Адыгеим щыщхэу хэушъхьафыкIыгъэ дзэ операцием хэлажьэхэрэм социальнэ IэпыIэгъу ягъэгъотыгъэным ыкIи адеIэгъэным фэгъэзэгъэ комиссием тыгъуасэ зэхэсыгъо иIагъ. Ар зэрищагъ комиссием итхьаматэу, финансхэмкIэ министрэу Виктор Орловым.

Iофтхьабзэм пшъэрылъ шъхьаIэу иIагъэр хэушъхьафыкIыгъэ дзэ операцием хэлажьэхэрэм ыкIи ащ сэкъатныгъэ хэзыгъэхэм лъэныкъо зэфэшъхьафхэмкIэ ящыкIэгъэ социальнэ IэпыIэгъур игъом, икъоу ягъэгъотыгъэным хэбзэ къулыкъухэм яамалхэр зэхэубытагъэу дэлэжьэнхэр ары.
Зэхэсыгъом IофыгъуиплIымэ щатегущыIагъэх. Апэрэр зыфэгъэхьыгъагъэр хэушъхьафыкIыгъэ дзэ операцием хэлажьэхэрэм апае республикэм ирайонхэм адаптивнэ спорт лъэпкъхэм зыщягъэушъомбгъугъэныр ары. Ащ епхыгъэу къэгущыIагъ АР-м физическэ культурэмкIэ ыкIи спортымкIэ и Комитет итхьаматэу Дэгужъые Мурат. Комиссием хэтхэм унашъо зэрашIыгъэмкIэ, дзэ операцием хэлажьэхэрэм ыкIи сэкъатныгъэ хэзыхыгъэхэм апае адаптивнэ спорт лъэпкъхэм зягъэушъо­мбгъугъэнымкIэ муниципальнэ образованиехэм япащэхэм предложение гъэнэфагъэхэр къагъэхьазырынхэ фае.
АР-м гъэсэныгъэмрэ шIэныгъэмрэкIэ иминистрэу Евгений Лебедевым къы­зэриIуагъэмкIэ, зылъакъо пымытыжь ветеранхэм IэкIэ агъэIорышIэрэ автомобилыр зэрафэшъунымкIэ рагъэ­джэнхэм ыкIи ащ пае автомобильхэр къафащэфынхэу къыкIэлъэIугъэх. Урысыем и ДОСААФ икъутамэу ­Адыгеим щыIэм илIыкIоу Ю. Горшковыр а Iофтхьабзэр зэрэзэхэщэгъэщтым къатегущыIагъ. Мы пшъэрылъыр зэшIохыгъэным дэлэжьэщтых.
Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ ипащэу ПIатIыкъо Аслъан хэушъхьафыкIыгъэ дзэ операцием хэлажьэхэрэм, иветеранхэм ыкIи ахэм яунагъохэм аратырэ IэпыIэгъухэм къатегущыIагъ ыкIи Iофыгъоу зэуа­лIэхэрэм ащыщхэм ягугъу къышIыгъ. Ахэм зэу ащыщ мы купым ядокументхэр хьыкумым рагъэхьынхэ зыхъукIэ къэралыгъо пошлинэм ыпкIэу лъатырэм зэхъокIыныгъэ фэшIыгъэныр. МыщкIэ ищыкIэгъэ унашъо аштагъ.
Зэхэсыгъом нэмыкI Iофыгъохэми щахэплъагъэх, хэкIыпIэхэм яусагъэх.
Iэшъынэ Сусан.