ЦIыф жъугъэ къызэрыкIохэмкIэ зынахь лъапIэ щымыIэр мамырныгъэр ары.

Тызхэт лъэхъаным джыри зэпыугъо тIэкIу зиIэгъэ зэо-машIохэм Iаеу тыдэкIи зыкъыщаштагъ: мэкIодых лажьи-хьакъи зимыIэ цIыф хыехэр, жъалымыгъэм зеушху; гукIэгъур мэкIуасэ, мэпцIымамэх ны-тыхэр, сабыйхэр, щэ шIуцIэм ехьых ныбжьыкIабэ.
Мы зэкIэми япхыгъэу искусствэхэмкIэ Адыгэ республикэ колледжэу Тхьабысым Умарэ ыцIэ зыхьырэм идекоративнэ-прикладной къутамэ щеджэхэрэм заом нэлат рахэу сурэт къэгъэлъэгъонэу «Шъусакъ, терроризм!» зыфиIорэр фойем къыщызэIуа­хыгъ. Ащ сурэтшIыныр сэнэхьаткIэ къыхэзыхыгъэхэм яIофшIэгъэ 20-м ехъу хэлъ: ахэр шъо теплъэу яIэмкIи, къаIуатэрэмкIи зэфэшъхьафых. IофшIагъэ пэпчъ ежь зыIапэ къычIэкIыгъэм игузэхашIэ, идунэелъэгъукIэ щыгъэ­унэфыгъ. Зым исурэтэу ­кIэлэцIыкIухэр зыгупчэм шъо дахэхэр щыгъэфедагъэх, ежь сурэтыр зышIыгъэм къы­зэриIорэмкIэ, мыщ нэфынэр, фэбагъэр къебэкIы, сыда пIомэ кIэлэцIыкIухэр агукIэ хьалэл-зафэх, джащ фэдэу, ахэм «зао» зыцIэм, зэкIэ гукIэ зэкъотхэу, нахьышIум щыгугъыхэу текIохэ ашIоигъу. НэмыкI сурэтшIыгъэ инэу плъэгъурэм, терроризмэм ихьылъэ­гъэ-тхьамыкIэгъуагъэ шъо чIапцIэхэр ыгъэфедэхэзэ, фэкъулаеу къыригъэлъэгъукIыгъ пшъэшъэ ныбжьыкIэм, ар реалистическэ шIыкIэ-­гъэпсыкIэм рэгъуазэ.
СурэтшIыгъэ ыкIи плакат тхыгъэхэм зэфэдэкIэ терроризмэм имэхъэджагъэ ащыкIэгъэтхъыгъ; тызхэт уахътэр зэрэмыпсынкIэр, узфэсакъыжьыныр, Iэягъэм зыщыуухъумэныр зэрэапэрэр IофшIагъэхэм къащыгъэлъэгъуагъ.
Колледжым иеджакIохэм яIэпэщысэхэмкIэ нэлат рахы терроризмэм ыкIи мы сурэтхэмкIэ тидунай зэрэмыгупсэфыр, усакъыныр, улъэшыныр, узфырикъужьэу, сыд фэдэрэ щэчыгъое хъугъэ-шIэгъэ бзаджи защыуухъумэн зэрэфаем къыфэджэх.
Къэгъэлъэгъонэу «Шъусакъ, тер­роризм!» зыфиIорэм хэлэжьагъэ пэпчъ мамырныгъэр гъэпытэгъэным иIахь зэрэхилъхьагъэр нафэ къыпфэхъу.
Еплъы зышIоигъохэр искусствэхэмкIэ Адыгэ республикэ колледжым рагъэблагъэх.
Дзэукъожь Нуриет.