«ЦIыфым ипсауныгъэ амал къыщыкIагъ» пIошъущтэп тигущыIэгъу фэгъэхьыгъэу. Сыда пIомэ ащ узыдэгущыIэкIэ, къыбгурэIо лъэныкъо гъэнэфагъэхэмкIэ иамалхэр, ишIэныгъэхэр, нэмыкIхэм ялъытыгъэмэ, зэрэбэр. Ащ къыпыкIырэ чэфым, нэфым, чаныгъэм къэзыуцухьэхэрэм щысэ тырахы, кIуачIэ къареты. НэIуасэ шъуфэтэшIы поселкэу Яблоновскэм щыщ Любовь Воробьевам.

Ар народнэ студиеу «Околица» зыфиIорэм иорэдыIу, поселкэу Яблоновскэм ицIыф гъэшIуагъ, псэупIэм иветеранхэм я Совет, Тэхъутэмыкъое районымкIэ хьафизэхэм яобществэ ахэт, поселкэм инароднэ депутатхэм я Совет ия 2-рэ зэIугъэкIэгъу идепутатыгъ, общественнэ щыIакIэм чанэу хэлажьэ.
Нэхэм япхыгъэ уз зэхэубытагъэу иIэхэм апкъ къикIыкIэ дэеу ылъэгъу зэрэхъугъэм фэшI я 2-рэ купым хэхьэрэ сэкъатныгъэ Любовь Николай ыпхъум фагъэуцугъ. Зипсауныгъэ пыч фэхъугъэ бзылъфыгъэм щыIэныгъэм зыкъызэрэхигъуатэрэр игуапэу къытфиIотагъ.
— Хьафизэу сыкъэхъугъэп. Джыдэдэм илъэс 73-рэ сыныбжь. ЩыIэныгъэм Iоф­шIэн зэфэшъхьафэу щызгъэцэкIагъэр макIэп. Анахьыбэу сызщылэжьагъэр Краснодар краим хэгъэгу кIоцI IофхэмкIэ къулыкъур ары. Илъэс 25-рэ сахэтыгъэу сынэхэр къызэIыхьэхи, сакъы­хэкIыжьынэу хъугъэ. 1998-рэ илъэсым къыщегъэжьагъэу сэкъатныгъэ зиIэ купхэм сахалъытагъ. Сянэ хьафизэу, дэгоу щытыгъ, сшыпхъуи нэхэм япхыгъэ уз зэфэшъхьафхэр иIагъэх. Сэри нэ уз зэфэшъхьафхэу къысфыкъокIыгъэхэм апкъ къикIыкIэ игъорыгъозэ слъэгъужьырэ хъатэ щымыIэу сыкъэнагъ. Охътабэрэ Iоф сымышIэу сыщысыгъ, ау сыгу згъэ­кIодыгъэп. Илъэс 13-м къыщегъэжьа­гъэу художественнэ самодеятельностым сызэрэхэтыгъэм ишIуагъэ ­къысэкIыжьыгъ ыкIи культурэм зызгъэзэжьынэу хъугъэ, — къыIуагъ Любовь.
Сыд фэдэрэ пэрыохъуи тигущыIэгъу къызэтыригъэуцуагъэп, щыIэныгъэм зыкъыхигъотагъ, илъэс 60 хъугъэу культурнэ-зыгъэпсэфыпIэ гупчэу Н. Кобцевам ыцIэ зыхьырэм икружокхэм ахэт. Культурэм, спортым алъэныкъокIэ шъо­лъыр ыкIи дунэе зэнэкъокъоу зэхащэхэрэм ахэлажьэ, хагъэунэфыкIырэ чIыпIэхэр къащыдехых.
— Любовь Николай ыпхъур – щыIэныгъэм фэблэрэ, сэнаущыгъэ зыхэлъэу, шIур, дэхагъэр, фэбагъэр къезыхьакIырэ цIыфэу щыт. Ар зыдэщыIэм чэфы­гъор щыI. «Сэкъатныгъэ иI» зыфаIорэ гущыIэр мыщ епхьылIэн плъэкIыщтэп, сыд фэдэрэ лъэныкъокIи пэрытныгъэр ыIыгъ. Тиобществэ пхырищырэ марафонхэм, зэнэкъо­къухэм, Iофтхьэбзэ зэфэшъхьафхэм ахэ­лажьэ, — хигъэунэфыкIыгъ хьафизэхэм я Урысые обществэ ичIыпIэ къутамэу Тэхъутэмыкъое районым щыIэм итхьаматэу Нэгъой Сусаннэ.
Сэкъатныгъэ зиIэхэм азыфагу щызэхащэрэ республикэ зэнэкъокъум хэлэжьагъ ыкIи литературэмрэ искусствэмрэ алъэныкъокIэ лауреат мыгъэ хъугъэхэм Любовь Воробьевар ахэфагъ.
