Унагъом и Илъэсэу Урысыем щыпхыращырэм къыдыхэлъытагъэу «Отцовская доблесть» зыфиIорэ медаль апэрэу къалэу Шъачэ щаштагъ. Ар сабыибэ зиIэ тыхэм унэгъо шапхъэхэм якъызэтегъэнэн ыкIи язегъэушъомбгъун зэрэхэлажьэхэрэм фэшI афагъэшъошэщт.

Апэрэ нэбгыриблэу ащкIэ къыхагъэ­щыгъэхэм дин гъэIорышIапIэхэм, хэбзэухъумэкIо къулыкъухэм, коммунальнэ хъызмэтшIапIэхэм ялIыкIохэр, хэушъхьафыкIыгъэ дзэ операцием хэлажьэхэрэр ахэтых.
— Iанэм тызэдыпэсэу кIэлэцIыкIухэм япIун, унэгъо хабзэхэм якъызэтегъэнэн, УФ-м и Президент кIэщакIо зыфэхъугъэ унагъом и Илъэс имэхьанэ татегущыIагъ, — къыщитхыгъ Шъа­чэ имэрэу Андрей Прошуниным социальнэ хъытыум инэкIубгъо. — Унэгъо Iужъу­хэм япащэхэм якIалэхэм, япшъа­шъэхэм еджэнымкIэ зэрадеIэхэрэр, гъэхъагъэу яIэхэр къа­Iотагъэх. Тыхэр къалэм хэхъоныгъэхэр ышIынхэм яIахь зэрэхалъхьэрэмкIэ, ныбжьыкIэхэр патриотизмагъэм фэгъэзэгъэнхэм зэрадэлажьэхэрэмкIэ, я Хэгъэгу къызэраухъумэрэмкIэ ящысэтехыпIэх.
— Шъачэ имэр сыригъусэу «Отцовская доблесть» зыфиIорэ медалыр зыфагъэшъошагъэхэм яттыжьыгъ, — къыхигъэщыгъ Къэлэ ЗэIукIэм итхьаматэу Виктор Филоновым. – Егъа­шIэм Урысыем иунагъохэр тыхэмкIэ къахэщых. Ахэм я Хэгъэгу къаухъумагъ, мамыр щыIакIэр агъэпсыгъ, яунагъохэм, къэралыгъоу зэрысхэм афэлэжьагъэх. Непи ялIыгъэкIэ, япытагъэкIэ къахэщых.
Медалыр къызэратыгъэхэм ащыщ къуаджэу Хьаджыкъо щыщ Нэпсэу Ахьмэд Аслъан ыкъор. Ишъхьэгъусэрэ ежьыррэ сабыиплI, Бэллэ, Данэ, Рэмэзан ыкIи Рустам, зэдапIу. Ахьмэд «Водоканалым» щэлажьэ, ащ дакIоу джэгухэр, нэмыкI къоджэ Iофтхьабзэхэр зэрещэх, ТОС-м и Совет хэтэу общественнэ Iофыри дехьы.
Ахьмэдрэ Заринэрэ ясабыйхэм яеджэн, культурэм, спортым алъэныкъокIэ сэнаущыгъэу ахэлъым зырагъэ­ушъомбгъуным лъэшэу анаIэ тет. Нахьыжъхэм шъхьэкIафэ афашIынэу, IофшIэныр шIу алъэгъунэу, пшъэ­дэкIыжь ахьыным фэхьазырынхэу апIух.
— Нэпсэу Ахьмэд иунагъо бжьэхъуным бэшIагъэу пылъ, кIэлэцIыкIухэри ащ пищэнхэм ыуж ит. Ащ тетэу шIуагъэ къа­фэзыхьыщтхэм афигъасэхэзэ, языгъэпсэфыгъо уахътэ афызэхещэ, — къыщаIуагъ къэлэ администрацием.
Уисабыйхэм ты дэгъу уафэхъуныр хъулъфыгъэмкIэ мэхьанэшхо зиIэ Iофэу зэрэщытыр, пшъэдэкIыжьышхо зэрэпылъыр щытхъу тамыгъэр къызфагъэ­шъошагъэхэм къыхагъэщы. Уилъфыгъэхэм щысэтехыпIэ уафэхъуныр, бгъэсэнхэр, ппIунхэр, къэуухъумэнхэр, шIулъэгъуи гукIэгъуи яптыныр, щыIэныгъэу апэ илъым фэбгъэхьазырынхэр Iоф псынкIэп.
НэкIубгъор зыгъэхьазырыгъэр НЫБЭ Анзор.