Мыгъэ апэрэу математикым и Мафэ хагъэунэфыкIы. Хьисап шIэныгъэм зищыIэныгъэ гъогу езыпхыгъэхэр мы мафэм зэIукIэщтых.

ХьисапымкIэ гъэхъэгъэ инхэр зышIыгъэ Никола Лобачевскэр 1792-рэ илъэ­сым тыгъэгъазэм и 1-м къэхъугъ. ХьисапымкIэ кIэлэегъаджэхэм я Ассоциацие ипрезидентэу, М.В. Ломоносовым ыцIэ зыхьырэ къэралыгъо университетым иректорэу, академикэу Виктор Садовничем гъэрекIо Урысые зэфэсым мэфэкIыр а мафэм тырагъэфэнэу къыхилъхьэгъагъ. Урысые Федерацием и Правительствэ ипащэу Михаил Мишус­тиным иунашъокIэ мы илъэсым ижъоныгъокIэ мазэ мэфэпчъым ар хагъэуцуагъ.
МэфэкIыр Адыгэ къэралыгъо университетым щыхагъэунэфыкIыщт. ШIоигъоныгъэ зиIэхэр Александр Савватеевым илекцие едэIунхэ алъэкIыщт, джащ фэдэу мы шIэныгъэм зищыIэныгъэ езыпхыгъэ цIыф цIэрыIохэр къырагъэблэгъэщтых, хьисапым епхыгъэ площадкэ зэфэ­шъхьафхэр, зэнэкъокъухэр зэхащэщтых.
Iофтхьабзэм хэлэжьэщтых шIэныгъэлэжьхэр, хьисапымкIэ специалистхэр, кIэлэегъэджэ пэрытхэр, студентхэр, аспирантхэр.
МэфэкI шIыкIэм тетэу Iофтхьабзэр сыхьатыр 10-м къызэIуахыщт. Нэужым «Истоки русской математики в лицах» зыфиIорэ лекцием А.В. Савватеевыр къафеджэщт. ШIоигъоныгъэ зиIэхэр хьисапым нахь пэблагъэ зыщыхъущтхэ чIыпIэхэм якIолIэнхэ алъэкIыщт. Сыхьатыр 2-м хьисапымкIэ зэнэкъокъухэр аублэщтых. Куп пэпчъ нэбгыри 4 хэ­тыщт, зы нахьыжъ ыкIи зы кIэлэеджакIо купым хэтыныр зэнэкъокъум ишапхъ.
Адыгэ къэралыгъо университетым ипресс-къулыкъу.