ИлъэсыкIэ мэфэкIэу къэблагъэхэрэм япэгъокIэу АР-м мэзхэмкIэ и ГъэIорышIапIэ хвой чъыг лъэпкъхэр къызщыкIырэ чIыпIэхэм якъэгъэгъунэн ыгъэлъэшыгъ.

Хэбзэнчъэу ельхэр рамыупкIынхэм фэшI къэралыгъо мэз фондым рейдхэр щызэхащэщтых. ШэкIогъум и 25-м рагъэжьагъ, тыгъэгъазэм и 31-м нэс мэзхэр къэзгъэгъунэхэрэмрэ хэбзэухъу­макIохэмрэ чэзыу-чэзыоу дежурствэр ахьыщт. Анахьэу анаIэ зытетыщтыр Цицинскэ ыкIи Дахъо мэз хъызмэтшIапIэхэм ячъыгхэр ары.
— МэзхэмкIэ ГъэIорышIапIэм инспекторхэмрэ УФ-м хэгъэгу кIоцI IофхэмкIэ и Министерствэ иотделэу Мыекъопэ районым щыIэм иIофышIэхэмрэ хвой ­лъэпкъ чъыг цIыкIухэр къызэрагъэгъунэщт планэу зэхагъэуцуагъэм тетэу дежурствэр ­ахьыщт, — къыщаIуагъ АР-м мэзхэмкIэ и ГъэIорышIапIэ.
Хэбзэнчъэу мэз фондым щыщ ­чъыгхэр къизыупкIыхэрэм, хэбзэукъо­ныгъэу ашIыгъэм елъытыгъэу дисцип­линарнэ, административнэ е уголовнэ пшъэдэкIыжь арагъэхьыщт.