Ныдэлъфыбзэм фэгъэхьыгъэ форум
Къыблэ федеральнэ шъолъырым ныдэлъфыбзэмкIэ Iоф щызышIэрэ кIэлэегъэджэ ныбжьыкIэхэм яапэрэ Форум мы мафэхэм Мыекъуапэ щэкIо.
МэфитIум къыкIоцI Адыгем щыщхэм анэмыкIэу Краснодар краим, Ростов, Астраханскэ, Волгоградскэ хэкухэм, Къалмыкъым, Къырым, Севастополь къарыкIыгъэхэм ныдэлъфыбзэм изэгъэшIэнкIэ IофшIэкIэ амалэу яIэхэмкIэ зэдэгощэщтых. Тыгъуасэ пленарнэ зэхэсыгъом ыуж «НыдэлъфыбзэмкIэ анахь кIэлэегъэджэ дэгъу» зыфиIорэм иурысые уцугъо хэлэжьагъэхэу чIыпIэ зэфэшъхьафхэм къарыкIыгъэхэм мастер-класс къагъэлъэгъуагъ.
Ныдэлъфыбзэм изэгъэшIэнкIэ кIэлэегъэджэ пэрытхэм яIофшIэн зэрэзэхащэрэр къыраIотыкIыгъ.
Урысые Федерацием просвещениемкIэ и Министерствэ, ныдэлъфыбзэхэм язэгъэшIэнкIэ Федеральнэ институтыр ыкIи АР-м шIэныгъэмрэ гъэсэныгъэмрэкIэ и Министерствэ форумым кIэщакIо фэхъугъэх
Iофтхьабзэм къыдыхэлъытагъэу ныдэлъфыбзэм изэгъэшIэнкIэ гумэкIыгъоу къэуцухэрэм, ахэм хэкIыпIэу къафэбгъотын плъэкIыщтхэм атегущыIагъэх.
Мыщ фэгъэхьыгъэ игъэкIотыгъэ къэбар тигъэзет къыхиутыщт.
ДЕЛЭКЪО Анет.
Сурэтыр: А. Лаутеншлегер.