АР-м и Къэралыгъо Совет – Хасэм и Тхьаматэу Владимир Нарожнэр Мыекъопэ районым ит поселкэу Удобнэм кIогъагъэ.

Шъолъыр Парламентым ипащэ цIыфэу псэупIэм дэсхэм культурэм и Унэ щаIукIагъ. Ащ къулыкъу ыкIи организацие зэфэшъхьафхэм, район ыкIи псэупIэ кой администрациехэм ялIыкIохэр, народнэ депутатхэм я Совет хэтхэр хэлэжьагъэх.
Поселкэм дэсхэр зыгъэгумэкIырэ Iофыгъохэр ары зытегущыIагъэхэр. Ахэр фэтэрыбэу зэхэт унэхэм ящагухэм язэтегъэпсыхьан, гъогу Iахьэу анахь мэхьанэ ин зиIэхэр чэщырэ къызэрамыгъэнэфыхэрэм, зыпарэми имыехэу, гъорыкIоу тет псэушъхьэхэм афэгъэхьыгъагъэх.
Джащ фэдэу зигугъу анахьэу ашIыгъэхэм ащыщ хьылъэзещэ автомашинэш­хохэр поселкэм игъогухэм зэрарыкIохэрэр нахь макIэ шIыгъэныр. Ахэм асфальтыр зэрэзэхакъутэрэм, урам шъхьаIэу джырэблагъэ агъэцэкIэжьы­гъэм яягъэ зэрэрагъэкIырэм цIыфхэр егъэгумэкIых.
Мы лъэныкъохэм афэгъэзэгъэ къулыкъухэм ялIыкIохэр къыхэлажьэхэзэ Iофыгъоу зигугъу къашIыгъэхэм ядэгъэзыжьынкIэ зэшIохыгъэн фаехэр агъэнэфагъэх. Урамэу «Звездная» зыфиIорэр чэщырэ нэфынэным пае электричествэм икIуапIэхэр зэрэщагъэпсыщтыр зэу ахэм ащыщ.
Хьылъэзещэ автомашинэхэм гумэкIыгъоу къахьырэр дэгъэзыжьыгъэным фэшI район администрацием Iофэу ышIагъэм шъолъыр Парламентым и Тхьаматэ къыщагъэгъозагъ. КъызэраIуагъэмкIэ, гъогу тамыгъэу ищыкIагъэхэр къарагъэ­шIынхэу ащ пылъ организацием зэзэгъыныгъэ дашIыгъ.

КIэлэцIыкIу джэгупIэр къэкIощт 2025-рэ илъэсым игъэтхэпэ мазэ зэтырагъэ­уцожьынэу агъэнэфагъ. Ащ пэIухьащт ахъщэр бюджетым къыдыхэлъытэгъэщт.
ЦIыфхэм ярэхьатныгъэ амыукъоным ылъэныкъокIэ зэшIохыгъэхэм хэбзэухъу­мэкIо къулыкъум илIыкIохэр къатегущыIагъэх. Ащ фэдэ хэукъоныгъэ зышIыхэрэмрэ ахэм янэ-ятэхэмрэ административнэ пшъэдэкIыжь ахьыщт. Ар къызщиIорэ къэбарыр социальнэ хъытыум къырагъэхьагъ.
Шъолъыр Парламентым и Тхьаматэ зэпстэур къызэфихьысыжьзэ, хэбзэ къулыкъухэр зэдеIэжьхэзэ Iофышхо зэрашIагъэр, охътабэ тырамыгъашIэу гумэкIыгъохэм ядэгъэзыжьын ыуж зэрихьагъэхэр къыхигъэщыгъ. Мыщ фэдэу псэупIэхэр къакIухьэзэ Iофыгъохэм зэдатегущыIэнхэм мэхьэнэ ин зэриIэми къыкIигъэтхъыгъ.
— ЧIыпIэм тыкъызэкIом Iофыгъоу дэгъэзыжьыгъэ хъугъэри, джыри зыуж титын фаери нэрылъэгъу къытфэхъу­гъэх. ТапэкIи Iофхэр зэрэлъыкIуатэхэрэм тылъыплъэщт, цIыфхэр щыдгъэгъозэщтых. ГумэкIыгъоу зигугъу къашIыгъэхэм ащыщ зыпари Iэпэдэлэл тшIыщтэп, — къы­Iуагъ Владимир Нарожнэм.