— ЗипсауныгъэкIэ щыкIагъэ зиIэхэм яамалхэм ялъытыгъэу щыIэныгъэм чIыпIэ щаубытынымкIэ, зыкъызэIуахынымкIэ республикэм Iофтхьабзэу щызэрахьэрэр макIэп. Ахэм зэу ащыщ мы зэнэкъокъур. Адыгеим и ЛIышъхьэу КъумпIыл Мурат лъэшэу сыфэраз ынаIэ къызэрэттетымкIэ. Мылъкоу къыкIакIорэр арэп мэхьанэ зиIэр, цIыфым иIофшIагъэхэм гу алъатэу, къызэрэхагъэщырэм нахь кIуачIэ къыреты. Мы зэнэкъокъум къегъэлъагъо къэралыгъор къызэрэтфэгумэкIырэр. СэркIэ тын лъапIэу къысфагъэшъошагъэм мэхьанэшхо есэты, ар илъэс пчъагъэм IофшIагъэу сиIэм изэфэхьысыжь. Сыда пIомэ мы илъэсыр сэркIэ юбилейнэу щыт: культурэм сызыхэтыр — илъэс 60, хорым сызыхэтыр — илъэс 30, «Околицэр» зызэхэтща­гъэр илъэси 10 мэхъу, — хигъэунэфыкIыгъ Любовь Воробьевам.
ТигущыIэгъу ищыIэныгъэ гъогу къытфиIуатэзэ, 1969-рэ илъэсхэм Тэхъутэмыкъое районым культурэмкIэ и Унэ зэлъашIэрэ пщынаоу КIыргъ Юрэ Iоф зэрэдишIагъэр игукъэкIыжьхэм пытэу зэрахэтыр къыхигъэщыгъ. Адыгэ къа­шъор лъэшэу икIасэу зэригъэшIагъ. Тишэн-хэбзэ зэхэтыкIэхэр ыгу зэрэрихьыхэрэр, ахэр ежьми амал зэриIэкIэ зэригъэцакIэхэрэр къытиIуагъ. Ащ ишыхьат Краснодар Iоф щишIэ зэхъум унэу къы­щыратыгъэр ыщэжьи, илъэныкъо гупсэу ылъытэрэ Адыгеим щыпсэунэу зыкъызэригъэзэжьыгъэр. Любовь унэгъо дахэ ышIагъ.
— Пхъу закъу нахь мышIэми сиIэр, ащ ишъхьэгъусэ скъо фэдэу сэлъытэ. Ахэр къыскIэрысых, анаIэ къыстет. КIэ­литIоу зэдапIугъэхэм щыIэныгъэм лъэгъо дахэ щыпхыращы. Анахьыжъыр псэолъэшI-­архитекторэу еджагъэу Iоф ешIэ. НахьыкIэм Краснодар дзэ училищыр къыухи, лейтенантэу частьхэм ащыщ агъэкIуагъ. ТIуми унагъо ашIагъ, ахэм къакIэхъухьажьыгъэ цIыкIухэми, ныбджэгъубэу сиIэхэми сагъэгушIо, — къы­Iуагъ тигущыIэгъу.
ЩыIэныгъэм цIыфыр зэригъэуцощт чIыпIэр къэшIэгъуае. Ау, сыд хъугъэми, ащ зыкъызэрэхэбгъотэщтым, чIыпIэ гъэнэфагъэ щыуубытыным уапылъынэу щыт. Сэкъатныгъэ уиIэу укъэхъугъа е ущыIэзэ уипсауныгъэ пыч фэхъугъа, сыдэу хъугъэми, кIуачIэ къызхэбгъотыжьыным мэхьанэшхо иIэу тигущыIэгъу елъытэ.
— Апэ зэрэслъэгъущтыгъэм елъытыгъэмэ, джы дэй дэд. Ащ къин сигъэлъэ­гъугъ, ау сеуцолIагъ, сизакъоу сызекIожьырэп. Мыщ фэдэ чIыпIэ ифэрэ пстэуми зафэсэгъазэ, агу амыгъэкIодынэу, аIэхэр рамыушхохынхэу, лъэныкъо горэ къыхахынышъ, зыфагъэзэнэу. Охътэ гъэнэфагъэкIэ узэкIэIэбэжьмэ, сэ къысфэгъэхьыгъэу журналист горэм ытхыгъагъ: «Любовь Николай ыпхъур альбатрос бзыум фэд». А бзыур километрэ пчъагъэ къэмыуцоу мэбыбы. Шъыпкъэ, джащ сыфэд, сыкъэуцункIэ сэщынэ, семыжьэжьышъун къысшIошIы. Сыныбжьи хэкIотагъ, сипсауныгъи къыкIичыгъ, концертхэм, нэмыкI Iофтхьабзэхэм аужи лъэшэу сэпшъы, ау зызэпызгъэукIэ, унэм сыкъинэщт. Арышъ, амал зэриIэу сылъэкIуатэ, — хигъэунэфыкIыгъ Любовь Воробьевам.
Iэшъынэ Сусан.
Сурэтыр: Л. Воробьевам
ихъарзынэщ.