ТичIыгогъоу, къуаджэу Агуй-Шапсыгъэ щыщэу, цIэ тедзэу «Хас» зиIэр хэушъхьафыкIыгъэ дзэ операцием хэлажьэ. Ащ бгъэхалъхьэу «За отвагу» зыфиIорэр къыфагъэшъошагъ. Джыри шIэхэу марша­лэу Жуковым ыцIэ зыхьырэ дзэ бгъэхалъхьэр къыратынэу ежэ.

НыбжьыкI. ГукIочIэшхо зы­хэлъ кIал. Гулъытэ зиIэ, шIыкIэшIо цIыф. Бэ зымыIу. Шэн пхъашэ хэлъ ыкIи ицыхьэ зэрэзытелъыжьыр ынэхэм къакIэщы. КIалэм къызэриIуагъэмкIэ, фронтым кIощт-мыкIощтым бэрэ егупшысагъэп. АщкIэ ищыкIэгъэ спорт ухьазырыныгъэр IэкIэлъ, ныбжьыкIэзэ бэнэным пылъыгъ, джащ фэдэу дзэ къулыкъур ыхьыгъ ыкIи илъэс 12-рэ полицием хэтыгъ. ГуфакIоу дзэ операцием кIонэу унашъо зыкIишIыгъэр Хэгъэгур ыкIи игу­псэхэр къыухъумэнхэм фэшI.
Бэрэ пымылъэу нэмыкI къа­лэхэм ащыщ ащыпсэурэ иныб­джэгъуиплI кIыгъухэу зэзэгъыныгъэм кIэтхагъэх. Ахэми зы гупшысакIэ яIэу шIокI имыIэу фронтым кIонхэу рахъухьагъ. Штурмовой отрядым зыхари­гъэтхагъ, цIэ тедзэу «Хас» зы­фиIорэр (адыгабзэкIэ имэхьанэр къотэгъу) зыфишIыжьыгъ.
— ИкIыгъэ илъэсым жъоныгъуакIэм мэзиплI пIалъэкIэ зэ­зэгъыныгъэм сыкIэтхагъ, — къе­Iуатэ Хас. — ХэушъхьафыкIыгъэ батальонэу «Ахмат» зыфиIорэм хэт синэIосэ офицерым иIэпы­IэгъукIэ ухьазырынхэр зыщакIоу Гудермес дэтым синыбджэгъу­хэри сигъусэхэу тыхэфагъ. Нэ­ужым хэушъхьафыкIыгъэ дзэ операциер зыщыкIорэм нэбгырэ шъитIу фэдиз тызэхэтэу тащагъ.
Лисичанскэм пэмычыжьэу щагъэпсыгъэ частым иапэрэ мафэ зэрэщыкIуагъэр егъашIи дзэкIолIым щыгъупшэжьыщтэп. МэзиплIым ехъурэ тиштурмовикхэм украинскэ нацистхэр «ратхъынхэм» пылъыгъэх, а зэ­пэуцужь пхъашэр стратегическэ лъэгапIэу «Ведьмина гора» зыфиIорэм щыкIуагъ. ЗыкIуа­гъэхэм ыуж мазэ тешIагъэу «Ах­матым» ишIуагъэкIэ а чIыпIэр шъхьафит ашIыжьыгъ ыкIи дзэ­кIолIхэм Урысыем ибыракъ лъэ­гапIэм щычIаIугъ.
Нэужым штурмовой бригадэр Марьинкэм кощыгъэ, етIанэ — Бахмут. Спорт ухьазырыныгъэу ыкIи Iашэм узэрэдэзекIощт IэпэIэсэныгъэу дзэ къулыкъум, полицием тигущыIэгъу ащигъотыгъэр къышъхьэпагъ. Джащ фэ­дэу психологическэу фэмы­хьазырыгъэмэ, жъалымыгъэ
ин зыхэлъ пыим пэуцужьыныр къы­фэкъиныщтыгъ.

