БаскетболымкIэ Урысыем ичемпионат иапшъэрэ лигэ хэт Мыекъопэ «Динамо-МГТУ-р» мы мафэхэм Чебоксары щешIагъ ыкIи текIоныгъитIу къыдихыгъ. Тикомандэ зыIукIагъэр «Чебоксарские ястребы» зыфиIорэр ары.

Апэрэ зэIукIэгъур гъэшIэгъо­нэу кIуагъэ, командэхэм ешIэкIэ дахэ къагъэлъэгъуагъ, текIоныгъэм фэбэнагъэх. Ау «Динамо-МГТУ-р» нахь лъэшыгъ, пчъагъэр 71:64-у ешIэгъур къы­хьыгъ.
ЯтIонэрэ зэIукIэгъум иапэрэ кIэлъэныкъо бысымхэм ахьыгъ, пчъагъэр – 34:28-рэ. Ау ащ къыкIэлъыкIогъэ едзыгъуитIум хьакIэхэр нахь щылъэшыгъэх ыкIи 56:54-у текIоныгъэр къыдахыгъ.
Лигэм очко анахьыбэ щизыгъэкъугъэ «Динамо-МГТУ-м» ибаскетболистэу Константин Клементьевым тикомандэ очко 43-рэ къыфихьыгъ. Тикапитанэу Юрий Кочневым апэрэ зэIукIэгъум очко 17 ригъэкъугъ, анахь цыхьэшIэгъоу ешIагъэхэм ащыщ.
КъыкIэлъыкIощт зэIукIэгъухэр «Динамо-МГТУ-м» Химки щыриIэщтых. ШэкIогъум и 29 – 30-м чIыпIэ командэу «ЦСП-Химки» дешIэщт.