Ным и Мафэ анахь мэхьанэшхо зиIэ мэфэкIхэм ащыщ. Мыщ ехъулIэу илъэс къэс Адыгэкъалэ
дэт кIэлэцIыкIу IыгъыпIэу N 3-м Iофтхьабзэхэр щызэ­хэтэщэх.

Ныхэм гущыIэ фабэхэр къафэтэIох, ясабыйхэм якъэгъэлъэгъон цIыкIухэм ятэгъэплъых, ахэм афэгъэхьыгъэ орэдхэр, усэхэр къаIох, къэшъох.
Iофтхьабзэр гъэшIэгъонэу зэрэзэхэтщэщтым имызакъоу нэбгырэ пэпчъ янэ шIулъэгъуныгъэу фыриIэр, шъхьэкIэфэныгъэу фишIыгъэр къэдгъэлъэгъоныр типшъэрылъ.

Мыгъэ зэхэтщагъэм сабыйхэри, ныхэри чэфхэу хэлэжьагъэх. Къе­кIолIагъэхэр ясабыйхэм зыкъызэрашIырэм ягуапэу еплъыгъэх, зэхэщакIохэм зэрафэразэхэр къаIуагъ. Ежьхэри зэнэкъокъу зэфэшъхьафхэм ахэлэжьагъэх, анэхэр кIэпхагъэхэу ясабыйхэр къагъотыжьыгъэх ыкIи ягу­фэбэныгъэ къизыIотыкIырэ н­э­мыкI Iофтхьабзэхэм ахэлэжьагъэх. ИкIэ­у­хым кIэлэцIыкIухэм къагъэхьазырыгъэ шIухьафтын цIыкIухэм гущыIэ фабэхэр атетхагъэхэу ныхэм аратыгъэх, сурэтхэр зытырарагъэхыгъ.
— МэфэкIыр гъэшIэгъонэу кIуагъэ, сабыйхэм зыкъызэрашIыгъэм тшIогъэшIэгъонэу теплъыгъ, тынэпсыхэри къагъэкIуагъэх, агу етыгъэу зыкъа­шIыгъ. ЗэхэщакIохэм лъэшэу тафэраз, — къыIуагъ Iофтхьабзэм хэлэжьэгъэ ныхэм ащыщ.
ХъокIо Сусан.
КIэлэцIыкIу IыгъыпIэм иIофышI.