— ХэушъхьафыкIыгъэ мотострелковэ батальонэу «Темыр-­Ахмат» зыфиIоу Чэчэн Респуб­ликэм щыщ нэмыкI зыхэмытым фэмыдэу, генералэу Апти Алау­диновыр зипэщэ «Ахматым» тикъэралыгъо щыпсэурэ лъэпкъ­хэр зэкIэ щызэхэугъоягъэх. Ма­мыр щыIакIэм зэкIэми тыщызэфэшъхьаф — тыныбжьыкIэ, тилъэпкъыкIэ, тидинкIэ, тыбзэ­кIэ, тикультурэкIэ, ау хэушъхьафыкIыгъэ дзэ операцием узэдыщыIэ зыхъукIэ пстэуми Уры­сыем тырицIыфых, зы тарихъ ыкIи дзэкIолI зэкъошныгъэм тызэрепхы, зым зыр ыгу фэ­гъужьы, текIоныгъэр къыдэхыгъэным нэмыкI гупшысэ зыдэтIыгъэп. ЗэуапIэм Iут дзэкIолIхэм адыгабэ ахэт, лъэкъуацIэхэм такIэупчIэу тихабзэп, цIэ те­дзэ­хэр тэгъэфедэх. «Бес», «Буч», «Адыг» зэшых. Аужырэр «Ахматым» хэтхэм зэкIэми ана­хьыбэрэ заор зыщыкIорэ апэрэ линием Iутыгъ, ЛIыхъужъныгъэм иорденэу я 3-рэ шъуашэ зиIэр къыфагъэшъошагъ, лIыгъэу хэлъымкIэ ар щысэтехыпI. НэмыкI черкес кIалэу «Старый» зыцIэри лIыхъужъ шъыпкъэхэм ащыщ, частым лъытэныгъэшхо щыфашIы. Аррэ сэррэ зэкъошныгъэм тызэрепхы, мы илъэсым иIоныгъо мазэ ыдэжь Налщык хьакIапIэ сыщыIагъ, тыгу къэдгъэкIыжьыгъэри макIэп, — хигъэунэфыкIыгъ «Хас».
2023-рэ илъэсым бэдзэогъум Курдюмовкэр шъхьафит ашIы­жьынымкIэ зэпэуцужь пхъашэр кIозэ, «Ахматым» икуп щэрыоным хэфагъ ыкIи кIалэр къауIагъ, ау зыухъумэхэрэ ныба­лъэм ишIуагъэкIэ псаоу къэ­нагъ.
— Дзэ хирургхэм псынкIэу ыкIи IэпэIэсэныгъэ фыряIэу къутафэхэр къысхахыжьыгъэх, ау зыр къысхэнагъ, тхыкъуп­шъхьэм зэрэпэгъунэгъум фэшI врачхэр еIэнхэ адагъэп. Джыдэ­дэм а гъучI пкъыгъом сигъэгу­мэкIырэп, сипсауныгъэ изытет къехьылъэкIы зыхъукIэ, Москва операцие сыщашIыщт, — къы­Iуагъ зэолIым.
ХэушъхьафыкIыгъэ дзэ операцием ар къэтыфэ, игупсэхэр ымыгъэгумэкIынхэм фэшI иIофхэр дэгъухэу къафатхэ­щтыгъ, къафытеощтыгъ. Ау ны гур бгъэпцIэн плъэкIыщтэп, янэу Мариет кIэ­хэкIыгъэр ежь бзылъфыгъэ за­къор ары зышIэрэр:
— Адэ сычъыягъэп, Тхьэм селъэIу зэпытыгъ, сикIалэ къы­Iощт къэбарышIум сежагъ! ЗэкIэ дэгъу хъунэу, псаоу, узынчъэу къэкIожьыныр сшIошъ згъэхъущтыгъ.
Си­Iахьыл­хэр, къо­джэдэсхэр лъэшэу къыс­къотыгъэх, сыгу къыдащаещтыгъ. ЗэкIэми сафэраз!
ЗэолIыр мы уахътэ икъоджэ гупсэ дэсэу зэIэзэжьы.
— Сипсауныгъэ изэтегъэуцожьын зыпкъ итэу рекIокIы, гумэкIыгъо щыIэп, — къеIуатэ сигущыIэгъу. — ДзэкIолI ныбджэгъухэм ыкIи командир­хэм бэрэ сафытео. Анахь шъхьа­Iэм тытегущыIэ — Те­кIоныгъэр къыдэхыгъэным. Тятэжъ пIашъэхэр фашизмэм зэрэтекIуагъэхэм фэдэу, джыри ТекIоныгъэр зэ­рэтиещтым сицыхьэ телъ!