ и Ми­нистерствэ уахътэу къихьагъэм ом зэхъокIыныгъэу фэ­хъущтхэм зэрэ­фэ­хьазырхэм тызыкIэупчIэм.

Ащ иотделэу гъогухэм афэгъэзагъэм ипащэу Алексей Будановым тызэрэщигъэгъозагъэмкIэ, кIымэфэ уахътэм шъолъыр мэхьанэ зиIэ гъогухэр агъэкъэбзэнхэм, осыр, мылыр атыратхъунхэм апае техникэ зэфэшъхьа­фэу 144-рэ респуб­ликэм иI. Ахэм ахэтых пшахъор зэбгырызытэ­къурэ маши­нэхэр, грейдерхэр, тракторхэр, нэмыкIхэр.
Ахэм ащыщэу 66-р мы уахътэм хьазыр, адрэхэр гъогухэм ягъэцэкIэжьын ыкIи ягъэкIэжьын фыте­гъэпсыхьэгъэ IофшIэнхэм джырэ уахътэм апылъых, ищыкIагъэ хъумэ, гъэкъэ­бзэнхэми зыфагъэзэн алъэ­кIыщт.
— КIымафэм изыфэ­гъэхьазырын къыдыхэлъы­тагъ автомобиль гъогухэм иутыгъэу яIэхэр, хьылъэзещэ автомашинэхэм зэщагъэкIукIыгъэхэр гъэтэрэзыжьыгъэнхэр, зэщиз шIыжьыгъэнхэр, зыщищыкIагъэм тамыгъэхэр щыгъэуцугъэнхэр, щыгъэтхъы­гъэнхэр, щтыргъукI хъумэ мыцIэлъэгъоным пае пша­хъоу, щыгъоу атетэкъо­гъэн фаехэр гъэтIылъыпIэхэм ящэлIэгъэнхэр. Подрядчикхэм а IофшIэнхэр зэшIуахыгъэх, — къыIуагъ гъогухэм афэгъэзэгъэ отделым ипащэ.
Ащ къызэрэкIигъэтхъыгъэмкIэ, техникэм нэмыкIэу, щтыргъукIым пшэхъо тонн мини 9, щыгъу тонн мини 2 ыкIи ахэр зэхэтэкъуагъэхэу тонн мини 5 фагъэхьазырыгъ. ПэшIорыгъэшъэу зэрагъэунэфыгъэмкIэ, ар икъущт.
Общественнэ транспортыр нахьыбэу зыщызекIо­рэ гъогу­хэр ары анахьэу анаIэ зытырагъэтыщтхэр. Джащ фэдэу Министерс­вэм гъогурыкIоныр щынэ­гъон­чъэнымкIэ Къэра­лыгъо автоинспекцием, ошIэ-дэмышIэ IофхэмкIэ Министерствэм, чIыпIэ зыгъэIорышIэжьынымкIэ къу­лыкъухэм зэпхыныгъэ адыриIэу адэлэжьэщт.
ХЪУТ Нэфсэт.