Унагъом и Илъэс къыдыхэлъытагъэу сабыибэ зиIэ ныхэр къалэу Шъачэ щагъэшIуагъэх. Мы къалэм щыщ бзылъфыгъэ пшIыкIузмэ тамыгъэу «Ным ищытхъу» зыфиIорэр къафагъэшъошагъ.

Ахэр аныбжьыкIи, лъэпкъэу зыщыщхэмкIи зэфэшъхьафых, общественнэ Iофэу агъэцэкIагъэми, сэнэхьатэу зэрылэжьагъэхэми щытхъур апылъ, ау зэкIэмэ анахь агъэлъапIэрэр гъэшIогъа­цIэу «сабыибэ зиIэ ныкIэ» къызэряджэхэрэр ары, ащ лъэшэу рэпагэх. Лауреат хъугъэ пэпчъ ищыIэныгъэкIэ Iоф шъхьаIэу ылъытэрэр кIалэхэм япIун, унагъом илъынэу щыт шэн-хэбзэ дахэхэм якъэухъумэн ары.
Ным и Мафэ фэгъэхьыгъэ мэфэкI зэхахьэр шэкIогъум иаужырэ тхьамафэ зэхащагъ. Къалэм ипащэу Андрей Прошуниныр ыкIи Къэлэ ЗэIукIэм итхьаматэу Виктор Филоновыр Шъачэ щыщ бзылъфыгъэхэу тамыгъэ гъэшIуагъэу «Ным ищытхъу» зыфиIорэр зыфагъэшъошагъэ­хэм афэгушIуагъэх. Муниципалитетым ипресс-къулыкъу къызэритыгъэмкIэ, сабыищ ыкIи нахьыбэ зыпIурэ ныхэу гъэсэныгъэм, культурэм, спортым ыкIи общественнэ щыIакIэм гъэхъагъэхэр ащызышIыгъэхэр ары бгъэхалъхьэхэр къэзылэжьыгъэхэр. Ахэр кIэлэегъаджэх, тхылъеджапIэм иIофышIэх, муниципальнэ къулыкъушIых, хьыкумышIэх, организациехэм япащэх. ЗэкIэхэри, яшъхьэгъу­сэхэмрэ ясабыйхэмрэ ягъусэхэу, къалэм исоциальнэ, спортивнэ ыкIи гъэсэныгъэ проектхэм ахэлажьэх.
– Ным и МафэкIэ тикъэралыгъо иныбжьыкIэхэр зыпIухэрэ ныхэм зэкIэми сафэгушIо сшIоигъу. Шъо кIуачIэу шъуиIэмрэ шъуищэIагъэрэ тэ гукъыдэчъ тфэхъух. Унагъохэр зыпкъ итынхэм, тиобществэ ыкIи тикъалэ хэхъоныгъэхэр ашIынхэм шъоры лъапсэ афэхъурэр. Мафэ къэс гушIуагъо къышъуфихьынэу, шъуисабыйхэр псаунхэу, щыIэкIэшIу агъотынэу сышъуфэлъаIо, – къыIуагъ Шъачэ имэрэу Андрей Прошуниным.
Тамыгъэ гъэшIуагъэу мыгъэ агъэнэфагъэр зыфагъэшъошагъэхэм тилъэпкъэ­гъу бзылъфыгъэ ахэфагъ – къуаджэу Тхьагъапшъэ щыщэу КIакIыхъу Светланэ Исмахьилэ ыпхъур. Светланэ ЛIыф лIакъоу Шэхапэ щыпсэухэрэм ащыщ. Лъэпкъ культурэм и Гупчэу ПсышIуапэ дэтым иинформационнэ-аналитическэ ыкIи методическэ отделэу кIэлэцIыкIу­хэм, ныбжьыкIэхэм адэлажьэрэм иметодистэу Светланэ Iоф ешIэ.
КIакIыхъу Светланэ ны шIагъу, унэгъо зехьанымкIэ щысэтехыпI, джэныкъо машIом ифабэ къеухъумэ, IофшIэнми фэIэпэIас, а шэнышIоу хэлъхэр иIофшIэгъухэм къыхагъэщы. Къалэм икультурнэ ыкIи иобщественнэ щыIакIэ чанэу хэлажьэ. Ишъхьэгъусэу Муратэ водителэу ООО-у «ГазпромТрасгазКраснодар» зыфиIорэм щэлажьэ, ар игъусэу пшъэшъитIурэ шъаорэ епIух – Софие, Аминэт ыкIи Долэт.
КIалэхэр искусствэм, творчествэм ыкIи спортым апылъых, рэзэныгъэ, щытхъу тхылъхэр мымакIэу къафагъэшъошагъэх. Лъэпкъ культурэм и Гупчэ къызэрэщыхагъэщыгъэмкIэ, ны-тыхэм ясабыйхэр IофшIэным, еджэным афагъа­сэх, творчествэр, физкультурэр шIу арагъэлъэгъу, ащ пае амалышIухэр Гупчэм иIэх. КIакIыхъумэ яунагъо ылъап­сэх шIулъэгъур, гуфэбагъэр, лъытэныгъэр.
– КIакIыхъу Светланэ IофышIэкIошху, зыдэлажьэхэрэми икъоджэгъухэми ­шъхьэкIэфэныгъэ къыфашIы, – къыкIегъэтхъы ПсышIопэ районым иадминистрацие ипащэ игуадзэ ипшъэрылъхэр зыгъэцэкIэрэ Ольга Богдашевскаям. – Ащ Iофтхьабзэу зэхищэхэрэм шIогъэшхо къаты, нэмыкI гъэсэныгъэ еджапIэмэ адэлажьэ, зыныбжь имыкъу­гъэ сабыйхэм хэукъоныгъэхэр амышIынхэм фэшI ежьхэми, яунагъохэми зэдэгущыIэгъухэр адешIых. ЗэкIэхэми ащ IэпэIэсэныгъэшхо зэриIэр къыхагъэщы. Светланэ исабыйхэм щысэ афэхъу, ахэри ежь фэдэу культурнэ ыкIи спортивнэ щыIакIэм чанэу хэлажьэх.
– Шъыпкъэ, мыщ фэдэ бгъэхалъхьэ къыпфагъэшъошэныр гопэшху, ау ащ дакIоу пшъэдэкIыжьэу пылъыри зэхэсэшIэ, – къеIуатэ КIакIыхъу Светланэ. – Адрэ ныхэм зыкIи узэратемыкIырэр къыбгурыIозэ, ащ фэдэхэр тикъалэ бэу щэпсэух, тишэн-хабзэхэр къэуухъумэнхэр, гуфэбагъэкIэ сабыйхэр ппIунхэр — ахэр ары сищыIэныгъэкIэ сызэрыгъуа­зэрэр.
Ныбэ Анзор.
Сурэтыр: къалэу Шъачэ иадминистрацие
ипресс-къулыкъу.