Олимпийскэ чемпионэу Хъущт Аслъанбэч ишIухьафтынхэр зэрылъ зэIухыгъэ республикэ зэнэкъокъухэр мы мафэхэм рагъэкIокIыгъэх. Адыгеим и Тэхъутэмыкъое район къэзыгъэлъэгъогъэ спортсменхэм гъэхъэгъэшIухэр ашIыгъэх, хагъэунэфыкIырэ чIыпIэ 19 къыдахыгъ.

Мэхьанэшхо зиIэ спорт Iофтхьабзэу къуаджэу Тэхъутэмыкъуае щыкIуагъэм бэнэкIуи 100-м ехъумэ зыщаушэтыгъ. Тиреспубликэ имызакъоу Краснодар краим, Къэбэртэе-Бэлъкъарым, Къалмыкъым, Темыр Осетием—Аланием ялIыкIохэр зэнэкъокъугъэх. Ахэм ­аныбжь илъэс 12-м щегъэжьагъэу 18-м нэс.
Нэбгырэ пэпчъ ухьазырыныгъэ дэгъу зэриIэр къыгъэшъыпкъэжьыным, текIоныгъэм фэбэнэным пылъыгъ. Тэхъутэмыкъуае испортсменхэм ар дэгъоу къадэхъугъ, хагъэунэфыкIырэ чIыпIэ 19 къафагъэшъошагъ, ахэм ащыщэу 6-р дышъэ медалых, 4-р – тыжьын, 9-р – джэрз. Тиспортсменхэу Тимур Кошелевым, Хьатит Мурат, ЦIэгъош Дамир, Нэхэе Рэмэзан, Барцо Рустам, ШъэошIу Марат ыкIи Вана Акопян текIоныгъэр къыдахыгъ.