2024-рэ илъэсыр ыкIэм зыщыфакIорэм, хабзэ зэрэхъугъэу, ащ зэфэхьысыжьхэр зыщыфи­шIыщт зэнкIэ зэдэгущыIэгъу Адыгеим щыпсэухэрэм зэрадишIыщтымкIэ макъэ къыгъэIугъ рес­публикэм и ЛIышъхьэу КъумпIыл Мурат.

Тыгъэгъазэм и 11-м цIыфхэр зыгъэ­гумэкIырэ упчIэхэм Адыгеим и ЛIышъхьэ зэдэгущыIэгъу занкIэм тетэу джэуапхэр къаритыжьыщтых, къэралыгъо телерадиокомпаниеу «Адыгеим» ар щыкIощт, къихьащт 2025-рэ илъэсымкIэ зэшIуахынэу агъэнафэхэрэми КъумпIыл Мурат ягугъу къышIыщт.
УпчIэхэр непэ къыщыублагъэу бгъэ­хьынхэ плъэкIыщт, ар шIыкIитIукIэ зэшIопхышъущт:
Номерэу 122-мкIэ мафэ къэс кол-гупчэм иIофышIэхэм упчIэхэр атхыщтых. Къулыкъум Iоф зэришIэщтыр: IофшIэгъу мафэхэм — пчэдыжьым сыхьатыр 8-м къыщыублагъэу пчыхьэм 8-м нэс, зыгъэпсэфыгъо мафэхэм – пчэдыжьым сыхьатыр 8-м къыщыублагъэу мафэм 2-м нэс.
Электрон почтэу kumpilov-online@mail.ru. зыфиIорэми упчIэхэр жъугъэ­хьышъущтых.
«Лъытэныгъэ зыфэсшIырэ сичIыгогъухэр! УпчIэу къэжъугъэхьырэ пэпчъ Iоф дэтшIэщт, пстэуми тынаIэ атедгъэ­тыщт, ахэм язэшIохын зипшъэрылъ къулыкъу ыкIи муниципалитет пэпчъ IофшIэным къыхэдгъэлэжьэщт. Эфирым фыхэхыгъэ уахътэм къыриубытэу нахь лъэныкъуабэмэ танэсыным тыпы­лъыщт. Шъуицыхьэ тезгъэлъынэу сыфай зыкъызэрэтфэжъугъазэрэ пэпчъ зэшIохыкIэ иIэ зэрэхъущтым, упчIэ пэпчъ джэуап хэхыгъэ зэригъотыщтым», —къащитхыгъ АР-м и ЛIышъхьэу КъумпIыл Мурат исоциальнэ нэкIубгъохэм.
ЗэнкIэ зэдэгущыIэгъур тыгъэгъазэм и 11-м пчыхьэм сыхьатыр 7-м каналэу «Урысыер 24» зыфиIорэм къытыщт. Джащ фэдэу ар КъТРК-у «Адыгеим» исайтрэ и Rutube-каналрэ, платформэу «Смотрим» зыфиIорэм ыкIи ЛIышъхьэм исоциальнэ нэкIубгъохэм арыжъугъо­тэшъущт.