АР-м и Къэралыгъо камернэ музыкальнэ театрэу Хьанэхъу Адам ыцIэ зыхьырэр къэралыгъо программэу «Большие гастроли» зыфиIорэм хэлажьэ. Ащ къыдыхэлъытагъэу, мэфи 3-рэ къалэу Иваново къэгъэлъэгъон зэфэшъхьафхэр къыщитыгъ.

ДэкIыгъо IрфшIэным изэфэхьысыжьхэм афэгъэхьыгъэу гущыIэгъу тыфэ­хъугъ театрэм ихудожественнэ пащэу, искусствоведениемкIэ кандидатэу, Урысыем, Адыгеим искусствэхэмкIэ язаслуженнэ IофышIэшхоу Юныс Сулеймановым.
ГастрольхэмкIэ зэхъожьхэзэ, шъо­лъырхэм ятеатрэхэм ятворчествэ зырагъэушъомбгъу. Къалэу Иваново артистхэм къэгъэлъэгъонэу щызэхащагъэр ифэшъуашэу рекIокIыгъ. Нахьыжъхэм ыкIи кIэлэцIыкIухэм ателъытэгъэ ­Iоф­шIэнхэмкIэ цIыфхэр агъэгушIуагъэх. Ахэм ащыщых Александр Мельник ытхыгъэ мэкъэмэ пшысэу «Волшебные краски» ыкIи Андрей Семеновыр зыдэлэжьэгъэ спектаклэу «Ослепленные» зыфиIохэрэр. Программэм къэгъэлъэгъони 6 хэхьагъ.
— Тикъэгъэлъэгъонхэм цIыфыбэ яплъыгъ. Ахэр фабэу къытпэгъокIыгъэх, тиIофшIагъэхэр лъэшэу агу рихьыгъэх. Джы концертыкIэхэм якъэгъэлъэгъон артистхэм зыфагъэхьазыры. КIэрэщэ Тембот иповестэу «Шахъомрэ пшъэшъэ пагэмрэ» зыфиIорэм дэлажьэх. Тхьабысымэ Умарэ имэкъамэхэмкIэ ар дгъэкIэрэкIэщт. Ащ нэмыкIэу Евгений Шварц иIэпэрытхэу «Обыкновенное чудо» зыфиIорэр дгъэуцущт, — къы­Iуагъ пащэм.
Юныс Сулеймановым театрэм иIоф­шIэн зэрэзэтыригъэуцорэм дакIоу къэгъэлъэгъонхэми ар ярежиссер. IофшIэным зэрэхигъэхъощтымрэ къяплъыхэрэм нахь ашIогъэшIэгъон зэришIыщтымрэ ренэу адэлажьэ. Артист ныбжьыкIэхэр труппэм къыхещэх. Мыгъэ ахэр къэ­гъэлъэгъонхэм ахэлажьэх. Агъэуцугъа­хэхэм адакIоу кIэхэри репертуарым къыхэхьэх.
КъэгъэлъэгъоныкIэхэм зэрадэлажьэрэм дакIоу театрэм инепэрэ Iоф­шIэни лъегъэкIуатэ. Ирепертуар щыщ IофшIагъэхэу цIыфхэм шIу алъэгъугъэхэр къегъэлъагъох. ГущыIэм пае, тыгъэгъа­зэм и 18-м оперэм щыублагъэу комедием нэсыжьэу илъэс IофшIагъэу яIэм щыщ ипычыгъохэр «Миром правит любовь» ышъхьэу къагъэлъэгъощт.
КъэкIощт илъэсым театрэм ихьакIэхэм къэгъэлъэгъоныкIэхэм яплъынхэ амал яIэщт.
— Гъэтхапэм «Шахъомрэ пшъэшъэ пагэмрэ», жъоныгъокIэ мазэм «Обыкновенное чудо» къэдгъэлъэгъощтых. «ИлъэсыкIэ мэфэкI» зыфиIорэ къэгъэлъэгъоныр апэдгъохыщт. Пшысэм къы­хэхыгъэ театрализованнэ къэшIынхэри, тызхэт щыIэныгъэм ехьылIагъэхэри тирепертуар хэтыщтых, — къыIуагъ Ю. Сулеймановым.
Илъэсым изэфэхьысыжьхэм театрэм ипащэ тащигъэгъозагъ.
— 2024-рэ илъэсым тырыгушхоу, къыддэхъугъэу тлъытэрэр адыгэ лъэпкъым итарихъ нэкIубгъохэм ащыщ фэгъэхьыгъэ IофшIэгъакIэу «Тыргъэтау» зыфиIорэр къэзэрэдгъэлъэгъуагъэр ары. Шъугу къэдгъэкIыжьын, АР-м культурэмкIэ и Министерствэ драматургхэм азыфагу зэнэкъокъу щызэхищэгъагъ. Галина Лодяновам ипьесэу «Воительница Тыргъэтау» зыфиIорэр ащ хэлэжьэ­гъагъ ыкIи я 3-рэ чIыпIэр къыдихыгъ. Ащ иIофшIагъ дгъэфедэрэр. Меотхэмрэ синдхэмрэ ялъэхъан IофшIагъэм къырегъэлъэгъукIы. Ащ пылъ тарихъыр зэкIэ къэбгъэлъэгъошъущтэп, ау авторым IэпэубытыпIэ ышIырэр зы Iахь. Сэ къэ­гъэлъэгъонымкIэ сырежиссер. Артистхэм ащыгъыщт сурэтхэр Даур Людмилэ ышIыгъэх. Сценографиер Сихъу Рэмэзан ыгъэцэкIагъ. Мэкъамэхэр композиторэу Андрей Семеновым ытхыгъэх. Москва щыщ Владислав Старчевскэм усэхэм Iоф адишIагъ. Хореографиер Хъоджэе Иланд ыгъэуцугъ, — къытфиIотагъ тигущыIэгъу. Театрэм цIыфыр епIу, а гупшысэр зыпхырыщыгъэ спектак­лэхэр тирепертуар мымакIэу хэтых. Илъэс 31-м театрэм Iофэу ышIагъэм ар къаушыхьаты.
Лъэпшъыкъо Фатим.
Сурэтыр театрэм ихъарзынэщ.