Сэкъатныгъэ зиIэхэм ыкIи ветеранхэм яIофыгъохэмкIэ Советэу Адыгэ Республикэм и ЛIышъхьэ дэжь щызэхэщагъэм зичэзыу зэхэсыгъо тыгъуасэ иIагъ. Ар зэрищагъ АР-м иминистрэхэм я Кабинет и Тхьаматэу, финансхэмкIэ министрэу Виктор Орловым.

Iофтхьабзэм хэлэжьагъэх АР-м и Къэралыгъо Совет – Хасэм идепутатэу Наталья Широковар, къулыкъу зэфэшъхьафхэм, сэкъатныгъэ зиIэхэм яобщественнэ организациехэу республикэм итхэм ялIыкIохэр.
Пэублэ псалъэкIэ Виктор Орловым зэхэсыгъор къызэIуихызэ, сэкъатныгъэ зиIэхэр нэмыкI цIыфхэм афэдэу псэунхэ амал яIэ хъуныр, ахэм яфитыныгъэ­хэр къэухъумэгъэнхэр анахьэу зылъыплъэхэрэ лъэныкъохэм зэращыщыр, Адыгеим и ЛIышъхьэу КъумпIыл Мурат ежь ышъхьэкIэ а Iофыгъохэм зэралъыплъэрэр къыхигъэщыгъ.
Iофыгъо зэфэшъхьафэу зэхэсыгъом зыщытегущыIагъэхэм ащыщ Хэгъэгу зэошхом хэлэжьагъэхэм ыкIи зэо зэфэшъхьафхэм яветеранхэм Iэзэгъу уцхэр ягъэгъотыгъэныр. Ащ фэгъэхьыгъэу къэгущыIагъ псауныгъэр къэухъумэгъэнымкIэ министрэм игуадзэу Хьагъэудж Марыет.
Ащ къызэриIуагъэмкIэ, фэгъэкIотэн зиIэ купхэм ахэхьэрэ цIыфхэм Iэзэгъу уцхэр къафэщэфыгъэным пэIуагъэхьэгъэ мылъкур, 2023-рэ илъэсым ебгъапшэмэ, мы илъэсым сомэ миллиони 109,9-кIэ нахьыб. А купым хэхьэрэ цIыфхэм ярецептхэр республикэм имедицинэ организацие 23-мэ къащафыратхыкIых, аптекэ 14-мэ къащаратыжьых.
ФэгъэкIотэнхэр зиIэ купхэм Iэзэгъу уцхэр ягъэгъотыгъэным иIофыгъоу къэ­уцухэрэр псынкIэу зэшIохыгъэнымкIэ зытеонхэ алъэкIыщт «линие плъыр» псауныгъэр къэухъумэгъэнымкIэ Министерствэм къыщызэIуахыгъ: (210-234*2033).
Джащ фэдэу зэхэсыгъом зытегущыIагъэхэм ащыщ Урысые общественнэ организациеу «Сэкъатныгъэ зиIэ кIэлэцIыкIухэм ыкIи сэкъатхэу зыныбжь илъэс 18-м шъхьадэкIыгъэхэм янэ-ятэхэм я Урысые организацие» (ВОРДИ) ишъо­лъыр къутамэ иIофшIэн. Ащ ипащэу Анна Рауд къызэриIуагъэмкIэ, грант проектхэм яшIуагъэкIэ кIэлэцIыкIухэу ментальнэ зэщыкъоныгъэхэр зиIэхэм творческэ хэхъоныгъэ ашIынымкIэ ыпкIэ зыхэмылъ Iофтхьабзэхэр афызэхащэнхэ алъэкIы. Ахэр зэщапIурэ унагъохэм IэпыIэгъу афэхъугъэнымкIэ зэрахьэрэ Iофтхьабзэхэми ягугъу къашIыгъ.
Сэкъатныгъэ зиIэхэм азыфагу щызэхащэрэ республикэ зэнэкъокъум илауреат хъугъэхэм афагъэшъошэрэ шIухьафтынхэм къатегущыIагъ АР-м IофшIэнымкIэ ыкIи социальнэ хэхъоныгъэмкIэ иминистрэ игуадзэу Екатерина Леоновар. Мы илъэсым нэбгырэ 28-мэ ятхылъхэр комиссием къырахьылIагъэх. Ахэм ащыщэу анахь дэгъоу алъытэгъэ нэбгыри 10-р къахахыгъ ыкIи рэзэныгъэ тхылъхэм ягъусэу сомэ мин 50 зырыз аратыжьыгъ.
Сэкъатныгъэ зиIэхэм ягумэкIыгъохэр нахьыбэрэ зэрахьылIэу хабзэр общественнэ организациехэр ары. «Сэкъатныгъэ зиIэхэм я Урысые обществэ» АР-мкIэ икъутамэ итхьаматэу Агъыр­жьэнэкъо Симэ, зымылъэгъухэрэм яобщественнэ организацие итхьаматэ ипшъэрылъхэр зыгъэцэкIэрэ Алексей Хлоповыр зыфэгъэзэгъэхэ лъэныкъохэм япхыгъэу щыIэ гумэкIыгъохэр къаIэтыгъэх.
Мыхэм ыкIи нэмыкI Iофыгъоу зыхэплъагъэхэм афэгъэхьыгъэу ищыкIэгъэ унашъохэр аштагъэх.
Iэшъынэ Сусан.