Республикэу Армением щыщэу, илъэс 32-рэ зыныбжь Тигран Мхитарян Урысыем и Уголовнэ кодекс ия 282.2-рэ статья ия 2-рэ Iахь зигугъу къы­шIырэ бзэджэшIагъэ зэрихьагъэкIэ (экстремист организацием иIофшIэн хэлэжьагъэкIэ) хьыкумым ыгъэмысагъ.

ЩынэгъончъэнымкIэ Фе­деральнэ къулыкъум Адыгэ РеспубликэмкIэ и ГъэIорышIапIэ уплъэкIунэу зэхищагъэхэм апкъ къи­кIыкIэ уголовнэ Iофыр къызэIуахыгъ.
ЩынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ иIофы­шIэ­хэм зэрагъэунэфыгъэмкIэ, Адыгэ Республикэм иучреждениеу пщыныжь зыщарагъэхьырэм щаIыгъызэ, Т. А. Мхитарян ду­нэе движениеу «Арестантское уголовное единство» (АУЭ) зыфиIорэм (Урысые Федерацием и Апшъэрэ хьыкум экстремистскэу ылъытагъэм) зэрэдыригъаштэрэр цIыф­хэм апашъхьэ къыщиIощтыгъ, тыгъуакIохэм зытырагъэуцорэ жъуагъохэм афэдэхэу ыблыпкъ тетхэр аригъэлъэгъущтыгъ, изоляторым исхэр АУЭ-м хищэщтыгъэх, хьапсхэм адэлъ хабзэхэм адыра­гъэштэнэу ахэм агуригъа­Iощтыгъ, къэралыгъо ха­бзэу щыIэм джэгъогъуныгъэ фыриIагъ.
ЩынэгъончъэнымкIэ къулыкъухэм къаIэкIэхьэгъэ оперативнэ-лъыхъон материалхэр IэубытыпIэ къызыфишIыхэзэ, Урысыем и Следственнэ комитет Адыгэ РеспубликэмкIэ иследственнэ гъэIорышIапIэ Урысые Федерацием и Уголовнэ кодекс ия 282.2-рэ статья ия 2-рэ Iахь диштэу Т. А. Мхитарян уголовнэ Iоф къыфызэIуихыгъ.
Мыекъопэ къэлэ хьыкумым Урысые Федерацием и Уголовнэ кодекс ия 282.2-рэ статья ия 2-рэ Iахь зигугъу къышIырэ бзэджэшIагъэ Т. А. Мхитарян зэрихьагъэкIэ ылъы­тагъ, илъэси 2-рэ мэзи 6-рэ хьапс тырилъхьагъ. Хьыкумым унашъоу ыштагъэм хэбзэ кIуачIэ иIэ хъугъэ.
ЩынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ ипресс-къулыкъу