«НыбжьыкIэ объединениехэр зэхащэх ыкIи ахэгъахъу» зыцIэ гъэсэныгъэ еджапIэм иIофшIэн шэкIогъум и 22-м къыщыублагъэу и 24-м нэс Адыгэ къэралыгъо университетым щыкIуагъ.

Ащ апшъэрэ ыкIи гурыт гъэсэныгъэ учреждениехэу шъолъырым итхэм ащеджэрэ студент 280-рэ хэлэжьагъ.
Адыгэ Республикэм ныбжьыкIэ Iоф­хэмкIэ и Комитетрэ Адыгэ къэралыгъо университетымрэ зэгъусэхэу мы Iоф­тхьабзэр зэхащагъ. ЕджапIэм пшъэры­лъэу иIагъэр гъэсэныгъэ организацие-
хэм ащылэжьэрэ ныбжьыкIэ объединениехэм IэпыIэгъу афэхъугъэныр ыкIи ахэм хэхъоныгъэ ашIыным тегъэпсыхьэгъэнхэр ары.
Мэфищым къыкIоцI еджапIэм къе­кIолIагъэхэм ныбжьыкIэ Iофхэр лъыгъэ­кIотэгъэнхэмкIэ шIэныгъэхэри практическэ амалхэри агъотыгъэх, экспертхэм ягъусэхэу гумэкIыгъохэм язэшIохынкIэ шIыкIэхэм алъыхъугъэх.

Къэралыгъо ныбжьыкIэ политикэм щыгъуазэхэр ары экспертхэу ыкIи зещакIохэу еджапIэм фэхъугъэхэр: АКъУ-м ныбжьыкIэ политикэмкIэ иотдел ипащэу Батмытэ Русет, АКъУ-м истудентхэм я Союз ыкIи иаспирантхэм ятхьаматэу Маргарита Рыбалко, лъэныкъо зэфэшъхьафхэм адэлэжьэрэ ныбжьыкIэ гупчэу «Адыгеим иныбжьыкIэхэр» зыфиIорэм иIэшъхьэтетэу Мыгу Бис­лъан, ныбжьыкIэхэм я Урысые Союз и Адыгэ шъолъыр къутамэ итхьаматэу Абрэдж Заур, нэмыкIхэр.
IофшIэныр лъэныкъуитIоу гощыгъагъэ: «Бгъэпсыныр» ыкIи «Хэбгъэхъоныр». Апэрэм хэлэжьагъэхэм анахьэу анаIэ зытырадзагъэр ныбжьыкIэ объединениехэм язэхэщэнкIэ проектхэр гъэпсы­гъэнхэр ары. ЯтIонэрэр зэфэхьысыжьхэм, IофшIэкIэ амалэу аIэкIэлъхэмкIэ зэхъожьынхэм, гъэIорышIэным афэгъэ­хьыгъагъ.
Экспертхэр ягъусэхэу агъэхьазырыгъэ проектхэр къаухъумагъэх, ар еджапIэм иIофшIэн зэфэхьысыжь фэхъугъ.
Адыгэ къэралыгъо
университетым ипресс-къулыкъу