Къоджэ зекIоным зегъэужьыгъэным фэгъэхьыгъэ фестивалэу «Бжыхьэ зыщытхъужь» зыфиIорэмкIэ Теуцожь районым бжыхьэр щагъэкIотэжьыгъ. Гъобэкъое гупчэр зы мафэм ермэлыкъышхо хъугъэм фэдагъ.

Лъэпкъ IэпэIасэхэр, къэшъуакIохэр, орэдыIохэр, пщэрыхьэкIо Iазэхэр, а пстэур зышIогъэшIэгъонэу еплъынэу къэкIуагъэхэр чылэгум щызэрэугъои­гъэх. ЗэрэчъыIэми зэхэщакIохэри хьакIэхэри ыгъэщтагъэхэп. Къэшъуагъэх, чэфыгъэх, IэшIоу шхагъэх, адыгэ ыкIи урыс ­лъэпкъ культурэм, шэн-хабзэхэм нэIуасэ зафашIыгъ. Адыгеим имызакъоу Пшызэ шъолъырым къикIыгъэхэри ащ хэлэжьагъэх. ЗекIо мэхьанэ зиIэ мыщ фэдэ Iофтхьэбзэ иныр Теуцожь районым зэрэщызэхащэрэр апэр, ау ар аужырэ зэрэмыхъущтыр къыхигъэщыгъ Теуцожь районым иадминистрацие ипащэу УдыкIэко Адам.
— ПшIэнэу зытефэрэ тарихъ чIы­пIабэ тирайон ит. ТапэкIэ ахэр зекIо кIуапIэ тшIынхэр тимурад. АщкIэ амалышIухэр тиI, — къыщиIуагъ мэфэкIым районым ипащэ.
МэфэкIым къыдыхэлъытагъэу адыгэ шхыныгъохэмкIэ мастер-класс гъэшIэгъонхэр рагъэкIокIыгъэх. Хьалыжъор, бжъэдыгъу щыпсыр, пIастIэр аупщэрыхьыгъэх, ыпкIэ хэмылъэу мэфэкIым къекIолIагъэхэр ахэм ахагъэIэбагъэх. ЗызгъэшхэкIыгъэхэм зызщаплъыхьан икъуни мэфэкIым щыгъэпсыгъагъ. IэпэIасэхэм якъэгъэлъэгъон рекIокIыгъ, шъхьадж ыгу рихьыгъэр ыщэфынэу амал иIагъ. СурэтышIэ цIэрыIоу Къат Теуцожь иIофшIагъэхэу, культурэм и Унэу зыщыщ къуаджэм дэтыр къэзыгъэдахэхэрэр зэрагъэлъэгъугъэх, адыгэ лъэпкъым иашуг цIэрыIоу Теуцожь Цыгъо имузей ипчъэ­хэр къафызэIуихыгъэх. МэфэкIышхом удж хъураир кIэух дахэ фэхъугъ.

Фестивалым къыдыхэлъытагъэу Гъо­бэкъое модельнэ тхылъеджапIэм чылэм итарихъ фэгъэхьыгъэ Iэнэ хъурае щырекIокIыгъ. Ащ рагъэблэгъагъ биологическэ шIэныгъэхэмкIэ докторэу, профессорэу Iэшъынэ Юныс. Ар къуаджэм щыщ къодыеп, ашуг цIэрыIоу Теуцожь Цыгъо ипхъорэлъф ыкIи тыжъым фэдэу къызщыхъугъэ чылэм ыцIэ дахэкIэ раригъэIуагъ. Гъобэкъуае итарихъ дэгъоу зышIэрэ нэбгыритIу щыIэмэ, Iэшъынэр языр. ТхакIоу, сурэтышIэу, спортсменэу, лэжьэкIо пэрытэу Гъобэкъуае къыдэкIыгъэхэм ацIэхэр къараIуагъэх, ягугъу ашIыгъ, лIэужыкIэхэм арагъэшIагъэх.
Фестивалым икIэщакIох шъолъыр общественнэ зэхахьэу «ЗекIо Адыгеир» зыфиIорэм и Совет итхьаматэу Уджыхъу Юнысрэ мыщ хэтэу Ольга Ивановамрэ. Теуцожь район администрациер ыкIи къоджэдэсхэр ахэм яIэпыIэгъугъэх. Ахэм яхьатыркIэ гуфэбэныгъэшхо хэлъэу фестивалыр рекIокIыгъ. Мыщ фэдэ Iоф­тхьабзэхэм яшIуагъэкIэ республикэм зекIоным зыщеушъомбгъу.
Джэджэ районми бжыхьэр щагъэ­кIотэжьыгъ. «Дышъэ бжыхь» зыфиIорэ мэфэкIыр псэупIэу Гончаркэм дэт дендрологическэ зыгъэпсэфыпIэу П. Букреевым ыцIэ зыхьырэм щыкIуагъ. Егъэджэн зэфэшъхьафхэр, къэгъэлъэгъонхэр, ермэлыкъхэр, зэнэкъокъухэр, джэгунхэр щыкIуагъэх, шхын IэшIухэр къыщекIокIыгъэх.
Анцокъо Ирин.
Сурэтхэр: гъэзетэу
«Теучежские вести».