Теннис цIыкIумкIэ Адыгэ Республикэм ипервенствэ шэкIогъум и 30-м зэхащагъ. Шъолъырым имуниципалитетхэм яспортсмен анахь лъэшхэр мыщ щызэнэкъокъугъэх. ЗэкIэмкIи Iофтхьабзэм нэбгырэ 90-мэ зыщаушэтыгъ, ахэм илъэс 12-м щегъэжьагъэу 20-м нэс аныбжь.

Медальхэр къызэрэдахыщтхэм дакIоу Адыгеим ихэшыпыкIыгъэ командэ хэхьанхэм теннисистхэр фэбэнагъэх. Мыекъуапэ илIыкIохэм хагъэунэфыкIырэ чIыпIэ 12 къахьыгъ ыкIи команднэ зэнэкъокъухэм пэрытныгъэр щау­бытыгъ. Медаль 12-м щыщэу 11-р къэзыхьыгъэхэр къэлэ спорт еджапIэу С. М. Джэнчатэм ыцIэ зыхьырэм зыщызыгъасэхэрэр ары.
ТекIоныгъэр къафагъэшъошагъ Мыекъуапэ щыщхэу Адам Матюшиным, Артем Вариводиным, Ирина Славновам, Гъыдзэ Самирэ, Адыгэкъалэ къэзыгъэлъэгъогъэ ЕмтIылъ Алинэ, поселкэу Краснооктябрьскэм щыпсэурэ Дмитрий Работяга, селоу Вольнэм илIыкIохэу Дмитрий Газарянрэ Ирина Сотниковамрэ.

Кощхьэблэ районым икомандэ ятIонэрэ чIыпIэр къыдихыгъ, Тэхъутэмыкъое районым испорт­сменхэр ящэнэрэх. ЗэрагъэнэфагъэмкIэ, джы Адыгеим ичемпионат зэхащэщт.