УФ-м и Президентрэ и Правительствэрэ яIэпыIэгъу ишIуагъэкIэ Адыгеим социальнэ псэуалъэхэр игъорыгъоу щашIых ыкIи щагъэцэкIэжьых.

ЕджапIэхэр, IэзапIэхэр, физкультурэмрэ спортымрэ защыпылъыщтхэ псэолъакIэхэр зэрашIыгъэхэр, щагу ыкIи общественнэ чIыпIэхэр, гъогухэр, инфраструктурэр зэрагъэкIэжьыгъэхэр зэкIэхэмкIи нэрылъэгъу.
Джырэ уахътэми IофшIэнхэр чIыпIэ пшIы пчъагъэхэм ащэкIох, ыпэкIэ рагъэжьэгъэгъэ псэуалъэхэр ахэм адакIоу аухых. ПсэолъэшIыныр мэкIофэкIэ ащ зэрэлъыплъэхэрэр къыIуагъ Адыгеим и ЛIышъхьэу КъумпIыл Мурат. IофшIэнхэр зэшIозыхыхэрэм зэхэсыгъоу адашIыгъэм щытегущыIагъэх псэуалъэ пэпчъ хьазыр зыщыхъущтым.

Адыгеим ипащэ анахьэу анаIэ зытыригъэтыгъэхэр культурэм, гъэсэныгъэм, псэупIэ-коммунальнэ хъызмэтым атегъэпсыхьэгъэ учреждение шъхьа­Iэхэр ары. Ахэм ахэхьэх Мыекъуапэ щагъэпсырэ отделениеу «ГъэшIэ кIыхьэ чаныр», Яблоновскэм щашIырэ еджапIэмрэ спорткомплексымрэ, Адыгэкъа­лэ ифэбэрыкIуапIэ, концерт къэтыпIэу «Налмэсыр», гупчэу «Адыгеим иныбжьыкIэхэр» зычIэтыщт унэр.

Адыгеим и ЛIышъхьэ пшъэрылъ афишIыгъ IофшIэнхэм чэзыоу яIэм псэолъэшIхэр темыкIынхэу, гъэцэкIэкIо хэбзэ къулыкъухэм япащэхэмрэ муниципальнэ псэупIэхэм яIэшъхьэтетхэмрэ псэолъэшIыныр зыщыкIорэ чIыпIэ пстэури ауплъэкIунэу, псэуалъэ­хэр игъом атынхэм пае.
КъумпIыл Мурат исоциальнэ нэкIубгъохэм къащитхыгъ тарихъ мэхьанэ зиIэ унэхэм анахьэу анаIэ зэратырагъэтырэр, ахэм шIэхэу щыIэкIакIэ зэрагъотыщтыр.

«Илъэсым ыкIэ нэс унэу тапэкIэ кIэлэцIыкIу цэ IэзапIэ зычIэтыгъэм IофшIэнхэр къыщытыухыщтых. Мы тарихъ-архитектурнэ псэуалъэу шъо­лъыр мэхьанэ зиIэр Мыекъуапэ къэзыгъэдахэхэрэм ащыщ хъужьыщт. Ащ гупчэу «Адыгеим иныбжьыкIэхэр» джы чIэтыщт.
Къэлэдэсхэм ащыщыбэ ежэ концерт къэтыпIэу «Налмэсыр» къызызэIуа­хыжьыщтым. Ащ игъэкIэжьыни ыкIэм фэкIо. Инженер псэуалъэхэр зэтырагъэпсыхьажьыгъэх, шъхьаныгъупчъэшхохэр зэблахъугъэх. Сценэ Iэмэ-псымэхэр агъэуцух, унэ кIоцIыр зэтырагъэпсыхьажьы.
Лъэпкъ проектэу «Культурэм» къы­хиубытэрэ къэралыгъо IэпыIэгъум ишIуагъэкIэ мыщ Iофышхо щытшIагъ унэм итарихъ теплъэ къэдгъэнэным ыкIи республикэм иконцерт къэтыпIэ аужырэ шапхъэхэм адиштэу творческэ купхэм зыкъыщагъэлъэгъоным, Iоф­тхьэбзэ зэфэшъхьафхэр щызэхащэнхэм пае», — къытхыгъ КъумпIыл Мурат.