2024-рэ илъэсым шэкIогъум и 21-м гъэстыныпхъэ-энергетическэ комплексым къыхиубытэрэ псэуалъэхэм терроризмэм епхыгъэ бзэджэшIагъэхэр ащызэрамыхьанхэм ыкIи ахэм апэуцужьыгъэным апае штаб егъэджэнхэр зэхащэгъагъэх.

Зэрагъэнэфагъэм тетэу, пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «НПК-м» инефтебазэ идэхьэгъу къэлапчъэ дэжь щыт хьылъэзещэ автомобилым цIыф зэрымыс быбырэ аппарат мыиныр къыщытефагъ. Мэкъэшхо къызэIум ыуж хьылъэзещэ автомобилым шъхьарыхъуагъэм къыкIэнагъ. МэшIогъэкIуа­сэу а чIыпIэм псынкIэу къэсыгъэхэм ар агъэкIосагъ. Къэгъэон Iофхэм афэгъэзэгъэ кIуачIэхэу ОМОН-м иIэхэм ащыщхэр къызэсыхэм зэрагъэ­унэфыгъэмкIэ, аппаратэу къагъоты­гъэм щынагъо къыпкъырыкIынэу щытэп, машIор къызыхэкIыгъэр къефэхы зэхъум аккумуляторыр къызэрэуагъэр ары.
Видеолъыплъэным иамалхэм къызэрагъэлъэгъуагъэмкIэ, амышIэрэ нэбгырищ нефтебазэм къыдэхьэгъагъэх, чIыдагъэр зэрыт цистернэхэм адэжь рюкзакитIу агъэуцугъ. Полицием иIофышIэхэр залъэгъухэм, къящэрыуагъэх ыкIи псынкIэу административнэ унэу щытхэм ащыщ горэм зыщагъэбылъыжьыгъ (Iоф щызышIэрэ нэбгыри 4 а уахътэм унэм исыгъ).
Адыгэ Республикэм иоперативнэ штаб унашъо ышIыгъ контртеррористическэ Iофтхьабзэ зэрихьанэу. Ащ ишIуагъэкIэ щынагъоу къыкъокIыгъагъэр дагъэзыжьыгъ.
Егъэджэн-гъэсэн Iофтхьабзэу зэхащагъэм ишIуагъэкIэ нафэ къафэхъугъ зэкIэми пкIуачIэ зэхэлъэу узэдеIэ­жьмэ, гумэкIыгъоу къыкъокIырэм игъом упэшIуекIон зэрэплъэкIыщтыр.
Мы Iофтхьабзэм хэлэжьагъэх ФСБ-м, МВД-м, ФСИН-м, МЧС-м я ГъэIорышIапIэхэу Адыгеим щыIэхэм яIофышIэхэр.
Оперативнэ штабэу Адыгэ
Республикэм щыIэр