Мы мафэхэм Адыгэ къэралыгъо университетым онлайн егъэджэн гъэшIэгъон ныбжьыкIэхэм афызэхащагъ.

Адыгэ Республикэм икIэлэ­еджакIохэм ямызакъоу Байконур, Москва, Марий Эл, Красноярскэ ыкIи Ставропольскэ крайхэм, Владимирскэ, Курскэ, Липецкэ, Мос­ковскэ, Новгородскэ хэкухэм ыкIи нэмыкI чIыпIэхэм ащыщхэр ащ хэлэжьагъэх. ЗэIухыгъэ онлайн-­урокэу «Наглядная математика: теоремы и факты школьного курса» зыфиIорэр афызэхищагъ хьисапымкIэ гъэхъэгъэшIухэр зиIэу, Лилавати ишIухьафтын илауреатэу, Адыгэ къэралыгъо университетым и Кавказ хьисап гупчэ иIофышIэу, Хьисап институтэу В. А. Стекловым ыцIэ зыхьырэм илабораторие ипащэу Николай Андреевым.
Сыд фэрэ лъэныкъуи хьисапыр цIыфым ищыкIагъ, шIэныгъэ ыкIи технологие зэфэшъхьафхэмкIэ гъэ­хъагъэхэр ашIынхэмкIэ ащ ишIуагъэ къэкIо.
Гурыт еджапIэхэм хьисапым епхыгъэ шIэныгъэу ащызэрагъэ­гъотыхэрэр зыщыбгъэфедэн плъэ­кIыщтхэр къафаIотагъ. ГущыIэм пае, хьисап теориер ыкIи формулэр къызфэбгъэфедэзэ адыгэ Iэнэ лъэкъуищыр лъэкъуиплI зыкIэтым зыкIынахь дэгъур къэпIон плъэ­кIыщт, Пифагор итеоремэкIэ телевизорым иинагъэ зыфэдэн фаер бгъэунэфын олъэкIы. Ащ нэмыкI гъэшIэгъоныбэ ныбжьыкIэхэм зэхахыгъ.
Урысыем апшъэрэ гъэсэны­гъэмкIэ ыкIи шIэныгъэмкIэ и Министерствэ Адыгэ къэралыгъо уни­верситетым къыфигъэшъошэгъэ грантым ишIуагъэкIэ, проектэу «Наука вокруг» зыфиIорэм хахьэу, пэIудзыгъэ егъэджэн сыхьатыр зэхащагъ. Федеральнэ проектэу «Популяризация науки и технологий» зыфиIорэм ар къыдыхэлъытагъ. Хьисапым, астрономием, физикэм, информатикэм, био­логием ыкIи химием алъэныкъокIэ ныбжьыкIэхэм яшIэныгъэхэм ахагъахъо.
Адыгэ къэралыгъо университетым ипресс-къулыкъу.